ၵူၼ်းမၢၼ်ႈပဵင်း ၸႄႈဝဵင်းၵူတ်ႉၶၢႆ 120 ပၢႆဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ၵျွင်းၶရိတ်ႉယၢၼ်ႇၶၢင် ၼႂ်း ၸႄႈဝဵင်းသႅၼ်ဝီ။
ဝၼ်းတီႈ 30/09/2018 ယၢမ်းဝၢႆးဝၼ်း မွၵ်ႈ 3:30 မူင်းၼၼ်ႉ ၵူၼ်းမၢၼ်ႈပဵင်း ဢွၼ်ၵၼ်ပၢႆႈၽေးသိုၵ်း မႃးသွၼ်ႈ ဝႆႉတီႈ ၵျွင်းၶရိတ်ႉယၢၼ်ႇ ပွၵ်ႉ 3 ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ယွၼ်ႉသိုၵ်းတဢၢင်း တင်း သိုၵ်းလူင်ပွင်ၸိုင်ႈမၢၼ်ႈ ၶဵင်ႈၶႅင်ၵၢၼ်သိုၵ်းတေႃႇၵၼ် ႁိမ်းမၢၼ်ႈပဵင်း ၵူၼ်းမိူင်း ဢွၼ်ၵၼ်ၵူဝ်ပဵၼ်ပၢင်တိုၵ်း သေ ဢွၼ်ၵၼ်ပၢႆႈဢွၵ်ႇမႃး ဝႃႈၼႆ။
ၸၢႆးလႅဝ်းၸတ်ႉ ၸုမ်းၵူၼ်းၼုမ်ႇၵူတ်ႉၶၢႆ လၢတ်ႈတီႈ ၽူႈတွႆႇႁွၵ်ႈဝႃႈ “ မိူဝ်ႈဝၼ်းသိုၵ်း TNLA ၵဵပ်းၶွၼ်ႇၼၼ်ႉ သိုၵ်း လွႆၶဝ်မႃးယူႇၼႂ်းဝၢၼ်ႈ ၵမ်းၼႆႉ ၵူၼ်းဝၢၼ်ႈၵူဝ်ပဵၼ်ပၢင်တိုၵ်းသေ ၸင်ႇဢွၼ်ၵၼ်ပၢႆႈၵႂႃႇ တၢင်းသႅၼ်ဝီ ပၢင်တိုၵ်း တႄႉ ဢမ်ႇပဵၼ်ၼင်ႇၵဝ်ႇ။ မၢၼ်ႈပဵင်းသမ်ႉ ၸမ်သႅၼ်ဝီ ၵွပ်ႈၼၼ်ဢွၼ်ၵၼ်ပၢႆႈၵႂႃႇတၢင်းပုၼ်ႉ။ ဝၢႆးသေ သိုၵ်းလွႆ ၵဵပ်းၶွၼ်ႇယဝ်ႉ ၵူၼ်းတၢင်းၵူတ်ႉၶၢႆႁဝ်း ဢမ်ႇပေႃးသူႈဢွၼ်ၵၼ် ဢွၵ်ႇၵႂႃႇ တၢင်းလႂ်” ဝႃႈၼႆ။
ၸၢႆးၸိင်ႇလူႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ပၢႆႈၽေးဢၼ်မႃးသွၼ်ႈဝႆႉတီႈ ပွၵ်ႉ 3 ၼၼ်ႉ မိူဝ်ႈဝႃး ဝၼ်းတီႈ 1 ယၢမ်းၵၢင်ၼႂ် 9 မူင်း ၶိုၼ်းဢွၼ်ၵၼ်ပွၵ်ႈ မိူဝ်း မူတ်းယဝ်ႉ။ ၵူၼ်းပၢႆႈၽေး ဢၼ်မႃးသွၼ်ႈသဝ်းတီႈၼႆႈၼႆႉ ပဵၼ်ပီႈၼွင်ႉၶၢင် ၵမ်ႈၼမ်” ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 29/09/2018 ယၢမ်းၵၢင်ၼႂ်ၸဝ်ႉၼၼ်ႉ သိုၵ်းတဢၢင်း TNLA ၵဵပ်းၶွၼ်ႇရူတ်ႉၵႃး ၸိူဝ်းၵႂႃႇ မႃး ၼိူဝ်သဵၼ်ႈတၢင်းလူင်မိူင်းႁူမ်ႈတုမ် တႃႈလိူဝ်ႇ-လႃႈသဵဝ်ႈ-မူႇၸေႊ တီႈၼမ်ႉဢုမ်၊ ပၢင်ႇၸလွပ်ႈ၊ မၢၼ်ႈပဵင်း ၼႂ်း ဝဵင်းသဵၼ်ဝီလႄႈ မူႇၸေႊ။ ဢိင်ၼိူဝ်ရူတ်ႉၵႃးလဵၵ်ႉယႂ်ႇသေ လႆႈသႂ်ႇၶွၼ်ႇၸဵတ်းမိုၼ်ႇတေႃႇ ႁႃႈသႅၼ်။ ရူတ်ႉၵႃးႁိူၼ်း တႄႉ မၢင်လမ်းၵေႃႈလႆႈပၼ်။ မၢင်လမ်းၵေႃႈဢမ်ႇလႆႈပၼ်။ ဢၼ်လႆႈသၢင်းၶွၼ်ႇၼႆႉမီးၼမ်ႉႁူဝ်ပၢၵ်ႇ ဝႃႈၼႆ။
ၵူၼ်းၼမ်ႉဢုမ်လၢတ်ႈဝႃႈ “တီႈၼမ်ႉဢုမ်တႄႉ တင်ႈတႄႇၵၢင်ၼႂ် 5 မူင်းၵဵပ်းၶွၼ်ႇ။ ၵူၼ်းသိုၵ်းတဢၢင်း မွၵ်ႈ 5 ၵေႃႉ မႃးယူႇၼႂ်းဝၢၼ်ႈ၊ ယူႇၸွမ်းၵိဝ်ႇ။ မၢင်ၸိူဝ်းသမ်ႉပႂ်ႉဝႆႉတီႈၵွင်းလွႆသေ ဢဝ်ႁူမ်ႇလူမ်ႈၸုမ်းၶဝ်ဝႆႉ။ ရူတ်ႉၵႃးၸိူဝ်းမႃးၾၢႆႇ လင် လႆႈႁူႉဝႃႈတၢင်းၼႃႈၼၼ်ႉ ၸုမ်းတဢၢင်း TNLA ၵဵပ်းၶွၼ်ႇဝႆႉယူႇၼႆ လႄႈ ဢမ်ႇသိုပ်ႇၵႂႃႇသေ ၵိုတ်းဝႆႉၸွမ်းတႃႈ ၸွမ်းတၢင်းၵေႃႈမီးဝႆႉတင်းၼမ်” ဝႃႈၼႆ။
ၸဝ်ႈၵႃးၵေႃႉၼိုင်ႈလၢတ်ႈဝႃႈ “ၵူၼ်းမိူင်းတႄႉ ယၢပ်ႇၽိုတ်ႇတႃႇၵႂႃႇမႃး။ ဢမ်ႇမီးလွင်ႈႁူမ်ႇလူမ်ႈ။ ပေႃးဢမ်ႇမီးငိုၼ်း တႃႇတေသႂၢင်းၶွၼ်ႇၼႆ ဢဝ်ဝႆႉလၢႆႊသိၼ်ႊရူတ်ႉ။ တီႈတႄႉမၢၼ်း ၼမ်ႉဢုမ်လႄႈ ၼမ်ႉပေႃႈၼႆႉၸမ်ၵၼ်ၼႃႇ။ တီႈၼမ်ႉပေႃႈၵေႃႈ မီးဝႆႉတပ်ႉသိုၵ်းမၢၼ်ႈယူႇ။ မုင်ႈတူၺ်းၵေႃႈႁၼ်ၵၼ်ယူႇ။ ၶဝ်သမ်ႉဢမ်ႇႁဵတ်းသင် ဢမ်ႇတူင်ႉ ၼိုင်သင်။ မိူၼ်ၼင်ႇ ၶဝ်တင်ႈၸႂ်ပွႆႇပၼ်ဝႆႉ။ ၸုမ်းတဢၢင်း TNLA ၼႆႉ မိူဝ်ႈပူၼ်ႉမႃးၵေႃႈ ၵႆႉၵဵပ်းၶွၼ်ႇၼိူဝ်သဵၼ်ႈ တၢင်းမိူင်းႁူမ်ႈတုမ် တႃႈလိူဝ်ႇ- လႃႈသဵဝ်ႈ-မူႇၸေႊၼၼ်ႉ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉသေ သိုၵ်းလူင်ပွင်ၸိုင်ႈမၢၼ်ႈ သွၵ်ႈတဝ်ႁႃသိုၵ်းတဢၢင်း သွင်ၾၢႆႇလႆႈၶဵင်ႈၶႅင်ၵၢၼ်သိုၵ်း တေႃႇ ၵၼ် ႁဵတ်းႁႂ်ႈၵူၼ်းမၢၼ်ႈပဵင်း လႆႈဢွၼ်ၵၼ်ဢွၵ်ႈပၢႆႈ ယွၼ်ႉၵူဝ်ပဵၼ်ပၢင်တိုၵ်း ဝႃႈၼႆ။
မၢၼ်ႈပဵင်းၼႆႉ မီးဝႆႉၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ မီးၾၢႆႇၸၢၼ်းဝဵင်းၵူတ်ႉၶၢႆ ယၢၼ်ၵႆဝဵင်း မွၵ်ႈ 9 လၵ်း ဝႃႈၼႆ။
