ၾၢႆႇပႃႇမႆႉလွမ်ႉႁူဝ်ႉလိၼ်လူင်ပွင်ၸိုင်ႈ ဢဝ်ပႃးလိၼ်ပႃႇမႆႉၵူၼ်းဝၢၼ်ႈတဝ်း လႄႈ ဝၢၼ်ႈပွၵ်ႉ ၼႂ်းၸႄႈဝဵင်းၵဵင်း တုင် တႃႇ 300 ဢေႊၶိူဝ်ႊပၢႆ။ လွင်ႈၼႆႉ ၵူၼ်းဝၢၼ်ႈဢမ်ႇႁၢၼ်ႉၸႂ်ၽွမ်ႉၸွမ်း ဝႃႈၼႆ။

ဝၼ်းတီႈ 03/10/2018 ယၢမ်းဝၢႆးဝၼ်း မွၵ်ႈ 2 မူင်း ၵူၼ်းဝၢၼ်ႈတဝ်း တင်း ၽူႈၵွၼ်းၸႄႈဝဵင်းၵဵင်းတုင် ႁူပ်ႉဢုပ်ႇ ၵၼ် တီႈလုမ်းၽူႈၵွၼ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ။ ၵူၼ်းဝၢၼ်ႈတုၵ်းယွၼ်းၶိုၼ်းပႃႇမႆႉ၊ ပႃႇၾိုၼ်းၵူၼ်း ဝၢၼ်ႈ ဢၼ်လူင်ပွင်ၸိုင်ႈလွမ်ႉႁူဝ်ႉယိုတ်းဢဝ်ၵႂႃႇ။

ၵူၼ်းဝၢၼ်ႈတဝ်း ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈပီ 2000 ၼၼ်ႉ ႁဝ်းၶႃႈတၢင်ႇၵႂႃႇတီႈ ၾၢႆႇပႃႇမႆႉ တီႈလိၼ်ထိူၼ်ႇ ဝၢၼ်ႈတဝ်းႁဝ်းၶႃႈၼၼ်ႉ တင်းမူတ်း မီး 679.50 ဢေႊၶိူဝ်ႊ။ ႁႂ်ႈၶဝ်လူင်းတႅၵ်ႈပၼ် ၼႃႈ လိၼ်။ ၵမ်းၼႆႉ ထိုင်မႃးမိူဝ်ႈလဵဝ် ၽိူဝ်ႇၶဝ်လူင်းပၼ်တင်းမူတ်း 420 ဢေႊၶိူဝ်ႊၵူၺ်း ၵိုတ်းထႅင်ႈ 220 ဢေႊၶိူဝ်ႊပၢႆ ၼၼ်ႉ ၶဝ်ဝႃႈ မၼ်းၶဝ်ႈပဵၼ်ၶွင်ၾၢႆႇပႃႇမႆႉၼမ်ႉလူၺ် ဢၼ်ၶဝ်မႃးလွမ်ႉႁူဝ်ႉဢဝ်ၼႆႉ ပႃးၼႃးလိၼ်ၵူၼ်းဝၢၼ်ႈပွၵ်ႉ 100 ဢေႊၶိူဝ်ႊ။ ဢၼ်တေႃႇၼႃႈၵၼ်တင်းဝၢၼ်ႈတဝ်း။ ၵွပ်ႈၼၼ်လႄႈ လိၼ်ႁဝ်းၶႃႈ သွင်ဝၢၼ်ႈပႃးၵႂႃႇ 300 ဢေႊၶိူဝ်ႊပၢႆ” ဝႃႈၼႆ။

ၽူႈယႂ်ႇၵူၼ်းလူင်ၵေႃၵမ်ၵၢၼ်ဝၢၼ်ႈတဝ်းလႄႈ ၽူႈၵွၼ်းၸႄႈဝဵင်း ဢုပ်ႇၵၼ်ထဵင်ၵၼ်တင်းႁိုင်။ ၵူၼ်းဝၢၼ်ႈၶႂ်ႈၵႂႃႇ ဢဝ်ၾိုၼ်းၵေႃႈ ၽူႈၵွၼ်းၸႄႈဝဵင်း ဢမ်ႇဢဝ်ပုၼ်ႈၽွၼ်းပၼ်။

ၵူၼ်းဝၢၼ်ႈတဝ်း လၢတ်ႈၼႄဝႃႈ “ ယူႇတီႈႁဝ်းၶႃႈ ၵူၼ်းမိူင်း ၶႂ်ႈလၢတ်ႈၶႂ်ႈပဵၼ်ၼၼ်ႉ ၽူႈၵွၼ်းၸႄႈဝဵင်းမၼ်း ဢမ်ႇ ဢဝ်ၵႂၢမ်းႁဝ်း ႁဝ်းဢမ်ႇပွင်ႇၸႂ် ဢၼ်ပိူၼ်ႈမႃးလွမ်ႉႁူဝ်ႉ ဢဝ်ၵႂႃႇတီႈလိၼ်ၸိူဝ်းၼၼ်ႉ ႁဝ်းၶႃႈမီးတီႈလိၼ် လၵ်း ထၢၼ်မၼ်းယူႇ ႁဵတ်းသင်တေႃႈလဵဝ် ထိုင်မႃး 2018 ၼႆႉ သူၸဝ်ႈသမ်ႉ ပွႆႇပၼ်ပိူၼ်ႈမႃးလွမ်ႉႁူဝ်ႉဢဝ် မၼ်းပဵၼ် ယွၼ်ႉသင်၊ မၼ်းတွပ်ႇလၢတ်ႈဝႃႈတႄႉ မၼ်းဢမ်ႇၶဝ်ႈၸႂ် ဢမ်ႇႁူႉၼႆဝႃႇ။ မၼ်းဝႃႈ သင်ပိူၼ်ႈၵႂႃႇ လွမ်ႉႁူဝ်ႉ ယဝ်ႉ ပၵ်းလၵ်းယဝ်ႉ သူတိုၼ်းတေဢမ်ႇလႆႈၵႂႃႇယႃႉၵႂႃႇတဝ် ၼႆဝႃႇ။ မႆႉၼၼ်ႉ ႁဝ်းၶႃႈ ၵူၼ်းဝၢၼ်ႈ လုမ်းလႃးမႃး ပီယၢဝ်း ၶၢဝ်းႁိုင် ႁဝ်းၶႃႈၵႂႃႇၾၼ်းဢဝ်ဢမ်ႇလႆႈႁႃႉ။ မၼ်းၵေႃႈလၢတ်ႈ လွင်ႈၼႆႉ သူၶဝ်လူဝ်ႇဢုပ်ႇၵၼ်တင်း ၾၢႆႇပႃႇမႆႉ၊ တင်းၾၢႆႇၵူၼ်းလွမ်ႉႁူဝ်ႉမၼ်းၼႆၵူၺ်း ဢမ်ႇမီးလွင်ႈႁပ်ႉပုၼ်ႈၽွၼ်းသင်” ဝႃႈၼႆ။

ထိူၼ်ႇတီႈလိၼ် ၵူၼ်းဝၢၼ်ႈတဝ်းၼႆႉ ၵူၼ်းဝၢၼ်ႈ လႆႈၸႂ်ယႂ်ႇ ပိုင်ႈဢိင်မႃး ပီယၢဝ်းၶၢဝ်းႁိုင် ၸဵမ်ပၢၼ်ပူႇမွၼ်ႇ ၼၢႆး ယႃႈမႃး။ ၵူၼ်းဝၢၼ်ႈၵႂႃႇ တႅပ်းၾိုၼ်းဢဝ်မႃးၸႂ်ႉ တႃႇတူမ်ႈႁုင်ထူဝ်ႇၼဝ်ႈ။ ပေႃးဢမ်ႇမီးပႃႇၼႆႉ ၵူၼ်းဝၢၼ်ႈႁႃၾိုၼ်း ယၢပ်ႇ ၵွပ်ႈၼၼ် ပီ 2000 တဵမ်ၼၼ်ႉ ၵူၼ်းဝၢၼ်ႈ တၢင်ႇထိုင် ၾၢႆႇပႃႇမႆႉသေ ႁႂ်ႈတႅၵ်ႈၼႃႈ လိၼ်မၵ်းမၼ်ႈပၼ်၊ ႁဵတ်းႁၢင်ႈၽႅၼ်ႇလိၼ် ႁပ်ႉႁွင်းပၼ် ၵူၺ်းၵႃႈ ၾၢႆႇပႃႇမႆႉဢမ်ႇသူၼ်ၸႂ် ဢမ်ႇလူင်းတႅၵ်ႈပၼ်။

မိူဝ်ႈႁၢင်လိူၼ်သႅပ်ႊထႅမ်ႊၿိူဝ်ႊ 2018 ၼႆႉမႃး ၾၢႆႇပႃႇမႆႉၶဝ် လႆႈမႃးတႄႇလွမ်ႉႁူဝ်ႉၵႂႃႇ။ ဢၼ်ၶဝ်တေလွမ်ႉႁူဝ်ႉ ဢဝ် ၵႂႃႇၼၼ်ႉ တင်းမူတ်းၵႂၢင်ႈတေမီး 6 လၵ်းပၼ်ႇမူၼ်းၼႂ်းၵႄႈဝၢၼ်ႈတဝ်းလႄႈ ဝၢၼ်ႈပွၵ်ႉ။ ၼႂ်းလိၼ် 6 လၵ်းပၼ်ႇ မူၼ်းၼၼ်ႉ ပႃးလိၼ်ထိူၼ်ႇ လႄႈ တူင်ႈၼႃး ၵမ်ႈၽွင်ႈ ၶွင်ၵူၼ်းဝၢၼ်ႈပွၵ်ႉ 100 ဢေႊၶိူဝ်ႊပၢႆလႄႈ ပႃးလိၼ်ထိူၼ်ႇ ၵူၼ်းဝၢၼ်ႈတဝ်း 220 ဢေႊၶိူဝ်ႊပၢႆ ဝႃႈၼႆ။