ၼၢင်းမူဝ်ႁွမ် မႄႈလုၵ်ႈဢွၼ်ႇ 3 ၵေႃႉ ၵူၼ်းဝၢၼ်ႈပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဢၼ်သိုၵ်း တဢၢင်း TNLA တီႉၺွပ်းၵုမ်းၶင်တူဝ် ၵႂႃႇၸဵမ်မိူဝ်ႈဝၼ်းတီႈ 17/08/2018 တေႃႇထိုင်ယၢမ်းလဵဝ် ပႆႇပွႆႇတူဝ်ပၼ်ၶိုၼ်း မီးၶၢဝ်းတၢင်းႁိုင် 50 ဝၼ်းပၢႆ ပီႈၼွင်ႉၵူၼ်းႁိူၼ်းမႆႈၸႂ်။

ၼၢင်းမူဝ်ၶမ်း ၵေႃႉပဵၼ်ပီႈၼၢင်း ၼၢင်းမူဝ်ႁွမ် လၢတ်ႈတီႈၽူႈတွႆႇႁွၵ်ႈဝႃႈ “ ယၢမ်းလဵဝ် ၶၢဝ်ႇငၢဝ်း ၼွင်ႉယိင်းၶႃႈႁဝ်း ပဵၼ်ႁိုဝ် မီးႁိုဝ် ဢၼ်ဝႃႈၼၼ်ႉ ဢမ်ႇလႆႈႁူႉၸွမ်းလွင်ႈသင်သေဢိတ်း။ လၢၼ်ၶႃႈ 3 ၵေႃႉၵေႃႈ ထၢမ်ႁႃမႄႈမၼ်းယူႇ တိၵ်းတိၵ်း မႄႈႁဝ်းၵႂႃႇလႂ်၊ မႄႈႁဝ်းတေမႃးမိူဝ်ႈလႂ်ၼႆ။ ၶႃႈပေႃးလႆႈလႅၼ်ဝႃႈ ထႅင်ႈ 2 – 3 ဝၼ်းၵေႃႈ တေပွၵ်ႈမႃး ယဝ်ႉၼႆ ၵူႈဝၼ်းဢေႃႈၼႆႉ။ လုၵ်ႈဢွၼ်ႇတႄႉ တိုၼ်းမွင်းပႂ်ႉယူႇတိၵ်းတိၵ်းၶႃႈ။ ထႅင်ႈလွင်ႈၼိုင်ႈၵေႃႈ ၶႃႈႁဝ်းမႆႈၸႂ် လွင်ႈႁူမ်ႇလူမ်ႈ၊ ပၢႆးယူႇလီမၼ်းၼၢင်း တေႃႈ လဵဝ် သမ်ႉတေၶဝ်ႈၶၢဝ်းၵတ်းယဝ်ႉလႄႈ တုၵ်းယွၼ်းထိုင်ႁႂ်ႈၸဵဝ်းပွႆႇ ပၼ်ၶိုၼ်းၽႂ်းၽႂ်းသေၵမ်း” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸုမ်းတူင်ႉၼိုင်တူင်ႇဝူင်းၵူၼ်း ၼႂ်းၸႄႈဝဵင်းၼမ်ႉၶမ်း 11 ၸုမ်း လႆႈၶွတ်ႇၽွတ်ႈၶွမ်ႊမတီႊ လိူၵ်ႈၽူႈတၢင်တူဝ် 4 ၵေႃႉသေ ၵႂႃႇႁူပ်ႉၵၼ် တင်းၸုမ်း FPNCC တီႈပၢင်သၢင်း တွၼ်ႈတႃႇဢုပ်ႇဢူဝ်း လွင်ႈၼၢင်း မူဝ်ႁွမ်ၼႆႉယူႇ ဝႃႈၼႆ။

တွၼ်ႈတႃႇၼၢင်းမူဝ်ႁွမ် တေပူၼ်ႉလွတ်ႈဢွၵ်ႇမႃးၼၼ်ႉ ယူႇတီႈၸုမ်းတူင်ႉၼိုင်တူင်ႇဝူင်းၵူၼ်း၊ ၸုမ်းၵူၼ်းၼုမ်ႇ၊ ပႃႇတီႇၵၢၼ်မိူင်းလႄႈ ဢိၵ်ႇထႅင်ႈလၢႆလၢႆၸုမ်း တင်းမူတ်း 11 ၸုမ်း ၸွႆႈၵၼ်ဢွၵ်ႇလိၵ်ႈပိုၼ်ၽၢဝ်ႇ။ လိူဝ်ၼၼ်ႉ ၵူၼ်းမိူင်းၼမ်ႉၶမ်း ၼပ်ႉႁူဝ်ႁဵင် ႁူမ်ႈၵၼ်သေ ဢွၵ်ႇၼႄၵၢင်ၸႂ် ပႆတၢင်း ၸႂ်ႉလႆႈၵတ်းယဵၼ်မႃး။ ထႅင်ႈလွင်ႈၼိုင်ႈ ၵေႃႈ ယူႇတီႈမုင်ႉႁေႃႁိူၼ်း ပီႈၼွင်ႉၼၢင်းမူဝ်ႁွမ်ၶဝ် လႆႈႁဵတ်းလိၵ်ႈသေ တၢင်ႇၸူးထိုင် ၸွမ်ၸိုင်ႈ မိူင်း ႁူမ်ႈတုမ်၊ တီႈၵိူဝ်းၵုမ်ၸိုင်ႈမိူင်းလႄႈ ၸွမ်သိုၵ်းလူင်မိၼ်းဢွင်ႇလၢႆႇ၊ သင်ၶၸဝ်ႈတဢၢင်းလႄႈ ၸုမ်း FPNCC ၸဵမ်ၸိူဝ်းၼႆႉမႃး ဝႃႈၼႆ။

ၼၢင်းမူဝ်ႁွမ်ၼႆႉ ထုၵ်ႇသိုၵ်းတဢၢင်း TNLA တီႉၺွပ်းၵုမ်းၶင်ဢဝ်တူဝ်မၼ်းၼၢင်းၵႂႃႇ မိူဝ်ႈဝၼ်းတီႈ 17/08/2018 ၶဝ်ႈတီႉဢဝ်တီႈႁိူၼ်းမၼ်း ၼၢင်း တီႈပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း တေႃႇထိုင် ယၢမ်းလဵဝ် ပႆႇပွႆႇတူဝ်ပၼ်ၶိုၼ်း ဝႃႈၼႆ။

မိူဝ်ႈပီ 2016 သိုၵ်း TNLA မႃးၵဵပ်းၶွၼ်ႇ တီႈႁိူၼ်းၼၢင်းမူဝ်ႁွမ် 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်း ငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင် ၵေႃႉ ၺႃးသိုၵ်းလူင်ပွင်ၸိုင်ႈမၢၼ်ႈ မူၵ်းယိုဝ်းၸွမ်းတၢင်း တၢႆၵေႃႉၼိုင်ႈ၊ တီႉလႆႈတူဝ် လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်း ၾူၼ်းလၢတ်ႈ ဝၼ်းၼၼ်ႉ ၵမ်းလဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်ၵူၺ်းသေ ႁဝ်းဢမ်ႇဢဝ်သၢႆ ၸႂ်ႁဝ်းလႅၵ်ႈ သေပွင်ႇၶၢဝ်ႇလေႃႇ ႁဝ်းဢမ်ႇ ၸႂ်ႈၵူၼ်းဢဝ်ၶၢဝ်ႇပွင်ႇၶၢဝ်ႇပၼ်ၽႂ် ဝႃႈၼႆ။