ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းႁူဝ်လိူၼ်ၼူဝ်ႊဝႅမ်ႊၿိူဝ်ႊ 2018 ဢၼ်တေထိုင်မႃးၼႆႉ ၽူႈသူၼ်ၸႂ် လဵပ်ႈ ႁဵၼ်းတႃႇပႂ်ႉတူၺ်း ဢၼ်ပၼ်သဵၼ်ႈၸိုဝ်ႈဝႆႉ မီး 158 ၵေႃႉၵူၺ်း လႄႈ လႆႈဝႃႈဢေႇလိူဝ်ၵူႈၵမ်း ဝႃႈၼႆ။

ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တေၸတ်းႁဵတ်းပၢင်လိူၵ်ႈတင်ႈသွမ်ႈ ၼႂ်းဝၼ်းတီႈ 03/11/2018 ဢၼ် တေထိုင်မႃး။ တႃႇလႆႈၽူႈတႅၼ်းမႂ်ႇၶဝ်ႈယူႇဝႆႉ တီႈၼင်ႈၼႂ်းသၽႃး တႃႇ 13 တီႈၼင်ႈ။ တေႃႈလဵဝ် ၽူႈသူၼ်ၸႂ် ၵႂႃႇ ပၼ်သဵၼ်ႈၸိုဝ်ႈ တႃႈလဵပ်ႈႁဵၼ်း ပႂ်ႉတူၺ်း ပၢင်လိူၵ်ႈတင်ႈသွမ်ႈ တင်းမူတ်း မီး 158 ၵေႃႉ ယူႇတီႈၶွမ်ႊမသျိၼ်ႊပၢင် လိူၵ်ႈတင်ႈ တိုၵ်ႉပိုတ်ႇ ႁပ်ႉသဵၼ်ႈၸိုဝ်ႈ ၽူႈသူၼ်ၸႂ်တႃႇပႂ်ႉတူၺ်း ပၢင်လိူၵ်ႈတင်ႈသွမ်ႈဝႆႉယူႇ ဝႃႈၼႆ။

ဢူးမိၼ်ႉၼၢႆႇ ၽူႈၶဝ်ႈၸုမ်းၶွမ်ႊမသျိၼ်ႊပၢင်လိူၵ်ႈတင်ႈ လၢတ်ႈတီႈႁွင်ႈၵၢၼ်သိုဝ်ႇၶၢဝ်ႇၼႂ်းမိူင်းဝႃႈ “ တေႃႈလဵဝ် တိုၵ်ႉ မီး 158 ၵေႃႉၵူၺ်း။ မိူဝ်ႈပီပူၼ်ႉ မီး 2,000 ပၢႆ။ ၶဝ်တေၵမ်ႉၼႄပၼ် လွင်ႈယူပ်ႈယွမ်းလႄႈ လွင်ႈၶိုပ်ႈၼႃႈ။ ၼင်ႇ ႁိုဝ် ပၢင်လိူၵ်ႈတင်ႈသွမ်ႈ ပေႃးတေလီမႃးၼၼ်ႉ ႁဝ်းၶႃႈၸတ်းႁဵတ်းၸွမ်းပိူင်ပၢင်လိူၵ်ႈတင်ႈ။ ယွၼ်ႉၼၼ်လႄႈ ၽူႈ လဵပ်ႈႁဵၼ်းပႂ်ႉတူၺ်း ပၢင်လိူၵ်ႈတင်ႈ ဢွၼ်ၵၼ်မႃးၸွႆႈပႂ်ႉတူၺ်းၵၼ်သေၵမ်းၶႃႈ” ဝႃႈၼႆ။

မိူဝ်ႈပၢင်လိူၵ်ႈတင်ႈသွမ်ႈ ပီ 2017 ၼၼ်ႉ မီးၽူႈလဵပ်ႈႁဵၼ်း ပႂ်ႉတူၺ်း တင်းမူတ်း 2,062 ၵေႃႉ။ မိူဝ်ႈပၢင်လိူၵ်ႈတင်ႈ ပီ 2015 ၼၼ်ႉသမ်ႉ မီးၽူႈလဵပ်ႈႁဵၼ်းပႂ်ႉတူၺ်း 12,000 ပၢႆ ဝႃႈၼႆ။

ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ 2018 ဢၼ်တေထိုင်ၼႆႉ တင်း မူတ်း တီႈၼင်ႈၽူႈတႅၼ်း ဢၼ်လုတ်ႈႁၢမ်းပဝ်ႇဝႆႉ 13 တီႈၼင်ႈ။ ၼေႃႇၽူႈတႅၼ်း ဢၼ်တေၶဝ်ႈၶႅင်ႇသမ်ႉ တင်း မူတ်း မီး 69 ၵေႃႉ ဝႃႈၼႆ။

တႃႇတီႈယူႇၸၢတ်ႈတႆးပဝ်ႇဝႆႉ 2 တီႈၼင်ႈ၊ တႃႇၽူႈတႅၼ်းၵူၼ်းမိူင်းလၢႆးၶႃႈလႄႈ တႃႇၽူႈတႅၼ်း ဢၼ်တေလႆႈႁပ်ႉ ပဵၼ် ၽွင်းလူင်ၾၢႆႇၸၢဝ်းၶိူဝ်းတႆး ၼႂ်းတိူင်းတႃႈလိူဝ်ႇ။