ထုင်ႉမၢဝ်း မူႇၸေႊ ၸတ်းပၢင်ပိတ်ႉမၢၵ်ႇၼင်သၢင်ႈလွင်ႈမိုတ်ႈၵိုဝ်း

ၵူၼ်းမိူင်းမူႇၸေႊ ထုင်ႉမၢဝ်း ၸတ်းႁဵတ်းပၢင်လဵၼ်ႈမၢၵ်ႇၼင် ပွၵ်ႈၵမ်း 17 သေ သၢင်ႈလွင်ႈမိုတ်ႈၵိုဝ်း။

ဝၼ်းတီႈ 22/09/2018 ယၢမ်းဝၢႆးဝၼ်း 3 မူင်း ထိုင် 6 မူင်းႁူဝ်ၶမ်ႈ ၸုမ်းၵႅပ်ႇၶမ်း၊ ထုင်ႉမၢဝ်းႁၢင်ႊလီႊ၊ ၸုမ်းလွၼ်ႉ မၢဝ်းၶမ်းလႄႈ ၸုမ်းၾၢင်ႇမၢဝ်းၶဵဝ် ႁူမ်ႈၵၼ် လဵၼ်ႈမၢၵ်ႇၼင်လွမ်ႈ ပဵၼ်ဝၼ်းလိုၼ်းသုတ်း တီႈၵၢင်ပၢင်ႇၵႅပ်ႇၶမ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ႁႂ်ႈပီႈၼွင်ႉထုင်ႉမၢဝ်း မိုတ်ႈၵိုတ်းၸမ်ၸႂ် ဝႃႈၼႆ။

လုင်းၸၢႆးၸဝ်ႉ ၵူၼ်းလဵၼ်ႈမၢၵ်ႇၼင် တီႈမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ ၸတ်းႁဵတ်း ပၢင် လဵၼ်ႈမၢၵ်ႇၼင်လွမ်ႈလႄႈ လွင်ႈမိုတ်ႈၵိုဝ်းထုင်ႉမၢဝ်းၼႆႉ ယိူင်းဢၢၼ်းႁဝ်းၶႃႈတႄႉ ၵႅတ်ႇၶႄလွင်ႈယႃႈမဝ်းၵမ် ႁႂ်ႈလုၵ်ႈ ဢွၼ်ႇႁဝ်း သူၼ်ၸႂ်လွင်ႈလဵၼ်ႈႁႅင်းမႃးသေ ႁႂ်ႈၶဝ်ငိူင်ႉဝႄႈ လွင်ႈယႃႈမဝ်းၵမ်။ လွင်ႈၶဝ်ႈဢွၵ်ႇၸွႆႈထႅမ် ၵၼ် လွင်ႈလီလွင်ႈၸႃႉ၊ လွင်ႈပၢႆးမၢၵ်ႈမီး ၸိူဝ်းၼႆႉႁႂ်ႈမေႃသၢၼ်မိုဝ်းၵၼ်ႁူမ်ႈႁွမ်းၵၼ် ႁဵတ်းသၢင်ႈ ၸိူဝ်းၼႆႉ” ဝႃႈၼႆ။

ပၢင်လဵၼ်ႈမၢၵ်ႇၼင်သၢင်ႈလွင်ႈမိုတ်ႈၵိုဝ်းၼႂ်းထုင်ႉမၢဝ်း ပွၵ်ႈၵမ်း 17 ၼႆႉ တင်းမူတ်း မီးၸုမ်းလဵၼ်ႈမၢၵ်ႇၼင်ႇ 4 ၸုမ်း မိူၼ်ၼင်ႇ ၸုမ်းၵႅပ်ႇၶမ်း၊ ထုင်ႉမၢဝ်းႁၢင်ႊလီႊ၊ ၸုမ်းလွၼ်ႉမၢဝ်းၶမ်းလႄႈ ၸုမ်းၾၢင်ႇမၢဝ်းၶဵဝ် ၸိူဝ်းၼႆႉ။

ပၢင်လဵၼ်ႈမၢၵ်ႇၼင်လွမ်ႈၼႆႉ တႄႇၸတ်းႁဵတ်းၼႂ်းဝၼ်းတီႈ 22/08/2018 တေႃႇထိုင် ဝၼ်းတီႈ 22/09/2018 ။ ၵၢင်ပၢင်ႇလႅၼ်ႈမၢၵ်ႇၼင်ၼႆႉ ၸတ်းႁဵတ်းတီႈပၢင်ၵႅပ်ႇၶမ်း၊ ပၢင်ၾၢင်ႇမၢဝ်းၶဵဝ်၊ ပၢင်ႇလွၼ်ႉမၢဝ်းၶမ်းလႄႈ ပၢင်ႇၸၼ်ႉ သုင် ၸိူဝ်းၼႆႉ။

ပၢင်လဵၼ်ႈမၢၵ်ႇၼင်လွမ်ႈ မိုတ်ႈၵိုဝ်းထုင်ႉမၢဝ်းၼႆႉ တႄႇၸတ်းႁဵတ်းမႃး မိူဝ်ႈပီ 2002 ၸုမ်းဢၼ်ၵေႃႇတင်ႈၶိုၼ်ႈ မႃးသမ်ႉ ပဵၼ်ထုင်ႉမၢဝ်းႁၢင်ႊလီႊ၊ ၾၢင်ႇမၢဝ်းၶဵဝ်၊ မွၵ်ႇၵွၼ်မၢဝ်းလႄႈ သၢႆၼမ်ႉသွင်ၵႄး ၸိူဝ်းၼႆႉ ဝႃႈၼႆ။