ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇၾၢင်ႉထိုင်ႁႅင်းၵၢၼ်ယၢၼ်မိူင်း ၸိူဝ်းႁဵတ်းၵၢၼ် ၽိတ်းမၢႆမီႈၼၼ်ႉ တေၸၢင်ႈၺႃးတူတ်ႈတၢမ်ႇမႂ်ငိုၼ်းၼမ်ထိုင် 200,000 ၿၢတ်ႇ။

ဝၼ်းတီႈ 01/10/2018 သိုဝ်ႇၶၢဝ်ႇထႆး Khaosod ပိုၼ်ၽၢဝ်ႇဝႃႈ ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇၾၢင်ႉႁႅင်းၵၢၼ်ယၢၼ်မိူင်း မၢၼ်ႈ၊ လၢဝ်း၊ ၵမ်ႊပူႊၶျႃႊ ၸိူဝ်းၶဝ်ႈႁဵတ်းၵၢၼ် ၼႂ်းမိူင်းၸိုင်ႈထႆးဝႃႈ တေဢမ်ႇလႆႈႁဵတ်း ၵၢၼ်ၽိတ်းပၵ်းပိူင်မၢႆမီႈ ဢၼ်ၾၢႆႇႁႅင်းၵၢၼ်ဢွၵ်ႇဝႆႉ သင်ႁဵတ်းၽိတ်းၼႆ တေၸၢင်ႈၺႃးတၢမ်ႇမႂ်ငိုၼ်းၼမ်ထိုင် 200,000 ၿၢတ်ႇ တူၵ်းၶွၵ်ႈဢမ်ႇပူၼ်ႉ 1 ပီ ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ႁႅင်းၵၢၼ်ယၢၼ်မိူင်းၵူႈၵေႃႉ ဢၼ်ယူႇသဝ်းဝႆႉတီႈၼႂ်းဝၢၼ်ႈပိူၼ်ႈမိူင်းပိူၼ်ႈၼႆႉ ႁဝ်းၶႃႈလူဝ်ႇဢွၼ်ၵၼ် ၶတ်းၸႂ်ႁဵတ်းၸွမ်းၼင်ႇဢၼ်ပၵ်းပိူင်ပိူၼ်ႈတမ်းဝၢင်းဝႆႉ ၊ ပေႃးႁဝ်းႁဵတ်းၸွမ်းၼင်ႇပၵ်းပိူင်ပိူၼ်ႈၼႆ ၽႂ်ဢမ်ႇၸၢင်ႈမႃးႁဵတ်းသင်တီႈႁဝ်းလႆႈ” ဝႃႈၼႆ။

ၼႂ်းပၵ်းပိူင်မၢႆမီႈမတ်ႉတႃ 8 ၵဵဝ်ႇၵပ်းလွင်ႈႁႅင်းၵၢၼ်ၼၼ်ႉတႅမ်ႈဝႆႉဝႃႈ သင်ႁႅင်းၵၢၼ်ယၢၼ်မိူင်းပူၼ်ႉပႅၼ် ႁဵတ်းၵၢၼ်ၵူၼ်းမိူင်းထႆးၸိုင် လႆႈဝႃႈၽိတ်းမၢႆမီႈ ၸၢင်ႈၺႃး တူတ်ႈတၢမ်ႇတူၵ်းၶွၵ်ႈဢမ်ႇပူၼ်ႉ 5 ပီ၊ မႂ်ငိုၼ်း 2,000- 100,000 ၿၢတ်ႇ၊ ပေႃႈလဵင်ႉၼၢႆးၸၢင်ႈသမ်ႉ မီးတူတ်ႈမႂ်ငိုၼ်း 10,000 – 100,000 ၿၢတ်ႇ တေႃႇႁႅင်း ၵၢၼ်ယၢၼ်မိူင်းၼိုင်ႈၵေႃႉသင်ႁဵတ်းၽိတ်းယဝ်ႉႁဵတ်းၽိတ်းထႅင်ႈၼႆ တေၺႃးတူတ်ႈတူၵ်းၶွၵ်ႈဢမ်ႇပူၼ်ႉ 1 ပီ မႂ်ငိုၼ်း 50,000 – 100,000 ၿၢတ်ႇ။

လူင်ပွင်ၸိုင်ႈမိူင်းထႆး ဢွၵ်ႇပိူင်ဝႆႉ တႃႇႁႅင်းၵၢၼ်ယၢၼ်မိူင်း တေလႆႈႁဵတ်းၵၢၼ် 2 ဢၼ်ၵူၺ်း။ ၵၢၼ်လုမ်းလႃးႁိူၼ်းလႄႈ ၵၢၼ်ၸၼ်ႉတႅမ်ႇၵူႈလွင်ႈလွင်ႈ(ၵမ်ႊမၵွၼ်ႊ/General workers) ၵူၺ်းၼႆယဝ်ႉ။