ၸႄႈဝဵင်းမိူင်းၼၢႆးၼႆႉ ပဵၼ်လိၼ်မိူင်း ဢၼ်မီးၶူဝ်းၶွင်ၵဝ်ႇၵႄႇမိူင်းၼိုင်ႈလႄႈ ၽူႈတႅၼ်းမိူင်းၼၢႆး တုၵ်းယွၼ်း ထိုင်ၸွမ်ၸိုင်ႈလႄႈ ႁွင်ႈၵၢၼ်ၾၢႆႇၵဵဝ်ႇၶွင်ႈ ႁႂ်ႈမၵ်းမၼ်ႈပဵၼ် ၽႅၼ်ႇလိၼ်ၶူဝ်းၵိုၵ်းမိူင်းသေဢမ်ႇၵႃး ႁႂ်ႈပဵၼ်တီႈ ဢႅဝ်ႇယဵမ်ႈ တွင်ႈတဵဝ်း ဝႃႈၼႆ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းၼၢႆး ယၢမ်ႈတႅမ်ႈလိၵ်ႈတၢင်ႇထိုင် ၸွမ် ၸိုင်ႈမိူင်းႁူမ်ႈတုမ် ဢူးဝိၼ်းမိၼ်ႉ မိူဝ်ႈဝၼ်းတီႈ 29 လိူၼ်ၵျုၼ်ႊ ပူၼ်ႉမႃးၼၼ်ႉ ယွၼ်ႉဢူးဝိၼ်းမိၼ်ႉ မႃးဢႅဝ်ႇ ယဵမ်ႈၼႂ်းမိူင်းတႆး ပဵၼ်ပွၵ်ႈၵမ်းႁႅၵ်ႈသေ လိူဝ်ၼၼ်ႉ တီႈၸွမ်ၽွင်းလူင် ၸႄႈမိူင်းတႆးၵေႃႈ ယၢမ်ႈတႅမ်ႈသူင်ႇၸူး ယဝ်ႉ ၵမ်းၼိုင်ႈ လွင်ႈဝႃႈ ႁႂ်ႈမၵ်းမၼ်ႈ မိူင်းၼၢႆး ပဵၼ်မိူင်းဢႅဝ်ႇယဵမ်ႈ တွင်ႈတဵဝ်းလႄႈ မိူင်းဢၼ်မီးၶူဝ်းၵဝ်ႇ ၶူဝ်းပူၺ်ႈ ၵိုၵ်းၽႅၼ်ႇလိၼ် ဝႃႈၼႆ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ1 ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ၽွင်းလူင်ၾၢႆႇႁူင်းႁႅမ်းလႄႈ ၵၢၼ်တွင်ႈတဵဝ်းၶဝ်လူင်းပိုၼ်ႉတီႈၵူတ်ႇထတ်းၵႂႃႇယဝ်ႉ။ တီႈမိူင်းၼၢႆးႁဝ်းၶႃႈၼႆႉ မီးၶူဝ်း ၶွင်ၵဝ်ႇၵႄႇ ဢၼ်ၵိုၵ်းပိုၼ်းၼႂ်းမိူင်းႁဝ်းၶႃႈဝႆႉ သင်ဝႃႈ ဢႅဝ်ႇယဵမ်ႈတူၺ်းၸိုင် တေလႆႈၸႂ်ႉၶၢဝ်းယၢမ်း 2-3 ဝၼ်း ၵွၼ်ႇ ၸင်ႇတေၸေးတီႈ။ တွၼ်ႈတႃႇလွင်ႈႁူမ်ႇလူမ်ႈတႄႉ လႆႈထၢမ်တၢင်းၾၢႆႇတပ်ႉၶဝ်ဝႆႉယူႇ။ တေႃႈလဵဝ် သင်ႁဝ်းတူၺ်း ငဝ်း လၢႆး မိူင်းႁူမ်ႈတုမ် ႁဝ်းၼႆႉၸိုင် တွၼ်ႈတႃႇတၢင်းၼႃႈ ၸၢင်ႈပဵၼ်မိူင်းဢႅဝ်ႇယဵမ်ႈ (တွင်ႈတဵဝ်း) မႃးဢၼ် ၼိုင်ႈလႆႈယူႇ” ဝႃႈၼႆ။

ၸဝ်ႈၾႃႉပၢၼ်သိုပ်ႇပၢၼ် မိူင်းၼၢႆး ႁိူင်းမႃး ၸဵမ်ၼပ်ႉႁူဝ်ပၢၵ်ႇပီ မီးၽရႃႉထၢတ်ႈ(ၵွင်းမူး)၊ ဝိႁၢရ်ၵဝ်ႇၵႄႇ၊ ႁေႃလႄႈ ၶူဝ်းႁၢင်ႈ ၶူဝ်းႁေႃ၊ ၽၵ်းတူလူင် တၢင်းၶဝ်ႈဝဵင်း၊ ၼွင်ၼမ်ႉလႄႈ လၵ်းသဝ်(မႃႇလိူင်ႇ) ၸဵမ်ၸိူဝ်းၼႆႉ။

တေႃႈလဵဝ် ႁေႃၸဝ်ႈၾႃႉမိူင်းၼၢႆးၼႆႉ ဢဝ်ၸႂ်ႉႁဵတ်းလုမ်းလူင်ပွင်ၸိုင်ႈဝႆႉ။ လိူဝ်ၼၼ်ႉ ၶုမ်ၸဝ်ႈၾႃႉဢၼ်မီး ၾၢႆႇ ၸၢၼ်းဝဵင်းမိူင်းၼၢႆးၼၼ်ႉ မီးၵူၼ်းတၢင်ႇတီႈသီႇလႅၼ် မႃးၽိုတ်ႉယူႇသဝ်းႁိမ်းႁွမ်းၼၼ်ႉသေ ၶႂၢၵ်ႈလိၼ် ဢဝ် ႁဵတ်းသူၼ်ဝၢင်းၸဝ်ႈၵဝ်ႇၵႂႃႇၵေႃႈမီးၼမ် ဝႃႈၼႆ။

ပၢၼ်ၵူႈပွၵ်ႈ လၢင်းၶိူဝ်း ယူႇတႂ်ႈၽႅၼ်ႇလိၼ်ၸႄႈမိူင်း မိူင်းတႆးသေတႃႉ ပၢၼ်ယၢမ်းလဵဝ် ၸႄႈဝဵင်းမိူင်းၼၢႆးၼႆႉ တူၵ်းၵႂႃႇ ၼႂ်းၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ဝႃႈၼႆ။