ၶွမ်ႊမတီႊၾၢႆႇလူလွမ်ထၢတ်ႈမင်ႇၵလႃႇ ၸုမ်ႈမိူင်း ဢွၼ်ႁူဝ်ၼမ်းၼႃႈၵူၼ်းမိူင်း သိူဝ်ႇသဵၼ်ႈတၢင်းၶိုၼ်ႈၸူးထၢတ်ႈ ၵွင်းမူး ၼိူဝ်လွႆသၢမ်သိပ်း ဢၼ်ၸဝ်ႈသိလ်ထမ်းဝုၼ်းၸုမ်ႉ ဢွၼ် ႁူဝ်ၵေႃႇသၢင်ႈလူႇတၢၼ်း တေဢၢၼ်းသၢင်ႈ ႁႂ်ႈ ယဝ်ႉ ၼႃႈဢွၵ်ႇဝႃႇသႃ ဝႃႈၼႆ။
ၶူဝ်လႆၶိုၼ်ႈၸူးထၢတ်ႈ မင်ႇၵလႃႇၸုမ်ႈမိူင်း ဢၼ်မီးဝႆႉတီႈၼိူဝ်လွႆသၢမ်သိပ်း ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈ မူႇၸေႊ ၸိုင်ႈတႆးပွတ်းႁွင်ႇၼၼ်ႉ တၢင်းယၢဝ်း မီး 6,125 ထတ်း။ တႄႇၵေႃႇသၢင်ႈမႃး မိူဝ်ႈဝၼ်းတီႈ 07/07/2018 တေဢၢၼ်းသၢင်ႈႁႂ်ႈယဝ်ႉ ၼႃႈဢွၵ်ႇဝႃႇသႃၼႆႉ ဝႃႈၼႆ။
ၽူႈၶဝ်ႈၸုမ်း ၶွမ်ႊမတီႊ ထၢတ်ႈမင်ႇၵလႃႇၸုမ်ႈမိူင်း တီႈလွႆသၢမ်သိပ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၶူဝ်လႆ ၼၼ်ႉ တေႃႈလဵဝ်ႁဵတ်းယဝ်ႉၵႂႃႇ မွၵ်ႈ 3 ႁဵင်ထတ်းပၢႆယဝ်ႉ။ ဢၢၼ်းဝႆႉႁႂ်ႈယဝ်ႉၼႃႈဢွၵ်ႇဝႃႇၼႆသေတႃႉ သင်ဢမ်ႇယဝ်ႉ ၸိုင် တေသိုပ်ႇႁဵတ်းၵႂႃႇမွၵ်ႈဝၢႆးဢွၵ်ႇဝႃႇလႅပ်ႈတေယဝ်ႉလႆႈယူႇ။ တေႃႈလဵဝ် ဢၼ်လႆႈၸႂ်ႉၸၢႆႇၵႂႃႇယဝ်ႉ တင်းမူတ်း 450 သႅၼ်ပျႃးပၢႆ။ တေႃႇပေႃးယဝ်ႉတူဝ်ႈ လၢမ်းၶၢတ်ႈဝႆႉတႄႉ တေသဵင်ႈမွၵ်ႈႁိမ်း 7 ပၢၵ်ႇသႅၼ်ပျႃး” ဝႃႈၼႆ။
ထၢတ်ႈမင်ႇၵလႃႇၸုမ်ႈမိူင်း တီႈၼိူဝ်လွႆသၢမ်သိပ်းၼႆႉ မီးၼႂ်းၸႄႈဝဵင်းၵူတ်ႉၶၢႆ ယၢၼ်ၵႆဝဵင်းမွၵ်ႈ 5 လၵ်း။ သဵၼ်ႈ တၢင်းၶူဝ်လႆဢၼ်ၵႆႇၶိုၼ်ႈၼိူဝ်လွႆၼၼ်ႉ တႄႇဢဝ်တိၼ်လွႆ ယၢၼ်သဵၼ်ႈတၢင်းလူင်မိူင်းႁူမ်ႈတုမ် ဝဵင်းလိူဝ်ႇ – မူႇၸေႊ မွၵ်ႈ 400- 500 မီႊတိူဝ်ႊ တႄႇၵေႃႇသၢင်ႈၶိုၼ်ႈၵႂႃႇ။ ယၢမ်းလဵဝ် ၵူၼ်းမႃးၸွႆႈတေႃႉမၢၵ်ႇဢုတ်ႇဢမ်ႇပေႃးမီး ယွၼ်ႉပဵၼ်ၶၢဝ်းၾူၼ် ဝႃႈၼႆ။
ၶွမ်ႊမတီႈ ထၢတ်ႈမင်ႇၵလႃႇ ၸုမ်ႈမိူင်း လွႆသၢမ်သိပ်း သိုပ်ႇလၢတ်ႈဝႃႈ “ လွင်ႈယၢပ်ႇၽိုတ်ႇမၼ်းမီး လွင်ႈတေႃႇသၢႆး၊ တေႃႉလိၼ်၊ တေႃႉမၢၵ်ႇဢုတ်ႇ ယွၼ်ႉဝႃႈ ယၢမ်းလဵဝ် ပဵၼ်ၶၢဝ်းၾူၼ်လႄႈ ဢမ်ႇမီးၵူၼ်းၶိုၼ်ႈၵႃႈႁိုဝ်။ ယွၼ်ႉၼၼ် လႄႈ ယွၼ်းတၢင်းၸွႆႈထႅမ် ထိုင် ပီႈၼွင်ႉၵူၼ်းမိူင်း ဢွၼ်ၵၼ်မႃးဢဝ်ၵုသူလ်ၸွမ်းၵၼ်ထႅင်ႈၼႆ တုၵ်း သူၼ်းထိုင် ႁႂ်ႈလႆႈႁူမ်ႈၵၼ် ႁဵတ်းၵႃႇယၵုသူလ်ၸွမ်းၵၼ်ထႅင်ႈ” ဝႃႈၼႆ။
ပူၼ်ႉမႃး ဝၼ်းတီႈ 27/06/2018 ဝၼ်းၶဝ်ႈဝႃႇသႃ ယၢမ်းၵၢင်ၼႂ် 7 မူင်း ထိုင် 12 မူင်း ၵၢင်ဝၼ်း ၸဝ်ႈတူၼ်ၶူး ၸဝ်ႈသုၶမ်း၊ ၸဝ်ႈတူၼ်ၶူး ၺႃႇၼေႃးၽႃႇသ ဝိႁၢရ်ၵၢင်ဝဵင်း ၼမ်ႉလၼ်ႈလႄႈ ၸဝ်ႈတူၼ်ၶူး တီႈဝဵင်းၵူတ်ႉၶၢႆ ဢွၼ်ႁူဝ်ၼမ်း ၼႃႈတၵ်ႉၵႃႇသတ်ႉထႃး တီႈၸမ်/ၵႆသေ တၢင်ႇထီးထၢတ်ႈမင်ႇၵလႃႇ ၸုမ်ႈမိူင်း။
မိူဝ်ႈလိူၼ်မေႊၼၼ်ႉ ၸဝ်ႈသိလ်ထမ်းဝုၼ်းၸုမ်ႉ ဢွၼ်ႁူဝ်တၵ်ႉၵႃႇသတ်ႉထႃးသေ တႄႇၵွင်းမူး တီႈၼိူဝ်လွႆသၢမ် သိပ်းဝႆႉသူႇၼိုင်ႈ မီးပီႈၼွင်ႉၸၢဝ်းတႆး လႄႈ ဢိၵ်ႇထႅင်ႈလၢႆၸၢဝ်းၶိူဝ်း ႁူမ်ႈၵၼ်တေႃႉမၢၵ်ႇဢုတ်ႇ၊ သၢႆးလႄႈ ၼမ်ႉ ၶိုၼ်ႈလွႆၼၼ်ႉ ပေႃးဢမ်ႇထၢတ်ႇ။ ၽွင်းၶၢဝ်းၾူၼ်ႁႃႇယႂ်ႇၼႆႉတႄႉ ဢမ်ႇပေႃးမီးၵူၼ်းၶိုၼ်ႈလွႆ ဝႃႈၼႆ။
