ၽူႈတႅၼ်းၵဵင်းတုင် တုၵ်းယွၼ်း ၼႂ်းသၽႃးႁႂ်ႈၸၼ်ႉၸွမ် ၵဵင်းတုင်မီးၶိုၼ်းႁွင်ႈၵၢၼ် ပူင်သွၼ်ၾၢႆႇမၢႆမီႈ

မိူဝ်ႈတႄႇပိုတ်ႇၸၼ်ႉၸွမ် ၵဵင်းတုင်ၼၼ်ႉ မီးႁွင်ႈၵၢၼ်ပူင်သွၼ်ၾၢႆႇမၢႆမီႈ Law Department မႃးယူႇ ဢိုတ်းပႅတ်ႈမိူဝ်ႈပီ 2017 လႄႈ ႁဵတ်းႁႂ်ႈလုၵ်ႈႁဵၼ်းၾၢႆႇမၢႆမီႈ ၸိူဝ်းယူႇပွတ်းဢွၵ်ႇၶူင်း လႆႈၵႂႃႇႁဵၼ်းတၢင်ႇတီႈလႄႈ ၽူႈတႅၼ်းတုၵ်းယွၼ်း ႁႂ်ႈပိုတ်ႇပၼ်ၶိုၼ်း ဝႃႈၼႆ။

ဝၼ်းတီႈ 24/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 5 ဢၼ်ၸတ်းႁဵတ်းတီႈလုမ်းသ ၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၻွၵ်ႊတိူဝ်ႊဝုၼ်ႇၼႃႉသူဝ်း ၽူႈတႅၼ်းသၽႃးၸႄႈ မိူင်း ၸႄႈဝဵင်းၵဵင်းတုင် တွင်ႈထၢမ် တုၵ်းယွၼ်းၼႂ်းပၢင်ၵုမ်သၽႃးၸႄႈမိူင်းတႆး လွင်ႈဢၼ်ယၢမ်ႈပူင်သွၼ်မႃး ၾၢႆႇ မၢႆ မီႈတီႈၸၼ်ႉၸွမ်ၵဵင်းတုင်ၼၼ်ႉ ႁႂ်ႈလႆႈၶႂၢင်ႉပူင်သွၼ်ၶိုၼ်းၼႆသေ တွင်ႈထၢမ်ၾၢႆႇမီးပုၼ်ႈၽွၼ်း ၸွင်ႇတေ မီးၽႅၼ်ၵၢၼ် ပိုတ်ႇပူင်သွၼ်ပၼ်ၶိုၼ်း ဝႃႈၼႆ။

ၻွၵ်ႊတိူဝ်ႊဝုၼ်ႇၼႃႉသူဝ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ၽႃသႃၾၢႆႇပၵ်းပိူင်ၼႆႉ ၼႂ်းၸၼ်ႉၸွမ်ၵဵင်းတုင် လႆႈတႄႇၶႂၢင်ႉသွၼ်ႁဵၼ်းမႃး ထိုင် 2016။ လုၵ်ႈႁဵၼ်းၸၢဝ်းၶိူဝ်း ဢၼ် ဢွင်ႇပူၼ်ႉၸၼ်ႉသိပ်း မိူၼ်ၼင်ႇ ၵဵင်းတုင်၊ မိူင်းၽျၢၵ်ႈ၊ တႃႈၶီႈလဵၵ်း ၸဵမ်ၸိူဝ်းၼႆႉ ဢွၼ်ၵၼ်မႃးၶိုၼ်ႈႁဵၼ်းဢဝ် ၾၢႆႇ ပၵ်းပိူင် တီႈၸၼ်ႉၸွမ်ၵဵင်းတုင်ၵၼ်။ တေႃႈလဵဝ် လႆႈၵႂႃႇႁဵၼ်းဢဝ် တီႈၸၼ်ႉၸွမ်တူၼ်ႈတီး။ ၵွပ်ႈ ၼႆလႄႈ လုၵ်ႈ ႁဵၼ်း ဢၼ်ၵႂႃႇၶိုၼ်ႈႁဵၼ်းဢဝ်တီႈၸၼ်ႉၸွမ်တူၼ်ႈတီးၼၼ်ႉ ယၢပ်ႇၽိုတ်ႇတွၼ်ႈတႃႇၶဝ်တႄႉ”ဝႃႈၼႆ။

ၼႂ်းၸႄႈဝဵင်းၵဵင်းတုင်ၼႆႉ တင်းမူတ်း မီးၸၼ်ႉၸွမ် 3 တီႈ မိူၼ်ၼင်ႇ ၸၼ်ႉၸွမ်ၵဵင်းတုင်၊ ၸၼ်ႉၸွမ်ၶွမ်ႊၽိဝ်ႊတိူဝ်ႊ လႄႈ ၸၼ်ႉၸွမ်ပၢႆးၸၢၵ်ႈ ၸိူဝ်းၼႆႉ။

ၻွၵ်ႊတိူဝ်ႊမဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း သပ်းလႅင်းတွပ်ႇလၢတ်ႈၼႄဝႃႈ “ ၼႂ်းၸၼ်ႉၸွမ်ၵဵင်းတုင်ၼႆႉ ပႆႇ ပိုတ်ႇဝႆႉ ပၢႆးပၺ်ၺႃ ၾၢႆႇမၢႆမီႈ ၾၢႆႇပၢႆးၸႂ်လႄႈ ၾၢႆႇပၢႆးမၢၵ်ႈမီး။ တွၼ်ႈတႃႇတေပိုတ်ႇႁွင်ႈၵၢၼ်ပၢႆးပၺ်ၺႃ ၾၢႆႇမၢႆမီႈၼႆႉ တေလႆႈယွၼ်းၶႂၢင်ႉတီႈၽွင်းလူင်၊ ႁူဝ်ၵူၼ်းလုၵ်ႈႁဵၼ်းမီးၵႃႈႁိုဝ်၊ ဢဵၼ်ႁႅင်းၶူးသွၼ်၊ ၽူႈႁၢပ်ႇၵၢၼ်၊ ငိုၼ်းတႃႇၸႂ်ႉၸၢႆႇ ၸဵမ်ၸိူဝ်းၼႆႉ တဵမ်ထူၼ်ႈၵူႈလွင်ႈ ၸင်ႇတေလႆႈၶႂၢင်ႉပိုတ်ႇလႆႈ။ တေႃႈၼင်ႇ ပၢင်သွၼ်လုၵ်ႈႁဵၼ်းၸၼ်ႉၸွမ်တၢင်း ၵႆ(အဝေးသင်) ပီ 2018-2019 ၶဝ်ၵေႃႈ ပႆႇၸၢင်ႈလႆႈႁဵၼ်းၾၢႆႇမၢႆမီႈ၊ ၾၢႆႇပၢႆးၸႂ်လႄႈ ၾၢႆႇပၢႆးမၢၵ်ႈမီး ယင်းပႆႇၸၢင်ႈပိုတ်ႇ” ဝႃႈၼႆ။

မိူဝ်ႈပီ 1988 တီႈဝဵင်းၵဵင်းတုင် တေပိုတ်ႇပဵၼ်ၸၼ်ႉၸွမ်ဢွၼ်ႇ ၻီႊၵရီႊၶေႃႊလဵၵ်ႉ ထိုင်မႃး ပီ 2007 ယုၵ်ႉၶိုၼ်ႈပဵၼ် ၸၼ်ႉၸွမ်ၵဵင်းတုင် ယင်းပူၵ်းတင်ႈပႃး ၸၼ်ႉၸွမ်ၾၢႆႇၸၢၵ်ႈ၊ ၾၢႆႇၶွမ်ႊၽိဝ်ႊတိူဝ်ႊ။ ၵဵဝ်ႇၵပ်းၾၢႆႇမၢႆမီႈသေ ပီ 2008 တေႃႇပီ 2016 မီးလုၵ်ႈႁဵၼ်းၶဝ်ႈႁဵၼ်း 524 ၵေႃႉ။ တႄႇပီ 2017 မႃးသူင်ႇၶၢႆႉၵႂႃႇႁဵၼ်းၸၼ်ႉၸွမ်တူၼ်ႈတီႈမူတ်းယဝ်ႉ ဝႃႈၼႆ။