လုင်းၸၢႆးၸၢမ်ႇထုၼ်း ၵူၼ်းဝၢၼ်ႈပၢင်လူင် ၼမ်ႉတူႈ ဢၼ်တိူဝ်ႉၺႃးမၢၵ်ႇၵွင်ႈ ၶမ်ၸူၵ်ႉတီႈပွတ်ႇယွၼ်ႉပၢင်တိုၵ်းၼႂ်း ဝၢၼ်ႈၼၼ်ႉ တေႃႈလဵဝ် ယူႇလီၶႅၼ်းၸိုၼ်ႈမႃးသေ ႁွတ်ႈၽႅဝ်ၶိုၼ်းႁိူၼ်းယေးလီငၢမ်းယဝ်ႉ ဝႃႈၼႆ။

မိူဝ်ႈၼႆႉ ဝၼ်းတီႈ 03/10/2018 ယၢမ်းၵၢင်ၼႂ် ၸုမ်းၸွႆႈထႅမ် ပရႁိတ တင်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ ႁူမ်ႈၵၼ်သေ သူင်ႇလုင်းၸၢႆးၸၢမ်ႇထုၼ်း ဢႃယု 54 ပီ ဢၼ်တိူဝ်ႉၺႃးမၢၵ်ႇၵွင်ႈ ၶမ်ၸူၵ်ႉဝႆႉတီႈပွတ်ႇ လႄႈၵႂႃႇ ၽႃႇတတ်းဢဝ်ဢွၵ်ႇတီႈႁူင်းယႃဝဵင်းလိူဝ်ႇၼၼ်ႉ လႆႈ ပွၵ်ႈၽႅဝ်ၶိုၼ်းႁိူၼ်းယေးလီငၢမ်းယဝ်ႉ တီႈဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ဝႃႈၼႆ။

လုင်းၸၢႆးၸၢမ်ႇထုၼ်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၶႃႈႁဝ်းၽႅဝ်ႁွတ်ႈႁိူၼ်းယေးလီငၢမ်းယဝ်ႉၶႃႈ။ မၢၵ်ႇၵွင်ႈ ဢၼ်ၶမ်တီႈပွတ်ႇၶႃႈၵေႃႈ လႆႈၽႃႇတတ်းဢဝ်ဢွၵ်ႇယဝ်ႉ။ ၶႃႈႁဝ်းယိၼ်းၸူမ်းၶွပ်ႈၸႂ်ထိုင် ၽူႈၸွႆႈထႅမ် တူၺ်းထိုင် လုမ်းလႃးၶႃႈႁဝ်းၵူႈၵေႃႉၶႃႈ ၸဵမ်ၸုမ်းပရႁိတ သီႇပေႃႉ ဢၼ်လႆႈႁပ်ႉတေႃႉသူင်ႇၶႃႈႁဝ်း။ လိူဝ်ၼၼ်ႉ ၾၢႆႇမေႃယႃ သီႇပေႃႉ၊ ဝဵင်းလိူဝ်ႇ၊ ၽူႈၼမ်းၼႃႈ ပႃႇတီႇႁူဝ်သိူဝ် လုင်းမွင်ႇၵျီး၊ မေႃယႃ ၼၢင်းၶမ်းဢူး၊ ၸၢႆးၶုၼ်သႅင်ၾႃႉ၊ ၼၢင်းၶမ်း ဢေး ၽူႈတႅၼ်း ၼမ်ႉတူႈ၊ ဝတ်ႉၵျွင်းၽူဝ်းတေႃႇ သီႇပေႃႉ ဢိၵ်ႇထႅင်ႈလၢႆလၢႆၵေႃႉ” ဝႃႈၼႆ။

မိူဝ်ႈဝၼ်းတီႈ 01/09/2018 ယၢမ်းၵၢင်ၶမ်ႈမွၵ်ႈ 7:30 မူင်းၼၼ်ႉ ၸုမ်းယိပ်းၵွင်ႈၵၢင်ႇၼင်ႇၵၼ် ယိုဝ်းၵၼ် တီႈၼႂ်း ဝၢၼ်ႈ ပၢင်လူင် ဢိူင်ႇပၢင်လူင်သေ မၢၵ်ႇၵွင်ႈတိူဝ်ႉသႂ်ႇ ၵူၼ်းဝၢၼ်ႈသွင်ၵေႃႉ ၸၢႆးမူဝ်ဢႃယု 20 ပီပၢႆ တိူဝ်ႉၺႃးၶႅၼ် လႄႈ ပဵမ်ႉမၼ်းၸၢႆး ဢိၵ်ႇလုင်းၸၢမ်ႇထုၼ်း မၢၵ်ႇၵွင်ႈၶမ်ၼႂ်းပွတ်ႇမၼ်းၸၢႆး။ ယူႇတီႈၸုမ်းၸွႆႈထႅမ် ပရႁိတ ၸႄႈဝဵင်း သီႇပေႃႉ လႆႈၵႂႃႇဢဝ်တူဝ်လုင်းၸၢမ်ႇထုၼ်း မႃးယူတ်းယႃတူဝ်တီႈ ႁူင်းယႃ သီႇပေႃႉ။

ထိုင်မႃး ဝၼ်းတီႈ 14/09/2018 ၾၢႆႇမေႃယႃ ၸႄႈဝဵင်းသီႇပေႃႉ ႁၢင်ႈႁႅၼ်း သူင်ႇတူဝ် လုင်းၸၢႆးၸၢမ်ႇထုၼ်း ၵႂႃႇ ယူတ်းယႃ ပိူဝ်ႈတႃႇၽႃႇတတ်းဢဝ်ဢွၵ်ႇမၢၵ်ႇၵွင်ႈဢၼ်ၶမ်ဝႆႉ တီႈႁူင်းယႃ ဝဵင်းလိူဝ်ႇ သေမေႃယႃ လႆႈၽႃႇတတ်း ဢဝ်မၢၵ်ႇၵွင်ႈဢွၵ်ႇပၼ်မိူဝ်ႈ ဝၼ်းတီႈ 25/09/2018 ယၢမ်းဝၢႆး ဝၼ်း 3 မူင်း တီႈႁူင်းယႃလူင် ဝဵင်းလိူဝ်ႇ (မၼ်းတလေး) ဝႃႈၼႆ။