သိုၵ်းဝႃႉ UWSA သူင်ႇတူဝ်ၵူၼ်းၵႃႉၶၢႆယႃႈမဝ်းၵမ် 2 ၵေႃႉမႄႈလုၵ်ႈ ပၼ်ၼႂ်းမိုဝ်းပလိၵ်ႈမၢၼ်ႈ ၼႂ်းၸႄႈဝဵင်းမိူင်းတူၼ် ဝႃႈၼႆ။
ဝၼ်းတီႈ 06/10/2018 တပ်ႉသိုၵ်းဝႃႉ 171 ဢၼ်တူင်ႉၼိုင်ယူႇတၢင်းပွတ်း ႁူၺ်ႈဢေႃႈ BP1 ပုင်ႇပႃႇၶႅမ်ၼၼ်ႉ တီႉ ၺွပ်းလႆႈ ၸၢဝ်းလီးသေႃး 2 ၵေႃႉမႄႈလုၵ်ႈ လၵ်ႉတေႃႉသူင်ႇယႃႈမဝ်းၵမ် ဢဝ်သႂ်ႇၼႂ်းတႂ်ႈတီႈၼင်ႈရူတ်ႉၶိူင်ႈ။ ၵူၼ်း 2 ၵေႃႉၼၼ်ႉ သိုၵ်းဝႃႉသူင်ႇတူဝ် ပၼ်ပလိၵ်ႈမၢၼ်ႈ တီႈၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်း ဢွၵ်ႇၶူင်း ဝႃႈၼႆ။
ၵူၼ်းပိုၼ်ႉတီႈ ၵေႃႉၼိုင်ႈ တီႈပုင်ႇပႃႇၶႅမ် လၢတ်ႈတီႈၽူႈတွႆႇႁွၵ်ႈဝႃႈ “ မႅၼ်ႈယဝ်ႉၶႃႈ။ 2 ၵေႃႉမႄႈလုၵ်ႈၼႆႉ ၸၢဝ်းလီး သေႃး လႆႈႁူႉဝႃႈ ၵေႃႉပဵၼ်လုၵ်ႈယိင်းၼၼ်ႉ တိုၵ်ႉလႆႈဢႃယု 16 -17 ပီၵူၺ်း။ တီႉလႆႈ ယႃႈၾိၼ်ႇၽိူၵ်ႇလႄႈ ယႃႈ မႃႉ။ တေႃႈလဵဝ် တၢင်း ဝႃႉၶဝ် ဢၢပ်ႈပၼ်ၼႂ်းမိုဝ်းပလိၵ်ႈမၢၼ်ႈၵႂႃႇယဝ်ႉ” ဝႃႈၼႆ။
ယႃႈမဝ်းၵမ် ဢၼ်တီႉလႆႈၼၼ်ႉ သိုၵ်းဝႃႉသူင်ႇမွပ်ႈပၼ် ပလိၵ်ႈမၢၼ်ႈ ယႃႈမႃႉ 1 ႁဵင်မဵတ်ႉ၊ ယႃႈ ၾိၼ်ႇၽိူၵ်ႇ 2 (တဝ်ႈ) တဝ်ႈသပွၼ်းသိူဝ်ႉ တေမီးၼမ်ႉၼၵ်း 52 ၵရမ်ႊ။ လိူဝ်ၼၼ်ႉ ငိုၼ်းထႆး 175 ဝၢတ်ႇ၊ ရူတ်ႉၶိူင်ႈ 1 လမ်း၊ ၾူၼ်း 4 လုၵ်ႈ ဝႃႈၼႆ။
