ၾူၼ်တူၵ်းႁၢဝ်ႈႁႅင်း ၼမ်ႉႁူၺ်ႈ/ၼမ်ႉလွႆ လႆၶဝ်ႈၼမ်ႉပေႃႉသေ ၼမ်ႉလူၼ်ႉၾင်ႇထူမ်ႈၼႂ်းႁိူၼ်းယေးၵူၼ်းဝၢၼ်ႈ ၼႂ်းၸႄႈဝဵင်းသီႇပေႃႉ ဝႃႈၼႆ။
ဝၼ်းတီႈ 05/10/2018 မိူဝ်ႈၼႆႉ ယၢမ်းၵၢင်ၼႂ် မွၵ်ႈ 8 မူင်း မႄႈၼမ်ႉပေႃႉ လႆထူမ်ႈႁိူၼ်းၵူၼ်းဝၢၼ်ႈ တၢင်းပွၵ်ႉၺွင်ႇ ၵဝ်ႈတူၼ်ႈ၊ ပွၵ်ႉၵၢင်ဝဵင်း၊ ပွၵ်ႉမၢၼ်ႈၸၢတ်ႈ(ၸၢတ်ႉၸု)လႄႈ ဝၢၼ်ႈတူင်ႈၸၢင်ႉ လိူဝ်ၼၼ်ႉ ထူမ်ႈပႃးတူင်ႈႁႆႈၼႃး ၵူၼ်းမိူင်း ၵမ်ႈၽွင်ႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးၶမ်း ၵူၼ်းဝၢၼ်ႈၺွင်ႇၵဝ်ႈတူၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၾူၼ်တူၵ်းႁႅင်းၼႃႇ မိူဝ်ႈၶမ်ႈဝႃးၼႆႉ ထိုင်မႃး မိူဝ်ႈၼႆႉၵၢင်ၼႂ် မွၵ်ႈ 7 မူင်းၶိုင်ႈ ၸမ် 8 မူင်းၼႆႉ ၼမ်ႉပေႃႉ ၼွင်းလုပ်ႇထူမ်ႈၼႂ်းဝၢၼ်ႈ ဢၼ်ၸမ်မႄႈ ၼမ်ႉပေႃႉ။ တေႃႈလဵဝ်တႄႉ ယွမ်းလူင်းၵႂႃႇယဝ်ႉ ၼမ်ႉလုပ်ႇထူမ်ႈ တေႁိုင် မွၵ်ႈ 2 – 3 ၸူဝ်ႈမူင်း ၵႃႈၼႆႉၵူၺ်းၶႃႈ” ဝႃႈၼႆ။
သိုပ်ႇလၢတ်ႈဝႃႈ “ၾၢႆၽႃၽိူၵ်ႇ ဢၼ်မီးၾၢႆႇၼိူဝ် ဝၢၼ်ႈၺွင်ႇၵဝ်ႈတူၼ်ႈၼၼ်ႉ လူၼ်ႉၾင်ႇ” ဝႃႈၼႆ။
ၼွၵ်ႈလိူဝ်ၼၼ်ႉ တီႈဝၢၼ်ႈတူင်ႈၸၢင်ႉ ဢၼ်မီးတၢင်းၾၢႆႇႁွင်ႇ ဝဵင်းသီႇပေႃႉ ယၢၼ်ၵႆ မွၵ်ႈၼိုင်ႈလၵ်းၼၼ်ႉၵေႃႈ ၼမ်ႉလုပ်ႇထူမ်ႈၼႂ်းမူႇဝၢၼ်ႈတင်းၼမ်။ လိူဝ်ၼၼ်ႉ ၸွမ်းတူင်ႈၼႃးၵေႃႈ လႆၼွင်းထူမ်ႈ တင်းၼမ်မိူၼ် ၵၼ်ယူႇ ဝႃႈၼႆ။
ၸၢႆးၵျေႃႇ ၵူၼ်းမိူင်းသီႇပေႃႉ လၢတ်ႈဝႃႈ “ တီႈဝၢၼ်ႈတူင်ႈၸၢင်ႉတႄႉ လႆႈငိၼ်းဝႃႈ ထူမ်ႈႁႅင်းဝႆႉ တေႃႈလဵဝ်တႄႉ ယွမ်းလူင်းၵႂႃႇယဝ်ႉၶႃႈ။ ထူမ်ႈၵမ်းၼိုင်ႈၵူၺ်း။ ၼမ်ႉဢၼ်လႆထူမ်ႈမိူဝ်ႈၵႆႈၼႆႉတႄႉ ပဵၼ်ၼမ်ႉဢၼ်ပႃးၶီႈၵူမ်ႇ ၶီႈ ငႂ်ႈမႃးၸွမ်းၼမ်ႉတင်းၼမ်” ဝႃႈၼႆ။
ၶၢဝ်းၾူၼ်ပီၼႆႉ ၾူၼ်လီတင်းပီ။ ႁၢင်ၾူၼ်ၼႆႉ လူမ်းမုၼ်ႇသုၼ်းၽတ်ႉပဝ်ႇႁႅင်း လူမ်းလႅင်ႉၶဝ်ႈ တၢင်းမိူင်းၵျပၢၼ်ႇ ၽႅၼ်ႇလိၼ်ဝႆ တၢင်းဢိၼ်ႊတူဝ်ႊၼီႊသျိူဝ်ႊလႄႈ ၾူၼ်လူမ်း တၢင်းမိူင်းမၢၼ်ႈ မိူင်းတႆးၵေႃႈ ယင်းပႆႇမူတ်းသဵင်ႈ။ ၼမ်ႉထူမ်ႈလၢႆလၢႆၸႄႈဝဵင်းၼႂ်းၸိုင်ႈတႆး။
