ၸဝ်ႈၼႃႈတီႈပလိၵ်ႈထႆး ၶဵင်ႈၶႅင်ၵၢၼ်ၵူတ်ႇထတ်း ၸွမ်းတီႉၺွပ်းၵူၼ်းၸိူဝ်းႁဵတ်းႁၢႆႉႁႅင်းၵၢၼ်ယၢၼ်မိူင်း(တႆး)မၢတ်ႇၸဵပ်း ႁၢဝ်ႈႁႅင်းလႄႈ ၶႃႈႁႅမ်ၸဝ်ႈၶွင်ႁွင်ႈၶၢတ်ႈပႃးထႅင်ႈ တီႈဝဵင်းၵဵင်းမႆႇ ၸိုင်ႈထႆး။

ဝၼ်းတီႈ 28/09/2018 ၶၢဝ်းယၢမ်း 23:50 မူင်းႁႅင်းၵၢၼ်ယၢၼ်မိူင်း(တႆး)လႄႈ ပီႈၼွင်ႉၼႂ်းပိုၼ်ႉတီႈ (ထႆး)ဢၼ်ၶၢတ်ႈ ႁွင်ႈ ယူႇတီႈလဵဝ်ၵၼ်၊ မီးလွင်ႈၽိတ်းမေႃးၵၼ် တီႈႁွင်ႈၶၢတ်ႈ ဢၼ်မီးတီႈ ဢိူင်ႇသၼ်ၼမဵင်း ၸႄႈဝဵင်းသၼ်သၢႆး ၸႄႈတွၼ်ႈ ၵဵင်းမႆႇ ။ ၾၢႆႇၵူၼ်းၼႂ်းပိုၼ်ႉတီႈ တေႃႇသူႈဢမ်ႇပေႉလႄႈ သိုပ်ႇၾူၼ်းႁွင်ႉဢူၺ်းၵေႃႉမႃးၸွႆႈသေ ႁဵတ်းႁႂ်ႈႁႅင်းၵၢၼ်ယၢၼ်မိူင်းလႆႈႁပ်ႉမၢတ်ႇၸဵပ်းႁၢဝ်ႈႁႅင်း 2 ၵေႃႉ ၊ ၾၢႆႇၸဝ်ႈၶွင်ႁွင်ႈၶၢတ်ႈ ဢွၵ်ႇမႃးႁၢမ်ႈလႄႈ ထုၵ်ႇၺႃးၵူၼ်းၼုမ်ႇၸၢဝ်းထႆး ပေႃႉထုပ်ႉတေႃႇပေႃးတၢႆ ၼႆယဝ်ႉ။

ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99 MHz လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၸၢတ်ႈပၢၼ်ႁႅင်း ၵၢၼ်ယၢၼ်မိူင်း ဢၼ်ဝႃႈၼၼ်ႉ ႁဝ်းဢမ်ႇႁဵတ်းတၢင်းၽိတ်းသင် ပိူၼ်ႈပေႃးၶတ်းတႃႁဝ်းယူႇယဝ်ႉ။ ပေႃးႁဝ်းႁဵတ်းၽိတ်းၵႂႃႇသေဢိတ်းၼိုင်ႈၵူၺ်းၵေႃႈ ပိူၼ်ႈယိုင်ႈၶႅၼ်းၸင်းႁဝ်းယဝ်ႉ၊ ႁဝ်းၶႃႈပဵၼ်ႁႅင်းၵၢၼ် ယၢၼ်မိူင်းဢၼ်ဝႃႈၼၼ်ႉယႃႇယူႇလူင်တူဝ် လိုမ်းၶိင်း ႁႂ်ႈမေႃၾၢင်ႉယူႇၾၢင်ႉၵိၼ် ၶတ်းၸႂ်ႁဵတ်းၵၢၼ်ႁႃငိုၼ်း ႁႃတၢင်းႁူႉသေ ၶိုၼ်းမိူဝ်းပူၵ်းပွင် ဝၢၼ်ႈၵိူတ်ႇမိူင်းၼွၼ်း ႁဝ်းၶိုၼ်း” ဝႃႈၼႆ။

မိူဝ်ႈလဵဝ်ယူႇတီႈၸဝ်ႈၼႃႈတီႈပလိၵ်ႈသေ ၸွမ်းႁႃတူဝ်ၵူၼ်းၸိူဝ်းႁဵတ်းၽိတ်းၼၼ်ႉ မႃးပၼ်တူတ်ႈ တၢမ်ႇၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီး။ ၶၢတ်ႈလၢမ်းဝႃႈၵူၼ်း ၸိူဝ်းႁဵတ်းၽိတ်း တေပၢႆႈယူႇဝႆႉ ၸွမ်းလႅၼ်လိၼ် ဝႃႈၼႆ။