ၸဝ်ႈလႅင်းမိူင်း ၽူႈယၢမ်ႈႁၢပ်ႇၵၢၼ် ၸိူဝ်ႉၸၢတ်ႈပၢၼ် SURA လႆႈလူႉသဵင်ႈ ၽွင်းဢႃယု လႆႈ 76 ပီ ယွၼ်ႉတၢင်း ပဵၼ်ၵူၼ်းထဝ်ႈ ဝႃႈၼႆ။
ဝၼ်းတီႈ 07/10/2018 ယၢမ်းၵၢင်ၼႂ် 8:11 မူင်း ၸဝ်ႈလႅင်းမိူင်း လူႉတၢႆ တီႈႁိူၼ်းမၼ်းၸဝ်ႈဝၢၼ်ႈပဵင်း လူင် လႅၼ်လိၼ် တႆး – ထႆး ဢိူင်ႇပဵင်းလူင် ၸႄႈဝဵင်း ဝဵင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆး ယွၼ်ႉတၢင်းပဵၼ်ၵူၼ်း ထဝ်ႈ ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းလုမ်း PI / ၵေႃႉပဵၼ်ၼွင်ႉၶူၺ် ၸဝ်ႈလႅင်းမိူင်း လၢတ်ႈတီႈၽူႈတွႆႇႁွၵ်ႈဝႃႈ “ ၽႂ်ၵေႃႈ ဢမ်ႇထၢင်ႇ တေလူႉဝႆးၸိူင်ႉၼႆ။ ဢၼ်မၼ်းၸဝ်ႈပဵၼ်တၢင်းပဵၼ်ယႂ်ႇလူင်ဢမ်ႇမီး။ မီးလွင်ႈဢမ်ႇၸၢင်ႈပႆ ၼၼ်ႉၵူၺ်း။ တေလႆႈဝႃႈ ပဵၼ်တၢင်းပဵၼ် ၵူၼ်း ထဝ်ႈၶႃႈယဝ်ႉ ဢႃယု မၼ်းၸဝ်ႈ 76 ပီ။ တေႃႈလဵဝ် ၶၢပ်ႈတူဝ်မၼ်းၸဝ်ႈတႄႉ ဢွၼ်ၵၼ်လုမ်းလႃးဝႆႉတီႈ ႁိူၼ်းမၼ်း ၸဝ်ႈ ပဵင်းလူင်” ဝႃႈၼႆ။
ပေႃးထိုင်မႃး ဝၼ်းတီႈ 09/10/2018 ၸိုင် ယူႇတီႈပီႈၼွင်ႉၸိူဝ်ႉၶိူဝ်း လုၵ်ႈလၢင်းၼၢင်းမေး တေဢွၼ်ၵၼ်ပူၼ်ႉ ၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ ဝႃႈၼႆ။
ၸဝ်ႈလႅင်းမိူင်းၼႆႉ ၵိူတ်ႇမိူဝ်ႈပီ 1942 ၸႃတိတီႈၵိူတ်ႇ ပဵၼ်ဝၢၼ်ႈမိူင်းယဵၼ် ၸႄႈဝဵင်းၼမ်ႉတူႈ ၸိုင်ႈတႆးပွတ်း ႁွင်ႇ။ မၼ်းၸဝ်ႈၼႆႉ တႄႇႁၢပ်ႇၵၢၼ်ၸိူဝ်ႉၸၢတ်ႈ ၼႂ်း SSA မႃး မိူဝ်ႈပီ 1964။ ပဵၼ်ၵႅမ်ၸဝ်ႈၵွၼ်းၸိူင်းသေ လႆႈႁဵတ်း ၵၢၼ် ၽွမ်ႉႁူမ်ႈမႃးတႃႇသေႇ။ ၽွင်းပၢၼ်ၵႂႃႇဢုပ်ႇ ရလလၽ SNPLO တႃႇၵၢၼ်ၽွမ်ႉႁူမ်ႈ မိူဝ်ႈပီ 1966 ၼၼ်ႉ ၺႃး ယိုဝ်း လႄႈ တိူဝ်ႉမၢတ်ႇမၢၵ်ႇၵွင်ႈ/ တီႈၶႃ၊ တီႈဢူင်ႈတိၼ် ထိုင်တီႈလႆႈယူတ်းယႃတူဝ်တင်းႁိုင်။
ဝၢႆးၼၼ်ႉမၼ်း ၸဝ်ႈလႆႈႁၢပ်ႇၵၢၼ်ၾၢႆႇၽုၵ်ႇသွမ်ႈလႄႈ ၾၢႆႇပႃႇမႆႉၼႂ်း SURA တေႃႇပေႃးထိုင်ၵိုတ်းလိုဝ်ႈၵၢၼ် 1996။
