ၸဝ်ႈၼႃႈတီႈမိူင်းၶႄႇ ၶုတ်းလိၼ်ၶႂၢင်သဵၼ်ႈတၢင်း 2 တီႈ ၾင်ႇမိူင်းၶႄႇ ဢၼ်တေႃႇၼႃႈၽၵ်းတူၶၢမ်ႈမိူင်းတႆး – ၶႄႇ တီႈမၢၼ်ႈႁဵဝ်း၊ ႁဵတ်းႁႂ်ႈၵူၼ်းမိူင်းၵႂႃႇမႃးႁႃၵၼ် ႁူပ်ႉလွင်ႈယၢပ်ႇၽိုတ်ႇ။
ဝၼ်းတီႈ 02/10/2018 ၸဝ်ႈၼႃႈတီႈမိူင်းၶႄႇ ၶုတ်းလိၼ်ၶႂၢင်သဵၼ်တၢင်း 2 တီႈ လႅၼ်ၶႅၼ်ႈ မိူင်းတႆး တင်း မိူင်းၶႄႇ တီႈမၢၼ်ႈႁဵဝ်း တင်း ဝၢၼ်ႈဢဵမ်ႇၸဵမ်ႈ တီႈၼိုင်ႈ။ တီႈဝၢၼ်ႈၵဝ်ႈၵူတ်ႉ တင်း ဝၢၼ်ႈၵွင်းသွင် တီႈၼိုင်ႈ။
ၸၢႆးဢၢႆႈယီႈ ၵူၼ်းမိူင်း မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တီႈမၢၼ်ႈႁဵဝ်းၼၼ်ႉ မီးၽၵ်းတူၶဝ်ႈဢွၵ်ႇဢၼ်ၼိုင်ႈ။ ဢမ်ႇၸႂ်ႈၽၵ်းတူမိူင်းဢၼ်ပဵၼ်တၢင်းၵၢၼ်သေတႃႉ တွၼ်ႈတႃႇၵူၼ်းမိူင်းၵႂႃႇမႃးႁႃၵၼ်လႆႈငၢႆႈၼႆသေ ၽၵ်းတူၼႆႉ ပိုတ်ႇပၼ်တႄႇဢဝ် 8 မူင်း ၵၢင်ၼႂ် ထိုင် 4 မူင်းၶိုင်ႈဝၢႆးဝၼ်း။ ပဵၼ်တႃႇၵူၼ်းမိူင်းတင်းသွင်ၾင်ႇလႆႈၵႃႉၶၢႆထူဝ်ႇ၊ ၽၵ်း ယိူဝ်ႈၼၢင်းၶဵဝ် ၸိူဝ်းၼႆႉ။ ယွၼ်ႉပိူဝ်ႈၶုတ်းလိၼ်ၶႂၢင်သဵၼ်ႈတၢင်းသေ ၵူၼ်းမိူင်းၵႂႃႇမႃးယၢပ်ႇ။ ၵူၺ်းၵႃႈ သဵၼ်ႈတၢင်း လပ်ႉဢၼ်ရူတ်ႉၵႃးလၵ်ႉတၢင်ႇမႆႉ ၶဝ်ႈဢွၵ်ႇၵႂႃႇမႃးတၢင်ႇတီႈသမ်ႉ ၶဝ်ဢမ်ႇပိၵ်ႉ” ဝႃႈၼႆ။
ၸၢႆးသၢမ် ၵူၼ်းဝၢၼ်ႈၵွင်းသွင် (ၾင်ႇမိူင်းၶႄႇ) လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈၼႃႈတီႈၶႄႇ ဢၼ်ပဵၼ်ပႃႇတီႇ ၵၢၼ် မိူင်း ၼႂ်းပိုၼ်ႉတီႈၶဝ်မႃးႁၢမ်ႈႁဝ်း ဢမ်ႇပၼ်ၵူၼ်းမိူင်းၶၢမ်ႈၶဝ်ႈၵႂႃႇၾင်ႇမိူင်းတႆး။ ၶဝ်ဝႃႈတၢင်းၾၢႆႇပုၼ်ႉ ၵႆႉၵႆႉ ပဵၼ်ပၢင်တိုၵ်းလႄႈ ပေႃးၵႂႃႇသေ ၵႂႃႇပဵၼ်သေၸိူဝ်ႉသေပိူင် တေဢမ်ႇႁပ်ႉပုၼ်ႈၽွၼ်းၼႆဝႃႇ။ ဢၼ် မႃးၶုတ်းတၢင်း သေ ပိၵ်ႉပႅတ်ႈတႄႉ ပဵၼ်တပ်ႉပႂ်ႉလႅၼ်လိၼ်တၢင်းမိူင်းၶႄႇၼႆႉ” ဝႃႈၼႆ။
မၢၼ်ႈႁဵဝ်း တင်း ဝၢၼ်ႈၵဝ်ႈၵူတ်ႉသမ်ႉ ယူႇတၢင်းၾင်ႇမိူင်းတႆး ၸႄႈဝဵင်းမူႇၸေႊ၊ ဝၢၼ်ႈဢဵမ်ႇၸဵမ်ႈ တင်း ဝၢၼ်ႈၵွင်း သွင် သမ်ႉယူႇတၢင်းၾင်ႇမိူင်းၶႄႇ ဝႃႈၼႆ။
လႅၼ်လိၼ် တႆး – ၶႄႇ ၸႄႈဝဵင်းမူႇၸေႊၼႆႉ ၽၵ်းတူလႅၼ်လိၼ် ဢၼ်ပဵၼ်တၢင်းၵၢၼ် မီးသၢမ်ဢၼ် မိူၼ်ၼင်ႇ ၽၵ်းတူႁေႃၶမ်း တီႈၼိုင်ႈ၊ ၽၵ်းတူမၢၼ်ႈဝဵင်းတီႈၼိုင်ႈလႄႈ ၽၵ်းတူ(ၸၢင်ႉၽိူၵ်ႇ) တီႈၼိုင်ႈ။ လိူဝ်ၼၼ်ႉ ၽၵ်းတူ ဢၼ်ဢမ်ႇပဵၼ်တၢင်းၵၢၼ် ဢၼ်လၵ်ႉလွမ်ၶဝ်ႈဢွၵ်ႇၵေႃႈမီးတင်းၼမ်။
