သိုၵ်းလူင်ပွင်ၸိုင်ႈမၢၼ်ႈ ၶဝ်ႈၵူတ်ႇထတ်းဝႂ်မုင်ႉႁေႃႁိူၼ်း ၵူၼ်းမိူင်းမူႇၸေႊ ႁဵတ်းႁႂ်ႈၵူၼ်းမိူင်း တူၵ်းၸႂ်ၵူဝ်ႁႄ။
ဝၼ်းတီႈ 02/10/2018 ယၢမ်းၵၢင်ၼႂ် 6 မူင်း ထိုင် 12 မူင်းၵၢင်ဝၼ်း သိုၵ်းလူင်ပွင်ၸိုင်ႈမၢၼ်ႈ ဢၼ်ပၵ်းဝႆႉတီႈ တႃႈမိူင်းငႅၼ်း တင်း ၼမ်ႉပွင်ႈ ၼႂ်းၸႄႈဝဵင်းလႃႈသဵဝ်ႈ 2 တပ်ႉၵွင်ၼၼ်ႉ ႁူမ်ႈၵၼ်သေ ၶဝ်ႈၵူတ်ႇထတ်း မုင်ႉႁေႃ ႁိူၼ်း ၵူၼ်းဝၢၼ်ႈၼမ်ႉဢုမ် ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၵူၼ်းဝၢၼ်ႈၼမ်ႉဢုမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ သိုၵ်းမၢၼ်ႈ ၶိုၼ်ႈႁိူၼ်းလူင်းႁိူၼ်း ၶဝ်ႈၵူတ်ႇထတ်း ဝႂ်မုင်ႉႁေႃႁိူၼ်း ႁဵတ်းသင် ပဵၼ်လွင်ႈသင် ယွၼ်ႉသင် ဢၼ်ဝႃႈၼၼ်ႉၵေႃႈ ၶဝ်ဢမ်ႇဝႃႈသင်၊ ဢမ်ႇၼႄလွင်ႈတၢင်းသင်။ တီႈတႄႉမၼ်း ၶဝ်လူဝ်ႇ လႆႈလၢတ်ႈၼႄလွင်ႈတၢင်းၸႅင်ႈလႅင်း ဝႃႈၶဝ်မႃးၵူတ်ႇ ထတ်းလွင်ႈသင်” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၵူၼ်းဝၢၼ်ႈ တူၵ်းၸႂ်ၵူဝ်ႁႄ မၢင်ၸိူဝ်း ဢမ်ႇႁတ်းဢွၵ်ႇႁိူၼ်းယေးၵေႃႈမီး ဝႃႈၼႆ။
ၵူၼ်းဝၢၼ်ႈ သိုပ်ႇလၢတ်ႈဝႃႈ “ သိုၵ်းဢၼ်ဝႃႈၼၼ်ႉ ႁဝ်းၶႃႈၵူၼ်းမိူင်း တိုၼ်းၵူဝ်ယူႇယဝ်ႉၶႃႈ။ မၢင်ၵေႃႉ ဢမ်ႇႁတ်းဢွၵ်ႇ ႁိူၼ်းၵႂႃႇမႃး။ ယွၼ်ႉပိူဝ်ႈဢမ်ႇႁူႉလွင်ႈတၢင်းမၼ်း ၸင်ႇဢွၼ်ၵၼ်ၵူဝ်” ဝႃႈၼႆ။
မိူဝ်ႈပူၼ်ႉမႃး ဢမ်ႇႁိုင်သင်ၼၼ်ႉ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းၵႄႈ ဝၢၼ်ႈၵွင်းၶႃး တင်း ဝၢၼ်ႈၼမ်ႉဢုမ်။ ဝၢႆးသေပဵၼ်ပၢင်တိုၵ်းယဝ်ႉၵႂႃႇၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၶဝ်ႈၵူတ်ႇထတ်း ဝႂ်မုင်ႉႁေႃႁိူၼ်း ၵူၼ်းဝၢၼ်ႈၼမ်ႉဢုမ် ဝႃႈၼႆ။
ၼွၵ်ႈလိူဝ် ၵူတ်ႇထတ်းဝႂ်မုင်ႉႁေႃႁိူၼ်းတႄႉ ဢမ်ႇမီးလွင်ႈႁၢမ်ႈႁႄႉသင်ၼင်ႇၵဝ်ႇ ၵူၼ်းဝၢၼ်ႈၼမ်ႉဢုမ် ထၢင်ႇႁၢင်ႈၵႂႃႇ မႃးၶိုၼ်းမိူၼ်ၵဝ်ႇယူႇ ဝႃႈၼႆ။
ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈမၢင်ၵေႃႉထတ်းသၢင်ဝႃႈ “ ၵူတ်ႇထတ်းဝႂ်မုင်ႉႁေႃႁိူၼ်းၼႆႉတႄႉ လူဝ်ႇပဵၼ်ၵၢၼ်ၸဝ်ႈ ၼႃႈတီႈၵူတ်ႇၵူၼ်းၶဝ်ႈမိူင်း(လဝၵ)ၶဝ်လူး။ တေႃႈလဵဝ် သိုၵ်းမၢၼ်ႈသမ်ႉႁဵတ်းၸိူင်ႉၼႆ မိူၼ်ဝႃႈ သိုၵ်းမၢၼ်ႈၶႂ်ႈႁဵတ်း သင်ၵေႃႈႁဵတ်း ၵႂႃႇၸိူင်ႉၼၼ်ၵူၺ်း ဢမ်ႇၸွမ်းပၵ်းပိူင်သိုၵ်း” ဝႃႈၼႆ။
ၵူၼ်းၸမ်ၸႂ်သိုၵ်း လူင်ပွင်ၸိုင်ႈတႄႉလၢတ်ႈဝႃႈ ၶဝ်လႅပ်ႈတေၶႂ်ႈႁူႉဝႃႈ ၸွင်ႇၵူၼ်းဝၢၼ်ႈမီးလွင်ႈၵဵဝ်ႇၶွင်ႈၸွမ်းၸုမ်း ယိပ်းၵွင်ႈၵၢင်ႇႁႃႉ၊ ဢမ်ႇၵဵဝ်ႇႁႃႉ။ ၸွင်ႇမီးၸုမ်းယိပ်းၵွင်ႈၵၢင်ႇ မူၵ်းယူႇဝႆႉၸွမ်းၼႂ်းမူႇဝၢၼ်ႈႁႃႉ ၸဵမ်ၸိူဝ်းၼႆႉၵူၺ်း” ဝႃႈၼႆ။
