ၼိူဝ်ဢိၼ်ႊထိူဝ်ႊၼဵတ်ႊ ၾဵတ်ႉပုၵ်ႉ၊ ဝီႊၶျႅတ်ႊ ပိုၼ်ၽႄႈၵၼ်၊ သျႄးၵၼ်လွင်ႈၼၢင်းမူဝ်ႁွမ် ဢၼ်တပ်ႉသိုၵ်းတ ဢၢင်း TNLA တီႉၺွပ်း ၵႂႃႇၼၼ်ႉ လူႉတၢႆလွင်ႈၼႆႉ TNLA ဝႃႈပဵၼ်ၶၢဝ်ႇပွမ်။
မၢႆးဢၢႆႈၵျေႃႇ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လၢတ်ႈတီႈၽူႈတွႆႇႁွၵ်ႈဝႃႈ “ ၶႅပ်းႁၢင်ႈၼၢင်းမူဝ်ႁွမ် ဢၼ်ပိုၼ် ၽႄႈၵၼ်ယူႇ ၼိူဝ်ၾဵတ်ႉ ပုၵ်ႉ (Facebook)၊ ဝီႊၶျႅတ်ႊ(Wechat) ၼၼ်ႉ မၼ်းပဵၼ်ၶႅပ်းႁၢင်ႈဢၼ်ပွမ်/ တူႉၵူၺ်း။ ဢမ်ႇႁိုင်သင် ႁဝ်းၶႃႈ တေတႅပ်းတတ်းတြႃးပၼ်တူတ်ႈတၢမ်ႇမၼ်းယဝ်ႉ ဝႃႈၼႆ။
မၼ်းၸၢႆးလၢတ်ႈဝႃႈ “ ၵဵဝ်ႇလူၺ်ႈလွင်ႈၼၢင်းမူဝ်ႁွမ်ၼႆႉ ၼႂ်းလိူၼ်ၼႆႉ ႁၢင်ႈသဵင် VDO မၼ်း ႁဝ်းၶႃႈ သူင်ႇပၼ်ၵူၼ်း မၼ်းၼၢင်းယဝ်ႉ။ တေႃႈလဵဝ် တူဝ်ၼၢင်းမူဝ်ႁွမ်ၼႆႉ ယူႇလီၵိၼ်ဝၢၼ်ယူႇ။ ၵဵဝ်ႇလူၺ်ႈလွင်ႈ ၼၢင်းမူဝ်ႁွမ် ဢၼ်ဢွၵ်ႇ ပိုၼ်ၽႄႈဝႃႈ မၼ်းၼၢင်းလူႉတၢႆယဝ်ႉၼႆၼၼ်ႉ ယႃႇပေယုမ်ႇ မၼ်းဢမ်ႇၸႂ်ႈၶၢဝ်ႇဢၼ်မၢၼ်ႇ မႅၼ်ႈ” ဝႃႈၼႆ။
ၼၢင်းမူဝ်ႁွမ်ၼႆႉ ထုၵ်ႇသိုၵ်းတဢၢင်း TNLA တီႉၺွပ်းၵုမ်းၶင်ဢဝ်တူဝ်မၼ်းၼၢင်းၵႂႃႇ မိူဝ်ႈဝၼ်းတီႈ 17/08/2018 ၶဝ်ႈတီႉဢဝ်တီႈႁိူၼ်းမၼ်း ၼၢင်း တီႈပွၵ်ႉႁူဝ်ၼွင် ၸႄႈဝဵင်းၼမ်ႉၶမ်း တေႃႇထိုင် ယၢမ်းလဵဝ် ပႆႇပွႆႇတူဝ်ပၼ်ၶိုၼ်း မီးၶၢဝ်းတၢင်း 40 ဝၼ်းပၢႆယဝ်ႉ။
ၼၢင်းမူဝ်ၶမ်း ပီႈၼၢင်း ၼၢင်းမူဝ်ႁွမ် လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈတၢင်းၾၢႆႇ TNLA ဢမ်ႇပွင်ႇၶၢဝ်ႇငၢဝ်း သင်မႃး။ TNLA ဝႃႈ ၶဝ်သူင်ႇပၼ်ႁၢင်ႈလႄႈသဵင် ၼွင်ႉယိင်းၶႃႈႁဝ်းမႃးၼႆၼၼ်ႉၵေႃႈ ဢမ်ႇလႆႈႁၼ်ဢမ်ႇ မီးသေပွၵ်ႈ။ ၵဵဝ်ႇလူၺ်ႈ လွင်ႈမၼ်း ၼၢင်းၼၼ်ႉ ဢမ်ႇလႆႈငိၼ်းၶၢဝ်ႇငၢဝ်းသင်။ ၼိူဝ်ၾဵတ်ႉပုၵ်ႉ၊ ဝီႊၶျႅတ်ႊ ဢၼ်ပိူၼ်ႈတၢင်ႇဝႆႉ ၶႅပ်းႁၢင်ႈ မၼ်းၼၢင်း ၼၼ်ႉတႄႉ ႁၼ်မႅၼ်ႈယူႇ။ ၶႅပ်းႁၢင်ႈဢၼ်ပိူၼ်ႈတၢင်ႇဝႆႉၼၼ်ႉ မၼ်းဢမ်ႇၸႂ်ႈၶႅပ်းႁၢင်ႈမၼ်း ၼၢင်းဢၼ်တႄႉ။ ပဵၼ်ၶႅပ်းႁၢင်ႈ ဢၼ်ပွမ်ၵူၺ်း။ ၶႂ်ႈတုၵ်းယွၼ်းဝႃႈ ယႃႇပေသိုပ်ႇၵၼ်ပိုၼ်ၽႄႈၵႂႃႇထႅင်ႈ” ဝႃႈၼႆ။
လၢတ်ႈဝႃႈ “ လုၵ်ႈဢွၼ်ႇ ၼၢင်းမူဝ်ႁွမ် 3 ၵေႃႉၵေႃႈ ထၢမ်ႁႃမႄႈၶဝ်ယူႇၵူႈဝၼ်းသေဢမ်ႇၵႃး တေႃႈလဵဝ်သမ်ႉ တေၶဝ်ႈၶၢဝ်းၵတ်းယဝ်ႉလႄႈ မႆႈၸႂ်လွင်ႈပၢႆးယူႇလီမၼ်းၼၢင်း ၵွပ်ႈၼၼ်တုၵ်းယွၼ်း ႁႂ်ႈပွႆႇပၼ်မၼ်းၼၢင်းၶိုၼ်း ဝႆးဝႆး”ဝႃႈၼႆ။
မိူဝ်ႈပီ 2016 သိုၵ်း TNLA မႃးၵဵပ်းၶွၼ်ႇ တီႈႁိူၼ်းၼၢင်းမူဝ်ႁွမ် 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်း ငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင် ၵေႃႉ ၺႃးသိုၵ်းလူင်ပွင်ၸိုင်ႈမၢၼ်ႈ မူၵ်းယိုဝ်းၸွမ်းတၢင်း တၢႆၵေႃႉၼိုင်ႈ၊ တီႉလႆႈတူဝ် လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်း ၾူၼ်းလၢတ်ႈ ဝၼ်းၼၼ်ႉ ၵမ်းလဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်ၵူၺ်းသေ ႁဝ်းဢမ်ႇဢဝ်သၢႆ ၸႂ်ႁဝ်းလႅၵ်ႈ သေပွင်ႇၶၢဝ်ႇလေႃႇ ႁဝ်းဢမ်ႇ ၸႂ်ႈၵူၼ်းဢဝ်ၶၢဝ်ႇပွင်ႇၶၢဝ်ႇပၼ်ၽႂ် ဝႃႈၼႆ။
