ၸၢႆးလိၼ်းမႅတ်ႈ ၽူႈတႅၼ်းပႃႇတီႇႁူဝ်သိူဝ် ၵဵပ်းလၢႆးၸိုဝ်ႈ/ မိုဝ်း ၽူႈတႅၼ်းၼႂ်းသၽႃးမိူင်းတႆး တင်းမူတ်း လႆႈ 56 ၵေႃႉသေ တၢင်ႇၸူးထိုင်ႁူဝ်ပဝ်ႈသၽႃးမိူင်းတႆး ႁႂ်ႈယိုၼ်ႈထိုင်လူင်ပွင်ၸိုင်ႈမိူင်းတႆး လွင်ႈၼၢင်းမူဝ်ႁွမ် (ၼမ်ႉၶမ်း) ဢၼ်တပ်ႉသိုၵ်းတဢၢင်း TNLA တီႉၺွပ်းၵႂႃႇၼၼ်ႉ ဝႃႈၼႆ။
ဝၼ်းတီႈ 25/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 7 ဢၼ်ၸတ်းႁဵတ်းတီႈလုမ်း သၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၸၢႆးလိၼ်းမႅတ်ႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းသူႈ ၵဵပ်းသဵၼ်ႈၸိုဝ်ႈ ၽူႈတႅၼ်းၸိူဝ်းၵမ်ႉထႅမ် ႁႂ်ႈလိူင်ႈၼၢင်းမူဝ်ႁွမ် လႆႈသိုပ်ႇ ယိုၼ်ႈၸူး လူင်ပွင်ၸိုင်ႈမိူင်းတႆးၵႂႃႇ ဝႃႈၼႆ။
ၸၢႆးလိၼ်းမႅတ်ႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ “ လၢႆးၸိုဝ်ႈ/ မိုဝ်း ဢၼ်ႁဝ်းၶႃႈ ၵဵပ်းလႆႈတင်းမူတ်း 56 ၵေႃႉ။ လၢႆးၸိုဝ်ႈၼႆႉ ႁဝ်းၶႃႈ လႆႈဢဝ်တၢင်ႇပၼ် တီႈႁူဝ်ပဝ်ႈ သၽႃးမိူင်းတႆးယဝ်ႉ။ ယူႇတီႈႁူဝ်ပဝ်ႈသၽႃးမိူင်းတႆးသေ တေသူင်ႇယိုၼ်ႈထိုင် တီႈလူင်ပွင်ၸိုင်ႈမိူင်းတႆးၵႂႃႇ။ ဢၼ်ႁဝ်းၶႃႈ ၵဵပ်းလၢႆးၸိုဝ်ႈသေ ယိုၼ်ႈထိုင်ၼႆႉ ပိူင်လူင်မၼ်း ၵူၼ်းမိူင်းတႆးႁဝ်း ႁႂ်ႈမီးလွင်ႈႁူမ်ႇလူမ်ႈ လွင်ႈၼႆႉ မၼ်းပဵၼ်ပုၼ်ႈၽွၼ်းလူင်ပွင်ၸိုင်ႈမိူင်းတႆးႁဝ်းၶႃႈယဝ်ႉ။ မိူၼ်ၼင်ႇ ၼၢင်းမူဝ်ႁွမ်ၵေႃႈ ပဵၼ်ၵူၼ်းမိူင်းတႆးၵေႃႉၼိုင်ႈ သေ ႁႂ်ႈလႆႈပွႆႇတူဝ်လွတ်ႈဢွၵ်ႇမႃးလီလီ ယွၼ်ႉၼၼ်လႄႈ ႁဝ်းၶႃႈ ၸင်ႇဢွၼ်လူင်းလၢႆးမိုဝ်းသေ တၢင်ႇထိုင်ၵႂႃႇ” ဝႃႈၼႆ။
ၼၢင်းမူဝ်ႁွမ် မႄႈလုၵ်ႈဢွၼ်ႇ 3 ၵေႃႉ ၸႄႈဝဵင်းၼမ်ႉၶမ်းၼႆႉ ထုၵ်ႇတပ်ႉသိုၵ်းတဢၢင်း TNLA ၵုမ်းၶင်တူဝ်ၵႂႃႇ မိူဝ်ႈဝၼ်းတီႈ 17/08/2018 ၼၼ်ႉသေ တေႃႇထိုင်ယၢမ်းတေႃႈလဵဝ် ပႆႇပွႆႇပၼ်ၶိုၼ်း ဝႃႈၼႆ။
ၼၢင်းၶိၼ်ႇထႃးယီႇ ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ တၢင်ႇပၼ်ႁူဝ်ပဝ်ႈ သၽႃးႁဝ်း မိူဝ်ႈၼႆႉ။ လွင်ႈတေႁဵတ်းၸိူင်ႉႁိုဝ် ဢၼ်ဝႃႈၼၼ်ႉ မၼ်းယူႇတီႈလူင်ပွင်ၸိုင်ႈ မိူင်းတႆး ၶဝ်တေတွပ်ႇပၼ် ၵူၺ်း” ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 19/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 3 ဢၼ်ၸတ်း ႁဵတ်းတီႈ လုမ်းသၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၸၢႆးလိၼ်းမႅတ်ႈ ၶိုင်တၢင်ႇထိုင် ၼႂ်းသၽႃး၊ သၽႃးမိူင်းတႆး ဢမ်ႇႁပ်ႉလႄႈ ၸင်ႇလႆႈၵဵပ်းၸိုဝ်ႈသဵင်ၽူႈၵမ်ႉထႅမ်သေ ယိုၼ်ႈၸူးလူင်ပွင်ၸိုင်ႈထႅင်ႈၵမ်း ၼိုင်ႈ ဝႃႈၼႆ။
ၼၢင်းမူဝ်ႁွမ်ၼႆႉ မီးလုၵ်ႈ 3 ၵေႃႉ၊ ပဵၼ်ၵူၼ်းႁႃၵိၼ်လဵင်ႉတွင်ႉသိုဝ်ႈယူဝ်း မိူဝ်ႈပီ 2016 သိုၵ်း TNLA မႃးၵဵပ်းၶွၼ်ႇ (ၶွၼ်ႇႁိူၼ်း/ ၶွၼ်ႇႁၢၼ်ႉၶၢႆၶိူင်ႈ ႁဵတ်းႁိူၼ်း) ၵႂႃႇ 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်း ငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင် ၵေႃႉ ၺႃးသိုၵ်းလူင်ပွင်ၸိုင်ႈမၢၼ်ႈ မူၵ်းယိုဝ်းၸွမ်းတၢင်းတၢႆၵေႃႉၼိုင်ႈ၊ တီႉလႆႈတူဝ် လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်းၾူၼ်းလၢတ်ႈ ဝၼ်းၼၼ်ႉ ၵမ်းလဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်ၵူၺ်းသေ ႁဝ်းဢမ်ႇဢဝ်သၢႆ ၸႂ်ႁဝ်းလႅၵ်ႈ သေပွင်ႇၶၢဝ်ႇလေႃႇ ႁဝ်းဢမ်ႇ ၸႂ်ႈၵူၼ်းဢဝ်ၶၢဝ်ႇပွင်ႇၶၢဝ်ႇပၼ်ၽႂ် ။ ဝၢႆးၼၼ်ႉ ႁိုင်မႃး ပီၼိုင်ႈ ပီ 2018 လိူၼ်ဢေႃႊၵသ်ႉ 17 ဝၼ်း TNLA ၸင်ႇသူင်ႇၵူၼ်း 5 ၵေႃႉ ၵွင်ႈၸေးမိုဝ်းသေ မႃးၶဝ်ႈတီႉဢဝ် ၼၢင်းမူဝ်ႁွမ် ၼႂ်းႁိူၼ်း ပွၵ်ႉႁူဝ်ၼွင် ဝဵင်းၼမ်ႉၶမ်း။ ႁၢၼ်ႉတေႃႇယၢမ်းလဵဝ် ပႆႇပၼ်ၵူၼ်းႁိူၼ်း မၼ်းၼၢင်းႁူပ်ႉထူပ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ