လုင်းၸၢႆးၸၢမ်ႇထုၼ်း ၵူၼ်းဝၢၼ်ႈပၢင်လူင် ဢၼ်ၺႃးမၢၵ်ႇၵွင်ႈၶဝ်ႈပွတ်ႇမိူဝ်ႈပၢင်တိုၵ်း RCSS လႄႈ TNLA ၼၼ်ႉ ယၢမ်းလဵဝ် မေႃယႃလူင် ဝဵင်းလိူဝ်ႇ လႆႈၽႃႇတတ်းဢဝ်ဢွၵ်ႇ မၢၵ်ႇၵွင်ႈဢၼ်ၶမ်ဝႆႉတီႈၼႂ်းပွတ်ႇၼၼ်ႉ ယဝ်ႉတူဝ်ႈလီ ငၢမ်းယဝ်ႉ ဝႃႈၼႆ။

လုင်းၸၢႆးၸၢမ်ႇထုၼ်းၼႆႉ မေႃယႃၶဝ် လႆႈၽႃႇတတ်းမၢၵ်ႇၵွင်ႈဢွၵ်ႇပၼ်မိူဝ်ႈ ဝၼ်းတီႈ 25/09/2018 ယၢမ်းဝၢႆးဝၼ်း 3 မူင်း တီႈႁူင်းယႃလူင် ဝဵင်းလိူဝ်ႇ(မၼ်းတလေး) ယဝ်ႉ ဝႃႈၼႆ။

ၸၢႆးၶုၼ်သႅင်ၾႃႉ ၽူႈၸွႆႈထႅမ် လုင်းၸၢမ်ႇထုၼ်း တီႈႁူင်းယႃ ဝဵင်းလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ “ လႆႈၽႃႇတတ်း ဢဝ်ဢွၵ်ႇမၢၵ်ႇၵွင်ႈ မိူဝ်ႈဝႃး ယၢမ်းဝၢႆးဝၼ်း မွၵ်ႈ 3 မူင်းၼႆႉၶႃႈ။ ၵႃႈယူတ်းယႃၽႃႇတတ်းၼၼ်ႉတႄႉ ယူႇတီႈၽူႈတႅၼ်း သၽႃးၵူၼ်းမိူင်း ၸႄႈဝဵင်းၼမ်ႉတူႈ ၼၢင်းၶမ်းဢေး ဢဝ်ပုၼ်ႈၽွၼ်းၸွႆႈထႅမ်ပၼ် တေႃႈလဵဝ် တူဝ် လုင်းၸၢမ်ႇ ထုၼ်းတႄႉ လႆႈသိုပ်ႇယူတ်းယႃတူဝ်ဝႆႉတီႈ ႁူင်းယႃဝဵင်းလိူဝ်ႇဝႆႉယူႇ။ ဢမ်ႇလႆႈမႆႈၸႂ် သင်ယဝ်ႉၶႃႈ။ ၵူၺ်းၵႃႈ တေလႆႈ လူင်းမိူဝ်းမိူဝ်ႈလႂ် ဢၼ်ဝႃႈၼၼ်ႉ ၾၢႆႇမေႃယႃၶဝ် ပႆႇဝႃႈသင်ၶႃႈ” ဝႃႈၼႆ။

မိူဝ်ႈဝၼ်းတီႈ 01/09/2018 ယၢမ်းၵၢင်ၶမ်ႈမွၵ်ႈ 7:30 မူင်းၼၼ်ႉ ၸုမ်းၵွင်ႈၵၢင်ၼင်ႇၵၼ် ယိုဝ်း ၵၼ် တီႈၼႂ်းဝၢၼ်ႈ ပၢင်လူင် ဢိူင်ႇပၢင်လူင်သေ မၢၵ်ႇၵွင်ႈတိူဝ်ႉသႂ်ႇ လုင်းၸၢမ်ႇထုၼ်း ၶဝ်ႈၶမ်ၼႂ်းပွတ်ႇမၼ်းၸၢႆး။ ယူႇတီႈၸုမ်းၸွႆႈထႅမ် ပရႁိတ ၸႄႈဝဵင်းသီႇပေႃႉ လႆႈၵႂႃႇဢဝ်တူဝ်လုင်းၸၢမ်ႇထုၼ်း မႃးယူတ်းယႃတူဝ်တီႈ ႁူင်းယႃ သီႇပေႃႉ။

ထိုင်မႃး ဝၼ်းတီႈ 14/09/2018 ၾၢႆႇမေႃယႃ ၸႄႈဝဵင်းသီႇပေႃႉ ႁၢင်ႈႁႅၼ်း သူင်ႇတူဝ် လုင်းၸၢႆးၸၢမ်ႇထုၼ်း ၵႂႃႇ ယူတ်းယႃ ပိူဝ်ႈတႃႇၽႃႇတတ်းဢဝ်ဢွၵ်ႇမၢၵ်ႇၵွင်ႈဢၼ်ၶမ်ဝႆႉ တီႈႁူင်းယႃ ဝဵင်းလိူဝ်ႇ။

တႄႇဢဝ်ႁူဝ်လိူၼ်သႅပ်ႊထႅမ်ႊၿိူဝ်ႊၼႆႉမႃး ၵူၼ်းမိူင်း ၼႂ်းၸႄႈဝဵင်းၼမ်ႉတူႈ ၼပ်ႉႁူဝ်ႁဵင် လႆႈဢွၼ်ၵၼ်ပၢႆႈၽေးသိုၵ်း ယွၼ်ႉၸုမ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ်၊ ယၢမ်းလဵဝ် ပွၵ်ႈမိူဝ်းဝၢၼ်ႈၵဝ်ႇၽႂ်မၼ်းယဝ်ႉ။ ၼႂ်းပိုၼ်ႉတီႈၼႆႉ ၵႆႉၵႆႉပဵၼ်ပၢင်တိုၵ်းလႄႈ ၵူၼ်းဝၢၼ်ႈၸိူဝ်းၼႆႉ ၵႆႉၵႆႉလႆႈပၢႆႈ၊ ဢမ်ႇၸၢင်ႈၽုၵ်ႇသွမ်ႈ လုမ်းလႃး သူၼ် ႁႆႈၼႃး ဝႃႈၼႆ။