ပလိၵ်ႈထႆး လၢတ်ႈဢွၵ်ႇ မိူဝ်ႈဝၼ်းတီႈ 26 လိူၼ်ၼႆႉဝႃႈ ယႃႈမႃႉ12 လၢၼ်ႉ 4 သႅၼ်မဵတ်ႉပၢႆ တင်း ယႃႈဢႆႊသ် ၼမ်ႉၼၵ်း 512 ၵီႊလူဝ်ႊၵရမ်ႊ ဢၼ်ၸဝ်ႈၼႃႈတီႈထႆးတီႉလႆႈၼၼ်ႉ မၼ်းၵဵဝ်ႇၶွင်ႈၸွမ်း တင်းတပ်ႉသိုၵ်းဝႃႉ UWSA ၼႆသေတႃႉ ၾၢႆႇဝႃႉပၢၵ်ႈပႅတ်ႈဝႃႈ ဢမ်ႇၸႂ်ႈၶွင်ၶဝ် ဝႃႈၼႆ။

ယႃႈမဝ်းၵမ်ၼႆႉ ပလိၵ်ႈထႆး တီႉလႆႈမိူဝ်ႈဝၼ်းတီႈ 25/09/2018 ယၢမ်းၵၢင်ၼႂ် မွၵ်ႈ 3:30 မူင်းၼၼ်ႉ တီႉလႆႈ ႁိမ်းလၢၼ်ႇၵူတ်ႇထတ်း ၼိူဝ်သဵၼ်ႈတၢင်းလူင် ၼႂ်းၵႄႈလွႆမႄႈသလွင်း ၸႄႈဝဵင်းမႄႈၸၼ်း ၸႄႈတွၼ်ႈၵဵင်းႁၢႆး ၸိုင်ႈထႆး တွၼ်ႈၼိူဝ် မိၵ်ႈယႃႈမႃႉ ၸိူဝ်းၼၼ်ႉ ပဵၼ် 999 တင်း လၢဝ် 5 လုၵ်ႈ ၸိူဝ်းၼႆႉ။

ၽႃးၼုတဵတ်ႇ ၽုမ်းရိူင်း ၸဝ်ႈသိုၵ်းၾၢႆႇတပ်ႉပလိၵ်ႈထႆး သပ်းၸႅင်ႈၶၢဝ်ႇဝႃႈ “ ၵွၼ်ႇပႆႇတီႉလႆႈ ယႃႈမဝ်း ၵမ်ၼၼ်ႉ လႆႈ ႁႄႉရူတ်ႉၶိူင်ႈ ဢၼ်ၶီႇမႃးၸွမ်းၵၼ် 2 ၵေႃႉၼၼ်ႉ။ ဝၢႆးၼၼ်ႉ လႆႈႁၼ်ၵႃးလမ်းၼိုင်ႈ ဢၼ်မႃး ၸွမ်းတၢင်းလင်ၶဝ် ၼၼ်ႉ ပိၼ်ႇႁူဝ်ၵႃးသေ ဝၢႆႇပွၵ်ႈမိူဝ်းၶိုၼ်း။ ယူႇတီႈပလိၵ်ႈထႆး ၽူႈမီးပုၼ်ႈၽွၼ်းၶဝ် လႆႈလမ်းတီႉၵႃးၼၼ်ႉ။ ၵူၺ်းၵႃႈ ၵႃးလမ်းၼၼ်ႉ လႆႈႁေႃႈၵိုတ်းၶၢင်ႈတၢင်းသေ ၵူၼ်းႁေႃႈၵႃးတႄႉ တၼ်းလႅၼ်ႈပၢႆႈလွတ်ႈၵႂႃႇ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၾၢႆႇပလိၵ်ႈထႆး လႆႈၵူတ်ႇထတ်းၼႂ်းၵႃးလမ်းၼၼ်ႉ ထူပ်းႁၼ် ယႃႈမႃႉ သႂ်ႇထူင်ၸၢၼ်ႈ 65 ထူင်၊ ယႃႈဢႆႊသ် 13 ထူင် ဝႃႈၼႆ။

ၵူၼ်းၶီႇရူတ်ႉၶိူင်ႈမႃး 2 ၵေႃႉၼၼ်ႉ ယွမ်းႁပ်ႉဝႃႈ လႆႈႁပ်ႉၵႃႈၸၢင်ႈၼႄတၢင်းပၼ် 1 မိုၼ်ႇဝၢတ်ႇ ဝႃႈၼႆ။

ဢူးၺီႇရၢၼ်း ၽူႈၶၢၼ်ပၢၵ်ႇ တပ်ႉသိုၵ်ႉဝႃႉ UWSA လၢတ်ႈတီႈသိုဝ်ႇၶၢဝ်ႇ DVB ဝႃႈ “ ၵဵဝ်ႇၵပ်းလွင်ႈၼႆႉ တၢင်းၾၢႆႇထႆး ၶဝ်တိုၼ်းၼႄး ႁဝ်းယူႇတႃႇသေႇ။ ဢၼ်ၶဝ်ၼႄးႁဝ်းၶႃႈၼၼ်ႉ သၢၵ်ႈသေႇ ဢမ်ႇတဵမ်ထူၼ်ႈ ၵႅၼ်ႇ ၶႅင်သင်။ ဢၼ် ၶဝ်တီႉၺွပ်းလႆႈၸိူဝ်းၼၼ်ႉ ၶဝ်ၼႄးဝႃႈ ပဵၼ်ၶူဝ်းဝႃႉတင်းမူတ်း။ ယူႇတီႈႁဝ်းၶႃႈတႄႉ ၵဵဝ်ႇၵပ်းလွင်ႈၼႆႉ မၼ်းဢမ်ႇ ၸႂ်ႈ” ဝႃႈၼႆ။

တွၼ်ႈတႃႇတေသိုပ်ႇၵူတ်ႇထတ်းၵႂႃႇထႅင်ႈၼၼ်ႉ ပလိၵ်ႈထႆး လႆႈၵုမ်းၶင်တူဝ် ၵူၼ်းၶီႇရူတ်ႉၶိူင်ႈ 2 ၵေႃႉၼၼ်ႉဝႆႉယဝ်ႉ ဝႃႈၼႆ။ ၶၢဝ်ႇထႆးထႅင်ႈတီႈၼိုင်ႈတႄႉဝႃႈ ပဵၼ်ယႃႈမႃႉၶွင်ၸုမ်းတပ်ႉပႂ်ႉလႅၼ်လိၼ် BGF ဢၼ်ပၵ်းတီႈဝၢၼ်ႈပူႇၼႃးၵူဝ် ယူႇၼႂ်းၵုမ်းၵမ်တိူင်းသိုၵ်းသၢမ်ၸဵင်ႇၵဵင်းတုင် ၵမ်းသိုဝ်ႈ။