ၸွမ်းၼင်ႇပၵ်းပိူင်မၢႆမီႈ မိူင်းထႆး တမ်းဝၢင်းဝႆႉၼၼ်ႉ ႁႅင်းၵၢၼ်မိူင်းႁူမ်ႈတုမ် ၸိူဝ်းၵႂႃႇႁဵတ်းၵၢၼ် ၼႂ်းမိူင်းထႆး ဢမ်ႇ ၸွမ်းပၵ်းပိူင်မၢႆမီႈမိူင်းထႆးၼၼ်ႉ ၺႃးၸဝ်ႈၼႃႈတီႈပလိၵ်ႈထႆး တီႉၺွပ်းသူင်ႇတူဝ်ပွၵ်ႈၶိုၼ်းလႅၼ်လိၼ် 3 ဢွင်ႈတီႈ ၼႂ်းၶၢဝ်း တၢင်း 3 လိူၼ်ၵူၺ်းမီး ႁူဝ်ၵူၼ်း 3 မိုၼ်ႇပၢႆ ဝႃႈၼႆ။
လူင်ပွင်ၸိုင်ႈထႆး တင်း မၢၼ်ႈ တူၵ်းလူင်းလႆႈၸႂ်ၵၼ်ဝႆႉဝႃႈ သင်တီႉၺွပ်းလႆႈႁႅင်းၵၢၼ်မိူင်းႁူမ်ႈတုမ် ၽိတ်းမၢႆမီႈ ၸိုင်ႈထႆးၸိုင် သင်သူင်ႇတူဝ်ပွၵ်ႈႁႂ်ႈမွပ်ႈပၼ် တီႈလုမ်းႁႅင်းၵၢၼ်ဢၼ်ပၵ်းဝႆႉ ၸွမ်းလႅၼ်လိၼ် မိူၼ်ၼင်ႇ မႄႈသၢႆ – တႃႈၶီႈလဵၵ်း၊ မႄႈသွတ်ႇ – မျႃႉဝတီႇလႄႈ ရယွင်း – ၵေႃႇသွင် ၸဵမ်ၸိူဝ်းၼႆႉ။ ယူႇတီႈပလိၵ်ႈထႆး သူင်ႇတူဝ်ႁႅင်းၵၢၼ် မိူင်းႁူမ်ႈတုမ်ပွၵ်ႈ ၶၢဝ်းတၢင်း 3 လိူၼ်ၼႆႉမႃး တႄႇဢဝ် လိူၼ်ၵျူႊလၢႆႊ ထိုင် လိူၼ်သႅပ်ႊထႅမ်ႊၿိူဝ်ႊ 2018 မီးႁူဝ် ၵူၼ်းၵႂႃႇတင်းမူတ်း 34,926 ၵေႃႉ၊ ၽူႈၸၢႆး 14,043 ၵေႃႉ၊ ၽူႈယိင်း 5,391 ၵေႃႉ ဝႃႈၼႆ။
သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ “ ၼႂ်းလိူၼ်သႅပ်ႊထႅမ်ႊၿိူဝ်ႊၼႆႉၵူၺ်း ထႆးသူင်ႇပွၵ်ႈ တၢင်း မႄႈသွတ်ႇ – မျႃႉဝတီႇ ၽူႈၸၢႆး 3,781 ၵေႃႉ၊ ၽူႈယိင်း 1,409 ၵေႃႉ၊ တၢင်း ရယွင်း – ၵေႃႇသွင် ၽူႈၸၢႆး 266 ၵေႃႉ၊ ၽူႈယိင်း 36 ၵေႃႉ။ မႄႈသၢႆ – တႃႈၶီႈလဵၵ်းသမ်ႉ ၽူႈၸၢႆး 65 ၵေႃႉ၊ ၽူႈယိင်း 27 ၵေႃႉ တင်းမူတ်း ႁူမ်ႈၵၼ် ၽူႈၸၢႆး 4,112 ၵေႃႉ၊ ၽူႈယိင်း 1,472 ၵေႃႉ” ဝႃႈၼႆ။
ယွၼ်ႉၼၼ် ႁွင်ႈၵၢၼ်လူင်ၾၢႆႇႁႅင်းၵၢၼ်မိူင်းထႆး မီးၶေႃႈလႅၵ်ႈလၢႆႈ ပၵ်းပိူင်မၢႆမီႈ ႁႅင်းၵၢၼ်သေ လူင်ပွင်ၸိုင်ႈမိူင်းထႆး တင်း မၢၼ်ႈ လႆႈဢုပ်ႇဢူဝ်းငူပ်ႉငီႉၵၼ် တူၵ်းလူင်းႁဵတ်းပၼ် ပပ်ႉဝႂ်ၶၢမ်ႈမိူင်းသီၶဵဝ် ဢၼ်ႁွင်ႉဝႃႈ ပပ်ႉ CI တႄႇဢဝ် ပီ 2017 လိူၼ်မၢတ်ႊၶျ် ဝၼ်းတီႈ 3 ထိုင် ပီ 2018 လိူၼ်ၵျုၼ်ႊ ဝၼ်းတီႈ 30 ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်ထုၵ်ႇၸဝ်ႈၼႃႈတီႈပလိၵ်ႈထႆး တီႉၺွပ်းသူင်ႇတူဝ်ပွၵ်ႈၶိုၼ်းၼၼ်ႉ ၵမ်ႈၼမ် ဢမ်ႇ မီးဝတ်းဝႂ်ၵၼ်၊ ဝတ်းမူတ်းဢႃယု၊ ဢမ်ႇတေႃႇဝႂ်ႁဵတ်းၵၢၼ်လႄႈ ႁဵတ်းၵၢၼ်ၽိတ်းဢွင်ႈတီႈ ၸဵမ်ၸိူဝ်းၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ