မိူင်းတႆး – မိူင်းၶႄႇ ႁူမ်ႈၵၼ် ၸတ်းႁဵတ်းပၢင်ပွႆး လွင်ႈမိုတ်ႈၵိုဝ်းၸမ်ၸႂ် တီႈလႅၼ်ၶႅၼ်ႈၵၼ်

မိူင်းတႆး တင်းမိူင်းၶႄႇ ႁူမ်ႈၵၼ် ၸတ်းႁဵတ်းပၢင်ပွႆး ဝၢၼ်ႈပီႈမိူင်းၼွင်ႉ မိုဝ်ႈၵိုဝ်းၸမ်ၸႂ်ၵၼ် တီႈဝဵင်းမူႇၸေႊ လႅၼ် လိၼ် တႆး – ၶႄႇ ၸိုင်ႈတႆး ပွတ်းႁွင်ႇ ဝႃႈၼႆ။

ဝၼ်းတီႈ 04/10/2018 ယၢမ်းၵၢင်ၼႂ် 7 မူင်း မိူင်းတႆး တင်း မိူင်းၶႄႇ ႁူမ်ႈၵၼ်ၸတ်းႁဵတ်းပၢင်ပွႆးဝၢၼ်ႈပီႈမိူင်းၼွင်ႉ တႃႇလွင်ႈမိုတ်ႈၵိုဝ်းၸမ်ၸႂ်ၵၼ်သေဢမ်ႇၵႃး ႁူမ်ႈၵၼ်ၸတ်းႁဵတ်းပႃးပၢင်ၶႅင်ႇရူတ်ႉထိပ်ႇ(ၶီႇလႅင်) ထႅင်ႈ ဝႃႈၼႆ။

တီႈပၢင်ၶႅင်ႇရူတ်ႉထိပ်ႇၼၼ်ႉ မီးၵူၼ်းၶဝ်ႈၶႅင်ႇ 300 ပၢႆ၊ ၵူၼ်းမိူင်းတႆးပႃး 80 ပၢႆ လုၵ်ႉတၢင်းမူႇၸေႊ၊ ၼမ်ႉၶမ်း၊ လႃႈသဵဝ်ႈ၊ တႃႈမိူင်းငႅၼ်း၊ တႃႈၵုင်ႈလႄႈတႃႈလိူဝ်ႇၸိူဝ်းၼႆႉ မႃးၶႅင်ႇ။ ၼႂ်းၼၼ်ႉ ၼၢင်းယိင်း ပႃး 8 ၵေႃႉ၊ မူႇၸေႊ 3 ၵေႃႉလႄႈၼမ်ႉၶမ်း 5 ၵေႃႉ ဝႃႈၼႆ။

ၸၢႆးဢၢႆႈ ၵူၼ်းမိူင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ယၢမ်းၵၢင်ၼႂ် 7 မူင်းပၢႆၼၼ်ႉ လုၵ်ႉဢဝ်တီႈ ႁူင်းၸၢတ်ႈလူင်ၸိူဝ်ႉၸၢတ်ႈတီႈၸၢင်ႈပဵၼ်း မိူင်းၶႄႇသေ မႃးၶဝ်ႈတီႈၽၵ်းတူ ႁေႃၶမ်း ဝဵင်းမူႇၸေႊ။ သိုပ်ႇပၼ်ႇၵႂႃႇတၢင်း လွႆ တိုင်ၶမ်း ၵႂႃႇဝၢင်းႁိူဝ်းမိၼ်ၵဝ်ႇမူႇၸေႊသေ ၶိုၼ်းဢွၵ်ႇတီႈၽၵ်းတူၸၢင်ႉၽိူၵ်ႇၶဝ်ႈၶိုၼ်းမိူင်းၶႄႇ။ လိူဝ်ၼၼ်ႉ ၸုမ်းၶႅင်ႇ ရူတ်ႉထိပ်ႇ(ၶီႇလႅင်)ၼၼ်ႉ လႆႈၵႂႃႇပၼ်ႇတီႈမၢၼ်ႈႁဵဝ်း (ဢိူင်ႇ 19 ဝၢၼ်ႈ) ဢၼ်ပဵၼ်ဝၢၼ်ႈသွင်မိူင်းၼၼ်ႉ” ဝႃႈၼႆ။

ၵၢၼ်မီးၼိူဝ်လႅၼ်ၶႅၼ်ႈ (ပၼ်ႇလႅင်) ၵူၼ်းၶဝ်ႈၶႅင်ႇ တင်းမူတ်းမီး 300 ပၢႆ ဢၼ်ၶဝ်ႈတႃႈသမ်ႉ မီး 155 ၵေႃႉ။ တီႈပၢင် ၶႅင်ႇရူတ်ႉထိပ်ႇ ၵူၼ်းၸၢႆး ဢႃႇယု 40 တေႃႇ 60 (ၸႅၵ်ႇဝႆႉပဵၼ်သႅၼ်းmaster) ၽူႈၶႅင်ႇပေႉထီႉၼိုင်ႈလႆႈသူး 3,000 ယႂၼ်၊ သူးထီႉသွင်လႆႈ 2,000 လႄႈ သူးထီႉသၢမ် လႆႈ 1,000 ယႂၼ်။ ဢႃႇယု 18 တေႃႇ 60 (သမ်ႉပဵၼ်သႅၼ်းopen) ၽူႈလႆႈထီႉၼိုင်ႈ လႆႈငိုၼ်းသူး 5,000 ယႂၼ်၊ ပၢင်ၶႅင်ႇရူတ်ႉထိပ်ႇ ၼၢင်းယိင်းၵေႃႈ ၵူၼ်းမိူင်းၶႄႇပေႉမူတ်း ဝႃႈၼႆ။

ပၢင်ၶႅင်ႇရူတ်ႉထိပ်ႇ လွင်ႈမိုတ်ႈၵိုဝ်းသွင်မိူင်းၼႆႉ ၸတ်းႁဵတ်းမႃးၸဵမ်မိူဝ်ႈပီ 2000 တဵမ်။ မိူဝ်ႈၵွၼ်ႇတႄႉ မီးၶႅင်ႇတၢင်း ၵႃႈ၊ ႁွင်ႉၵႂၢမ်း ၸိူဝ်းၼႆႉၵူၺ်း။ ပူၼ်ႉမႃးပီၵၢႆၼႆႉ ၸင်ႇသႂ်ႇပႃးမႃးလွင်ႈၶႅင်ႇလဵၼ်ႈႁႅင်း။ မိူဝ်ႈၵွၼ်ႇတႄႉ ၸတ်း ႁဵတ်း ၵွၼ်ႇၼႃႈပွႆးသွၼ်းၼမ်ႉ။ ပူၼ်ႉမႃးမွၵ်ႈ 5 ပီၼၼ်ႉ ၶၢႆႉမႃးႁဵတ်းၼႂ်းလိူၼ်ဢွၵ်ႊထူဝ်ႊၿိူဝ်ႊ။ ယွၼ်ႉဝၼ်း တီႈ 1 လိူၼ် ဢွၵ်ႊထူဝ်ႊၿိူဝ်ႊၼႆႉ ပဵၼ်ဝၼ်းလုၵ်ႉၽိုၼ်ႉမိူင်းၶႄႇလႄႈ ႁဵတ်းပွႆးၵိုၵ်းၵၼ်မႃး။ ၵႃႈၸႂ်ႉၸၢႆႇၾၢႆႇမိူင်းၶႄႇဢွၵ်ႇ တင်းမူတ်း။ လိူဝ်သေမီးၵၢၼ်ၶႅင်ႇရူတ်ႉထိပ်ႇယဝ်ႉယင်းမီးပႃး ၵၢၼ်ၼႄၶူဝ်းၼုင်ႈတၢင်းဝႆ ၾိင်ႈထုင်းၽႂ်မၼ်း၊ ၼႄ တၢင်းႁၢင်ႈလီၵူႈလွင်ႈလွင်ႈ၊ မီးပႃးလွင်ႈၵႃႈလွင်ႈဝႅၼ်ပၢင်မူၼ်ႈသိူဝ်း ၸိူဝ်းၼႆႉ ဝႃႈၼႆ။