ပႃႇတီႇသိူဝ်ၽိူၵ်ႇ SNDP တႄႇလူင်းသူၼ်းတုမ် ႁႃသဵင်ၵမ်ႉထႅမ် တႃႇပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်း ဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ 2018 တေထိုင်မႃးၼႆႉ ဝႃႈၼႆ။
ၼႂ်းႁူဝ်လိူၼ်သႅပ်ႊထႅမ်ႊၿိူဝ်ႊ 2018 ၼႆႉမႃး ပႃႇတီႇသိူဝ်ၽိူၵ်ႇ SNDP လူင်းႁူပ်ႉထူပ်း သူၼ်းတုမ်ၵူၼ်းမိူင်း ၼႂ်းတိူင်း တႃႈလိူဝ်ႇ တင်း ၸႄႈဝဵင်းလၢႆးၶႃႈ ၼေႃႇၽူႈတႅၼ်းဢၼ်ၶဝ်ႈၶႅင်ႇသမ်ႉ တီႈၼင်ႈၽူႈတႅၼ်းသၽႃးၵူၼ်းမိူင်း ၸႄႈဝဵင်း လၢႆးၶႃႈ ပဵၼ်ၸၢႆးသူၺ်ႇသႅင်း၊ တီႈၼင်ႈၽူႈတႅၼ်း ၽွင်းလူင်ၾၢႆႇၸၢဝ်းၶိူဝ်းတႆး ၼႂ်းတိူင်းဝဵင်းတႃႈလိူဝ်ႇသမ်ႉ ပဵၼ် လုင်းၸၢႆးၵျေႃႇဢုင်း ၸဵမ်ၸိူဝ်းၼႆႉ။
လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP လၢတ်ႈတီႈၽူႈတွႆႇႁွၵ်ႈဝႃႈ “ ပေႃးပေႉပၢင်လိူၵ်ႈတင်ႈသွမ်ႈ 2 တီႈ ၼင်ႈၼႆႉ ႁဝ်းၶႃႈ တေႁဵတ်းပၼ်တွၼ်ႈတႃႇၵူၼ်းမိူင်းတႆး မိူၼ်ၼင်ႇ လွင်ႈသုၼ်ႇလႆႈသုၼ်ႇပဵၼ်ၵူၼ်းမိူင်းတႆး ႁႂ်ႈလႆႈ ၽဵင်ႇပဵင်းၵၼ်၊ တေပူၵ်းပွင်ပၼ် လွင်ႈသဵၼ်ႈတႃႈသၢႆတၢင်း ၵႂႃႇမႃးႁႃၵၼ်၊ လွင်ႈပၢႆးပၺ်ၺႃ၊ လွင်ႈ ပၢႆးယူႇလီ၊ ၾႆးၾႃႉ ၸိူဝ်းၼႆႉ ပဵၼ်ဢၼ်လွင်ႈယၢပ်ႇၽိုတ်ႇၵူၼ်းမိူင်းတႆးႁဝ်း တိုၵ်ႉတူၵ်းတႅမ်ႇယူႇ ပေႃးႁဝ်းပေႉမႃး ႁဝ်းတေၸွႆႈပၼ်/ ႁဵတ်းပၼ်” ဝႃႈၼႆ။
တီႈၼင်ႈၽွင်းလူင်ၸၢဝ်းၶိူဝ်းတႆး ၼႂ်းတိူင်းဝဵင်းတႃႈလိူဝ်ႇ(မၼ်းတလေး)ၼႆႉ တေမီးၼေႃႇၽူႈတႅၼ်း ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇၼူၵ်ႉယုင်း၊ ပႃႇတီႇသၢင်ႇသီႈလႄႈ သုၼ်ႇလဵဝ် 1 ၵေႃႉ ၶဝ်ႈၶႅင်ႇၵၼ် ဝႃႈၼႆ။
တီႈၼင်ႈၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈသမ်ႉ တေမီးၼေႃႇၽူႈတႅၼ်းပႃႇတီႇႁူဝ်သိူဝ် ၸၢႆးဢူၵ်ႉၵႃႇ၊ ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ ၸၢႆးသူၺ်ႇသႅင်းလႄႈ ၼေႃႇၽူႈတႅၼ်းပႃႇတီႇၼူၵ်ႉယုင်း ၸၢႆးဢွင်ႇထုၼ်းလေး ၸိူဝ်းၼႆႉ။
တီႈၼင်ႈသၽႃးဢၼ်လုတ်ႈႁၢမ်းပဝ်ႇဝႆႉ တင်းမူတ်း မီး 13 တီႈၼင်ႈ။ ၼႂ်း 13 တီႈၼင်ႈၼၼ်ႉ ပႃးၼႂ်းမိူင်းတႆး ၼိုင်ႈ တီႈၼင်ႈ ပဵၼ်တီႈၼင်ႈၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ။ ပၢင်လူင်းသူၼ်းတုမ်ႁႃသဵင်ၼႆႉ ယူႇတီႈၶွမ်ႊမ သျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ်ပၼ်ၶႂၢင်ႉသူၼ်းတုမ် တႃႇၶၢဝ်းတၢင်း 60 ဝၼ်း လိူၼ်သႅပ်ႊထႅမ်ႊၿိူဝ်ႊ တင်း ၼူဝ်ႊဝႅမ်ႊၿိူဝ်ႊ – ပၢင်လိူၵ်ႈတင်ႈသွမ်ႈတႄႉ တေၸတ်းႁဵတ်းၼႂ်းဝၼ်းတီႈ 03/11/2018 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ