ဢိင်ၼိူဝ် ၽူႈတႅၼ်းသၽႃး ၵူၼ်းမိူင်း တင်း ၽူႈတႅၼ်း သၽႃးၸိူဝ်ႉၸၢတ်ႈ 5 ၵေႃႉႁူမ်ႈၵၼ် တႅမ်ႈလိၵ်ႈ/ လူင်းလၢႆး မိုဝ်းတၢင်ႇထိုင် ၸွမ်ၸိုင်ႈမိူင်းႁူမ်ႈတုမ် တင်း လုမ်းၸွမ်ၸိုင်ႈ တီႈၼေႇပျီႇတေႃႇ ဝႆႉၼၼ်ႉသေ ၽူႈမီးပုၼ်ႈၽွၼ်း လူင်းပိုၼ်ႉတီႈၵူတ်ႇထတ်း လွင်ႈၵၢၼ်ၶုတ်းထၢၼ်ႇႁိၼ် ဝဵင်းမိူင်းၵိုင်။

ဝၼ်းတီႈ 28/09/2018 ယၢမ်းၵၢင်ၼႂ် ၽူႈတႅၼ်းသၽႃးၵူၼ်းမိူင်း / ၸိူဝ်ႉၸၢတ်ႈ တင်း ၽွင်းလူင်ၾၢႆႇႁၵ်ႉသႃ ၾိင်ႈ တိုၼ်းသၽႃႇဝ၊ ၽူႈၵွၼ်းၾၢႆႇၸီႉသင်ႇ လႄႈ ၽူႈမီးပုၼ်ႈၽွၼ်းၾၢႆႇၸီႉသင်ႇ ၼႂ်းႁွင်ႈ ၵၢၼ်ၾၢႆႇၶုတ်းႁိၼ်ႁႄႈ၊ ဢိၵ်ႇ ထႅင်ႈ ၽူႈၵွၼ်းၸႄႈဝဵင်း ၽူႈမီးပုၼ်းၽွၼ်း လူင်းပိုၼ်ႉတီႈ ၵူတ်ႇထတ်း မေႃႇထၢၼ်ႇႁိၼ် တီႈၾၢႆႇၼိူဝ်ဝၢၼ်ႈလွႆ သဵဝ်ႈ ဢိူင်ႇဝၢၼ်ႈယၢတ်ႇ ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။

ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈႁဝ်းၶႃႈ ၽူႈတႅၼ်း သၽႃးၵူၼ်းမိူင်း 4 ၵေႃႉလႄႈ ၽူႈတႅၼ်းသၽႃးၸိူဝ်ႉၸၢတ်ႈၵေႃႉၼိုင်ႈ ႁဝ်းႁူမ်ႈၵၼ်လူင်းလၢႆးမိုဝ်းသေ တႅမ်ႈလိၵ်ႈ သူင်ႇထိုင် တီႈၸွမ်ၸိုင်ႈမိူင်းႁူမ်ႈတုမ် မိူဝ်ႈဝၼ်းတီႈ 24/08/2018 ၵဵဝ်ႇလူၺ်ႈလွင်ႈထၢၼ်ႇႁိၼ်မိူင်းၵိုင်ၼႆႉ ႁႂ်ႈလႆႈ မႄးထတ်း ၶိုၼ်းလီလီသေ ႁႂ်ႈၵိုတ်းယင်ႉပၼ်ၽႂ်းၽႂ်း။ ယွၼ်ႉဝႃႈ မေႃႇထၢၼ်ႇႁိၼ်ၼႆႉ ႁဵတ်းမႃးပီယၢဝ်းၶၢဝ်းႁိုင် ယဝ်ႉ ၵေႃႈ ပႆႇယဝ်ႉတူဝ်ႈ။ ၵူၼ်းမိူင်းၵေႃႈဢွၵ်ႇၼႄၵၢင်ၸႂ်လၢႆလၢႆပွၵ်ႈ။ ဢၼ်ႁဝ်းၶႃႈတၢင်ႇလၢတ်ႈသၢၼ်ၶတ်းလွင်ႈၼႆႉ လၢႆ လၢႆပွၵ်ႈၵေႃႈ ၶဝ်ၵေႃႈဝႃႈ တေၵိုတ်းယင်ႉ၊ တေၶိုၼ်းဢုပ်ႇ လူင်ပွင်ၸိုင်ႈမိူင်းတႆးသေ ၶိုၼ်းတေထတ်းထွင်ၵႂႃႇ ၼႆၵေႃႈ လူင်ပွင်ၸိုင်ႈမိူင်းတႆးၵေႃႈ ဢမ်ႇႁဵတ်းၵၢၼ်ပၼ်သင်” ဝႃႈၼႆ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈသၽႃးမိူင်းႁူမ်ႈတုမ် ဢူးတီႇၶုၼ်ႇမျၢတ်ႉ ၵေႃႈႁႂ်ႈၽူႈတႅၼ်းၸိူဝ်းလူင်းလၢႆးမိုဝ်း တၢင်ႇလိၵ်ႈ ဝႆႉၸိူဝ်းၼၼ်ႉ ၸွမ်းမိူဝ်းၵူတ်ႇထတ်းၶိုၼ်း လွင်ႈထၢၼ်ႇႁိၼ် ဝႃႈၼႆ။

ဝၼ်းတီႈ 28/09/2018 ယၢမ်းဝၢႆးဝၼ်း ၽူႈတႅၼ်း တင်း ၽွင်းလူင်ၾၢႆႇသိင်ႇဝႅတ်ႉလွမ်ႉ၊ ၸုမ်းၸိူဝ်းလူင်းပိုၼ်ႉတီႈ ႁူပ်ႉထူပ်း ၵူၼ်းမိူင်း တီႈဝတ်ႉၼွင်လႅင် ပွၵ်ႉ 6 ၸႄႈဝဵင်းမိူင်းၵိုင်သေ ယူႇတီႈၵူၼ်းမိူင်း လႆႈတၢင်ႇလၢတ်ႈၼႄ လွင်ႈ ပဵၼ်တႄႉ မီးတႄႉလႄႈ လွင်ႈယၢပ်ႇၽိုတ်ႇၵူၼ်းမိူင်း ဢၼ်လႆႈႁူပ်ႉမႃးၸိူဝ်းၼၼ်ႉ။

ၸၢႆးသႅင်မိူင်း လၢတ်ႈဝႃႈ “ ၽႅၼ်ၵၢၼ်မိူဝ်းၼႃႈ တေမီးသင်ဢၼ်ဝႃႈၼၼ်ႉ မၼ်းယူႇတီႈၵူၼ်းမိူင်းလႄႈ သင်ၶ ၸဝ်ႈၵူၺ်း။ တေႃႈလဵဝ်ၼႆႉ ၾၢႆႇလူင်ပွင်ၸိုင်ႈၵေႃႈမႃး ႁၼ်ၵႂႃႇၸႅင်ႈၸႅင်ႈလႅင်းလႅင်းယဝ်ႉ ပိုၼ်ႉတီႈၵေႃႈလူင်းယဝ်ႉ ၶဝ်ၵေႃႈယွမ်းႁပ်ႉယူႇဝႃႈ တေတုမ်ႉတိူဝ်ႉ သၽႃဝ တေတုမ်ႉတိူဝ်ႉႁႆႈၼႃး ၾၢႆႇၶွမ်ႊပၼီႊၶဝ်ၵေႃႈ မီးတင်းယူပ်ႈယွမ်း တၢင်းၼမ် တႃႇတေၶဝ်ႈၸူးၵူၼ်းမိူင်း မၼ်းဢမ်ႇမီးလွင်ႈၸႅင်ႈလႅင်း လွင်ႈၼႆႉၵေႃႈ လူင်ပွင်ၸိုင်ႈၶဝ် လႆႈႁပ်ႉႁူႉၵႂႃႇယဝ်ႉ” ဝႃႈၼႆ။

မိူဝ်ႈဝၼ်းတီႈ 11/04/2017 ၼၼ်ႉ သင်ၶၸဝ်ႈ တင်း ၵူၼ်းမိူင်း ၼပ်ႉႁူဝ်ႁဵင် ႁူမ်ႈၵၼ် လုၵ်ႉႁိုၼ်ႇၼႄၵၢင် ၸႂ် သၢၼ်ၶတ်းလွင်ႈၶုတ်းထၢၼ်ႇႁိၼ်ႇ ၼႂ်းၸႄႈဝဵင်းမိူင်းၵိုင် ဢၼ်ၶွမ်ႊပၼီႊပျေႉဢွင်ႇႁိူင်း တင်း ႁိူင်းမဵတ်ႉတႃႇ လႆႈၶႂၢင်ႉၶုတ်း တီႈလူင်ပွင်ၸိုင်ႈၼေႇပျီႇတေႃႇ တႃႇတၢင်းၵႂၢင်ႈမွၵ်ႈ 1,000 ဢေႊၶိူဝ်ႊၼၼ်ႉ ဝႃႈၼႆ။

ၵဵဝ်ႇၵပ်းၵၢၼ်ၶုတ်းထၢၼ်ႇႁိၼ်ၼႆႉသေ သင်ၶၸဝ်ႈ ၵူၼ်းမိူင်း ဢွၼ်ၵၼ်သၢၼ်ၶတ်းဝႆႉ ႁၢဝ်ႈႁၢဝ်ႈႁႅင်းႁႅင်း ယွၼ်ႉဝႃႈ တေတုမ်ႉတိူဝ်ႉ ၵူၼ်းႁႆႈၼႃးၵူၼ်းမိူင်းလႄႈ ၾိင်ႈတိုၼ်းသၽႃႇဝ ၵူၼ်းမိူင်းသေ ဢမ်ႇၵႃး တေတုမ်ႉတိူဝ်ႉပႃး ပၢႆးယူႇ လီၵူၼ်းမိူင်း ၸဵမ်ၸိူဝ်းၼႆႉ ဝႃႈၼႆ။