ပေႃႈလဵင်ႉထႆးႁပ်ႉမဝ်ၵေႃႇသၢင်ႈလႄႈ ၵၢၼ်ၵႃႉၶၢႆၵေႃႉၼိုင်ႈ ထုၵ်ႇႁႅမ်တၢႆၼၼ်ႉ သိုဝ်ႇထႆး လၢႆႁွင်ႈၵၢၼ်ဢွၵ်ႇဝႆႉ ၼႄးဝႃႈပဵၼ်ၼမ်ႉမိုဝ်း ႁႅင်းၵၢၼ်ယၢၼ်မိူင်း ၵူၼ်းမိူင်းမၢၼ်ႈ။

ဝၼ်းတီႈ 20/09/2018 သိုဝ်ႇၶၢဝ်ႇထႆး MGR ပိုၼ်ၽၢဝ်ႇဝႃႈ ၸၢႆးၼတ်ႊပၽူၼ်ႊဝိသ်ႊ ဝူင်ႊထၼႃႊၸီႊရၼၢတ်ႊ ဢႃယု 49 ပီ ပဵၼ်ၽူႈႁပ်ႉမဝ်ၵေႃႇသၢင်ႈ ႁဵတ်းပႃးၵၢၼ်ၶၢႆသူင်ႇတၢင်းၵိၼ်ပၢင်ႇလၢႆႇ ၺႃးၶႃႈႁႅမ်တၢႆ တီႈႁိူၼ်း ဢၼ်မီးၼႂ်းမိူင်း သူႊၽၼ်ႊၿူႊရီႊ ၸိုင်ႈထႆးပွတ်းၵၢင်။

မိူဝ်ႈတေပဵၼ်ၼၼ်ႉမၼ်းၸၢႆးလႆႈႁပ်ႉၵူၼ်းႁဵတ်းၵၢၼ်ၸၢဝ်းမၢၼ်ႈၵေႃႉၼိုင်ႈႁဵတ်းၵၢၼ်ၸွမ်း ၸိုဝ်ႈ (ၸၢႆး) သူဝ်း ဢႃယု 22 ပီ ၸၢဝ်းမၢၼ်ႈ ဝၢႆးပဵၼ်လိူင်ႈယဝ်ႉ မၼ်းၸၢႆးသမ်ႉႁၢႆတူဝ်ၵႂႃႇလႄႈ လၢႆၾၢႆႇၸင်ႇၼႄး ဝႃႈပဵၼ်ၼမ်ႉမိုဝ်းမၼ်းၸၢႆး ။ယွၼ်ႉဝႃႈ ဢၼ်ပဵၼ်ႁုၼ်ႇႁၢင်ႈၽြႃးပဵၼ်ၸဝ်ႈ၊ သၢႆၶေႃးလႄႈငိုၼ်း 60’000 ဝၢတ်ႇၵေႃႈ ႁၢႆၵႂႃႇၸွမ်း – ဝႃႈၼႆ ။

တၢင်းၾၢႆႇၸဝ်ႈၼႃႈတီႈ ထၢင်ႇထိူမ်ဝႃႈ ဢၼ်ၶႃႈႁႅမ်ပေႃႈလဵင်ႉတၢႆၶိုၼ်းၼႆႉ ပဵၼ်လုၵ်ႈလဵင်ႉ ဢၼ်တိုၵ်ႉႁပ်ႉ မႃးႁဵတ်းၵၢၼ် ၸွမ်း ၵူၺ်းၵႃႈတေႃႇထိုင်မိူဝ်ႈလဵဝ်ပႆႇတီႉလႆႈတူဝ်လုၵ်ႈလဵင်ႉၵေႃႉၼၼ်ႉ ၵမ်ႈၽွင်ႈဝႃႈ မၼ်းၸၢႆးပွၵ်ႈမိူဝ်းၶိုၼ်းယဝ်ႉ ဝႃႈၼႆ။

သူႊၽၼ်ႊၿူႊရီႊၼႆႉ ၸမ်ၵႂႃႇတၢင်းမိူင်းၵၢၼ်း (ၵၢၼ်းၵျၼၿူႊရီႊ) ပေႃးၶဝ်ႈဢွၵ်ႇ မိူင်းမၢၼ်ႈတေ လႆႈ လတ်းဝဵင်း သင်ၶရၿူႊရီႊသေၶဝ်ႈတၢင်းဝဵင်းၽယႃးသၢမ်သူႇ တွၼ်ႈတႂ်ႈသုတ်းၶွင်ၸႄႈမိူင်းယၢင်းၽိူၵ်ႇ။