ဝၼ်းငမ်းယဵၼ်လုမ်ႈၾႃႉၼၼ်ႉ ၵူၼ်းမိူင်း ႁိမ်း 200 လႆႈဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ၼႂ်းဢိူင်ႇဝၢၼ်ႈ ၸၢမ် ယွၼ်ႉသိုၵ်း TNLA တင်း RCSS ပဵၼ်ပၢင်တိုၵ်းႁၢဝ်ႈႁႅင်း ၼႂ်းၸႄႈဝဵင်းၼမ်ႉတူႈ။
ဝၼ်းတီႈ 21/09/2018 ပဵၼ်ဝၼ်းငမ်းယဵၼ်လုမ်ႈၾႃႉ (International day of peace) ၵူၼ်းမိူင်း ဝၢၼ်ႈၼွင် ဢေႃႈ၊ ဝၢၼ်ႈၼႃးငူးလႄႈ ဝၢၼ်ႈၼႃးႁၢင်း ဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉ တီႈၵျွင်းႁွင်ႇဝၢၼ်ႈၸၢမ် ၸႄႈဝဵင်း ၼမ်ႉ တူႈ တင်းမူတ်း ႁူဝ်ၵူၼ်း မီး 183 ၵေႃႉ။ ၸၢႆး 86 ၵေႃႉ၊ ယိင်း 97 ၵေႃႉ ဝႃႈၼႆ။
လုင်းၸၢႆးပႃႉၺုၼ်ႇ ၵႅမ်ၶွမ်ႊမတီႊ ၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ။ ၵူၼ်းပၢႆႈၽေးသိုၵ်းႁဝ်း ႁွတ်ႈၽႅဝ်မႃး တီႈၵျွင်းႁွင်ႇဝၢၼ်ႈၸၢမ် ႁူဝ်ၵူၼ်း ႁိမ်း 200 ၵေႃႉ ၶိုၼ်းဢွၼ် ၵၼ်ပွၵ်ႈမိူဝ်းၶိုၼ်းယဝ်ႉ။ ဝၼ်းသဝ်တႄႉ ၵူၼ်းဝၢၼ်ႈၼွင်ဢေႃႈ ဢွၼ်ၵၼ်ပွၵ်ႈမိူဝ်း။ ၵူၼ်းဝၢၼ်ႈၼႃးငူး တင်း ဝၢၼ်ႈ ၼႃးႁၢင်းတႄႉ တိုၵ်ႉမိူဝ်း ၵၼ် မိူဝ်ႈဝႃး ဝၼ်းဢႃးတိတ်ႉၼႆႉၵူၺ်း။ တေႃႈလဵဝ်တႄႉ ၵူၼ်းပၢႆႈၽေး တီႈၵျွင်းႁွင်ႇႁဝ်းၶႃႈ တႄႉ ဢမ်ႇမီးၽႂ်ယဝ်ႉ” ဝႃႈၼႆ။
ၵူၼ်းဝၢၼ်ႈ ဢၼ်ဢွၼ်ၵၼ်ပၢႆႈမႃးသွၼ်ႈဝႆႉတီႈ ၵျွင်းႁွင်ႇဝၢၼ်ႈၸၢမ်ၼႆႉ ၵူၼ်းဝၢၼ်ႈၼွင်ဢေႃႈ လင်ႁိူၼ်း 28 လင် ၸၢႆး 56 ၵေႃႉ၊ ယိင်း 63 ၵေႃႉ ႁူမ်ႈၵၼ် 119 ၵေႃႉ။ ၵူၼ်းဝၢၼ်ႈၼႃးငူး လင်ႁိူၼ်း 9 လင်၊ ၸၢႆး 17 ၵေႃႉ၊ ယိင်း 17 ၵေႃႉ ႁူမ်ႈၵၼ် 34 ၵေႃႉ။ ၵူၼ်းဝၢၼ်ႈၼႃးႁၢင်း လင်ႁိူၼ်း 9 လင်၊ ၸၢႆး13 ၵေႃႉ၊ ယိင်း 17 ၵေႃႉ ႁူမ်ႈၵၼ် 30 ၵေႃႉ တင်းမူတ်း လင်ႁိူၼ်း ႁူမ်ႈၵၼ် 46 လင်၊ ၸၢႆး 86 ၵေႃႉ၊ ယိင်း 97 ၵေႃႉ ဝႃႈၼႆ။
ၵူၼ်းပၢႆႈၽေးသိုၵ်း ဝၢၼ်ႈၼႃးငူး ၵေႃႉၼိုင်ႈလၢတ်ႈဝႃႈ “ သဵင်ၵွင်ႈသဵင်မၢၵ်ႇလူင် တႅၵ်ႇလႄႈ ႁဝ်းၶႃႈ ၵူၼ်းဝၢၼ်ႈ ၼႅတ်ႈဢွၼ်ၵၼ်လႅၼ်ႈပၢႆႈ မႃးသွၼ်ႈဝႆႉတီႈ ၵျွင်းႁွင်ႇဝၢၼ်ႈၸၢမ်။ လႆႈႁၼ်သိုၵ်းၶူဝ်းလၢႆး တင်း သိုၵ်းလွႆ တူင်ႉၼိုင် ၶဝ်ႈၸမ်ၵၼ်ႁႅင်းၼႃႇ။ တေႃႈလဵဝ်တႄႉ ႁဝ်းၶႃႈ ၵူၼ်းဝၢၼ်ႈၵႂႃႇၵႂႃႇမႃးမႃး ဢဝ်ငဝ်းလၢႆးမၼ်းဝႃႈၵူၺ်းၶႃႈယဝ်ႉ” ဝႃႈၼႆ။
မိူဝ်ႈဝၼ်းတီႈ 20/09/2018 ၼၼ်ႉၵေႃႈ သိုၵ်း TNLA တင်း သိုၵ်း RCSS ပဵၼ်ပၢင်တိုၵ်းၵၼ် တၢင်းပွတ်းဝၢၼ်ႈၶိုမ်း မႂ်ႇ ၼႂ်းၵိင်ႇၸႄႈဝဵင်းမိူင်းငေႃႉ၊ ၸႄႈတွၼ်ႈၵျွၵ်ႉမႄး။ ၼၼ်ႉၵေႃႈ ပဵၼ်ပၢင်တိုၵ်းၵၼ် မွၵ်ႈ 2 ၸူဝ်ႈမူင်းၼင်ႇၵဝ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ