ၸုမ်းၵူၼ်းၼုမ်ႇတႆး ဝဵင်းပၢင်လူင် ႁူမ်ႈၵၼ်ၸတ်းႁဵတ်းပၢင်သွၼ်ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ ႁႂ်ႈပဵၼ်မႃးၽူႈဢွၼ်ႁူဝ်လီမိူဝ်းၼႃႈ။

ပၢင်သွၼ်ၸတ်းႁဵတ်း ဝၼ်းတီႈ 04 – 07/10/2018 တီႈတိူၵ်ႈတူၺ်းလိၵ်ႈ(ႁူင်းတူၺ်းလိၵ်ႈ) ပွၵ်ႉတုမ်ႇမူဝ်ပွၵ်ႉ 4 ဝဵင်းပၢင်လူင် ၸႄႈတွၼ်ႈလွႆလႅမ် မိူင်းတႆးပွတ်းၸၢၼ်း။ ယိူင်းဢၢၼ်းႁႂ်ႈၵူၼ်းၼုမ်ႇမိူဝ်ႈၼႆႉ ပဵၼ်မႃးၽူႈဢွၼ်ႁူဝ်မိူဝ်းၼႃႈလႄႈ တႃႇတေပဵၼ်ၽူႈၵွၼ်းဢိူင်ႇဝၢၼ်ႈမိူဝ်းၼႃႈ။

ၸၢႆးသူႉ ၽူႈပွင်ၵၢၼ်ၵူၼ်းၼုမ်ႇတႆး ဝဵင်းပၢင်လူင် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ ၸတ်းႁဵတ်းပၢင်သွၼ်ၼႆႉ ပိူဝ်ႈႁႂ်ႈၵူၼ်းၼုမ်ႇသႅၼ်းႁုၼ်ႈမႂ်ႇ မီးၼမ်ႉၵတ်ႉတၢင်းၶႅၼ်ႇႁႂ်ႈပဵၼ်ၽူႈဢွၼ်ႁူဝ်၊ ၽူႈၵွၼ်းဢိူင်ႇဝၢၼ်ႈ ၊ ႁႂ်ႈလူင်ႉလႅၼ်ႇလိၵ်ႈမၢၼ်ႈ၊ၵႂၢမ်းမၢၼ်ႈ၊ ပေႃးႁဝ်းလူင်ႉလႅၼ်ႇ လိၵ်ႈမၢၼ်ႈၵႂၢမ်း မၢၼ်ႈၼႆၸိုင် ႁဝ်းတေၸၢင်ႈၸွႆႈထႅမ်ၵူၼ်းႁဝ်းလႆႈ ၼမ်” ဝႃႈၼႆ။

ပၢင်သွၼ်ၼႆႉတမ်းၽႅၼ်ၵၢၼ်ဝႆႉဝႃႈ တေၸတ်းႁဵတ်း 3 ၸုပ်ႈ ။ ၸုပ်ႈတီႈၼိုင်ႈပူင်သွၼ်ပၼ် လၢႆပူၵ်းပွင်တူဝ်ၸဝ်ႈၵဝ်ႇ၊ ထတ်းသၢင်ၼမ်ႉၵတ်ႉတူဝ်ၵဝ်ႇ။ ၸုပ်ႈတီႈသွင် တေပူင်သွၼ် လၢႆးၶဝ်ႈႁႃၵပ်းသိုပ်ႇၼႂ်းတူင်ႇဝူင်းၵူၼ်း ၊ လၢႆးဢွၼ်ႁူဝ်။ ၸုပ်ႈတီႈသၢမ်သမ်ႉ တေပူင်သွၼ် ပၼ်လၢႆးတမ်းဝၢင်းၽႅၼ်ၵၢၼ် ၸၼ်ၽႅၼ်ၵၢၼ်၊ လၢႆးပူၵ်းပွင် ၼႃႈဝၢၼ်ႈတႃသူၼ် ၸိူဝ်းၼႆႉ ။ ပၢင်သွၼ်တင်းသၢမ်ၸုပ်ႈၼႆႉ တေဢၢၼ်းၸတ်းႁဵတ်းႁႂ်ႈယဝ်ႉၼႂ်းၶၢဝ်းတၢင်း 4 လိူၼ်ၼႆယဝ်ႉ။