ၵေႃတႆးဝဵင်းၵႃလီႉ တေပိုတ်ႇပၢင်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ တႃႇၶၢဝ်းတၢင်းၼိုင်ႈလိူၼ် ႁွင်ႉမွၵ်ႇၽူႈသူၼ်ၸႂ် ယိုၼ်ႈ ၸိုဝ်ႈတႃႇၶဝ်ႈႁဵၼ်းတင်ႈဢဝ်မိူဝ်ႈၼႆႉၵႂႃႇ တေႃႇလိူၼ်ထူၼ်ႈ 10 ၼႆႉသဵင်ႈ။
ဝၼ်းတီႈ 05/11/2018 တေထိုင်ၼႆႉ ၵေႃတႆးၵႃလီႉ တေၸတ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ တႃႇၶၢဝ်းတၢင်း ၼိုင်ႈလိူၼ် တေႃႇဝၼ်းတီႈ 01/12/2018 တီႈ ၵေႃတႆးလွႆတႆးလီ ၵိင်ႇၸႄႈဝဵင်းၵႃလီႉ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၼႂ်းပၢင်ၼၼ်ႉတေပူင်သွၼ်ပၼ် လၢႆလွင်ႈမိူၼ်ၼင်ႇ တူၼ်ႈၸႂ်ႁဵတ်းၵၢၼ်ၵူၼ်းၼမ်လႄႈ တူၼ်ႈၸႂ်တႆး၊ပိုၼ်ႉထၢၼ်ၵၢၼ်ၸႂ်ႉ ၶွမ်ႊ၊ ပိူင်တႅမ်ႈလိၵ်ႈလုမ်း၊ ၵၢၼ်ၵဵပ်းၶေႃႈမုလ်း၊ မၢႆမီႈၾိင်ႈမိူင်း၊ ၵၢၼ်ၵပ်းသိုပ်ႇ၊ ၵၢၼ်ၶွတ်ႇၽွတ်ႈမုၵ်ႉၸုမ်း၊ၵၢၼ်ယိပ်းသဵၼ်ႈမၢႆငိုၼ်း၊ဢိၵ်ႇတၢင်းႁူႉတၢင်းႁၼ်ထႅင်ႈတၢင်ႇၸိူဝ်းတၢင်ႇလွင်ႈဝႃႈၼႆ။
ၸၢႆးၵွၼ်းၶိူဝ်း ၽူႈၶပ်းပၢင်ၵေႃတႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ ယိူင်းဢၢၼ်းဢၼ်ႁဝ်းၶႃႈ တေၸတ်းႁဵတ်းၼႆႉ ပိူဝ်ႈႁႂ်ႈၵိူတ်ႇဢွၵ်ႇမႃးၼေႃႇတႅၼ်းၶိူဝ်းၼမ်ၼမ်သေ ႁႂ်ႈၸၢင်ႈမိူဝ်း ပူၵ်းပွင်ဢိူင်ႇ ဝၢၼ်ႈပိုၼ်ႉတီႈၽႂ်မၼ်း ၊ ပၢင်သွၼ်ႁဝ်း ၶႃႈၼႆႉဢမ်ႇမီးၵႃႈၸႂ်ႉၸၢႆႇသင်ၶႃႈ ၵူၺ်းၵႃႈႁႂ်ႈ ႁၢင်ႈႁႅၼ်း ၽႃႈႁူမ်ႇၶူဝ်းၼွၼ်းမႃးၸွမ်း၊ တေႁပ်ႉမွၵ်ႈ 30 – 35 ၵေႃႉၶႃႈ ၵူၼ်းၼုမ်ႇၵေႃႉလႂ်သူၼ်ၸႂ်ၵေႃႈ ၶႅၼ်းတေႃႈၵပ်းသိုပ်ႇတၢင်ႇလဝ်ႈမႃးၵွၼ်ႇသဵင်ႈလိူၼ်ၼႆႉသေၵမ်းၶႃႈ ” ဝႃႈၼႆ။
ၼင်ႇႁိုဝ်တေၵိူတ်ႇဢွၵ်ႇမႃး ၵူၼ်းၼုမ်ႇၼေႃႇတႅၼ်းၶိူဝ်း ဢၼ်ၸၢင်ႈၸွႆႈထႅမ်ပူၵ်းပွင်ၶိုၼ်းဢိူင်ႇဝၢၼ်ႈ ပိုၼ်ႉတီႈတူဝ်ၸဝ်ႈၵဝ်ႇလႄႈ ႁႂ်ႈၵူၼ်းၼုမ်ႇ၊ ၵူၼ်းမိူင်းမီးၾိင်ႈယၢမ်ႈလီ၊ မီးတၢင်းႁူႉ တၢင်းႁၼ်ၶိုတ်း ၸၼ်ႉပဵင်းပိူၼ်ႈၼၼ်ႉ ယူႇတီႈၵေႃတႆးသေ ၸတ်းႁဵတ်းပၢင်သွၼ် ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇ မႃးယူႇၵူႈပီၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ