ၾူၼ်တူၵ်းႁၢဝ်ႈႁႅင်းသေ ၼမ်ႉၾူၼ်လႆၼွင်းထူမ်ႈ တီႈၶူင်ႈ/ ယၢၼ်း တင်းၼမ်လၢႆ ၼႂ်းၸႄႈဝဵင်းတူၼ်ႈတီး ယွၼ်ႉၼမ်ႉ ႁွင်ႈ ၸွမ်းၼႂ်းၶူးၼႂ်းဝဵင်းတၼ် ၼမ်ႉလႆလူင်းဢမ်ႇတၼ်း ဝႃႈၼႆ။

ဝၼ်းတီႈ 01/10/2018 ယၢမ်းဝၢႆးဝၼ်း မွၵ်ႈ 1 မူင်း ထိုင် 4 မူင်းၼၼ်ႉ ၾူၼ်တူၵ်းႁႃႇယႂ်ႇ ၼႂ်းၸႄႈဝဵင်းတူၼ်ႈတီး ၸိုင်ႈ တႆးပွတ်းၸၢၼ်း ယွၼ်ႉၾူၼ်တူၵ်းႁႃႇယႂ်ႇသေ ၼမ်ႉထူမ်ႈတီႈပွၵ်ႉၸိူဝ်းမီးၾၢႆႇတႅမ်ႇ မိူၼ်ၼင်ႇ ၾၢႆႇတၢင်းႁူင်းယႃပတ မျႃး၊ ႁၢင်ႈမႃႉမိၼ်းယူၵ်ႉ၊ ပွၵ်ႉမေႇၽိဝ်ႇ၊ သဵၼ်ႈတၢင်းလူင် ၵႂႃႇဢေးတႃႇယႃႇ ၸဵမ်ၸိူဝ်းၼႆႉ ဝႃႈၼႆ။

ၵူၼ်းမိူင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ယွၼ်ႉႁွင်ႈၼမ်ႉတၼ်၊ ၼမ်ႉဢမ်ႇလႆလႄႈ ၼမ်ႉၸင်ႇထူမ်ႈ။ မိူဝ်ႈပူၼ်ႉ မႃးၵေႃႈယၢမ်ႈထူမ်ႈယူႇ။ ၵူၺ်းၵႃႈ ဢမ်ႇထူမ်ႈႁႅင်းထၢၼ်ႇၼႆႉ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ မၢင်တီႈၼမ်ႉထူမ်ႈသုင် ႁႅင်းၼႃႇ ရူတ်ႉၵႃးပေႃးၸူမ်။ မၢင်တီႈရူတ်ႉၶိူင်ႈ လွင်ႈပႃးၸွမ်းၼမ်ႉၵေႃႈမီး။ လိူဝ်ၼၼ်ႉ သဵၼ်ႈတၢင်းလုၵ်ႉတၢင်း တူၼ်ႈတီး လူင်းၵႂႃႇတၢင်း ဝဵင်းမႂ်ႇဢေးတႃႇယႃႇၼၼ်ႉၵေႃႈ မၢင်တီႈတူၼ်ႈမႆႉလူမ်ႉ တဵင်တၢင်းၼမ်ႉလွႆလေႃႇလူင်း ႁဵတ်းႁႂ်ႈသဵၼ်ႈတၢင်းလူႉၵွႆၵေႃႈမီး ဝႃႈၼႆ။

ယွၼ်ႉၼမ်ႉထူမ်ႈလႄႈ လွင်ႈလူႉသုမ်းမီးယူႇသေတႃႉ ဢမ်ႇပႆႇလႆႈႁူႉလွင်ႈတႅတ်ႈတေႃးလီဝႃႈ လွင်ႈလူႉသုမ်းမီးၵႃႈႁိုဝ် ဝၼ်းတီႈ 2 လႄႈ ဝၼ်းတီႈ 3 ၾူၼ်သိုပ်ႇတူၵ်းထႅင်ႈ ၼႂ်းၸိုင်ႈတႆးပွတ်းၸၢၼ်း လၢႆလၢႆဝဵင်း ၺႃးၼမ်ႉထူမ်ႈ။

ၾူၼ်ႁႃႇၼႆႉ ပဵၼ်ၾူၼ်တူၵ်းႁႃႇယႂ်ႇလိူဝ်ပိူၼ်ႈ တွၼ်ႈတႃႇၶၢဝ်းႁိုဝ်ႉ ၶၢဝ်းၾူၼ် ပီ 2018 တီႈဝဵင်းလူင်တူၼ်ႈတီးၼႆႉ။ မိူၼ်ၼၼ် ၼင်ႇၵဝ်ႇ တၢင်းပွတ်း ၵဵင်းတုင် ၵေႃႈၾူၼ်တူၵ်းႁႅင်း ၼမ်ႉထူမ်ႈ တီႈၶူင်ႈယၢၼ်း တင်းၼမ်ၵၼ်ယူႇ ဝႃႈၼႆ။