ၽူႈတႅၼ်းသၽႃးမိူင်းပၼ်ႇ တၢင်ႇၼႂ်းပၢင်ၵုမ်သၽႃးမိူင်းတႆး လွင်ႈၵႃးဢမ်ႇမီးၶွၼ်ႇ တႃႇလႆႈဝႂ်ၶွၼ်ႇပဵၼ်တၢင်းၵၢၼ် ၼၼ်ႉ သၽႃးမိူင်းတႆးဢမ်ႇႁပ်ႉ။
ဝၼ်းတီႈ 20/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 4 ဢၼ်ၸတ်းႁဵတ်းတီႈ လုမ်း သၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၸၢႆးၼွင်ႉ ၽူႈတႅၼ်းသၽႃးၸႄႈမိူင်းၶဵတ်ႇ လိူၵ်ႈတင်ႈ မၢႆ 1 ၸႄႈဝဵင်းမိူင်းပၼ်ႇ တၢင်ႇထိုင် ၼႂ်းသၽႃးမိူင်းတႆး တွၼ်ႈတႃႈရူတ်ႉၵႃး ၵူၼ်းမိူင်း ဢမ်ႇမီးဝႂ်ၶွၼ်ႇ ၼင်ႇႁိုဝ်တေလႆႈ သဵၼ်ႈတၢင်းသေဢၼ်ဢၼ် ႁဵတ်းပၼ်မၢႆၾင်/ဝႂ်ၶွၼ်ႇၼၼ်ႉ ဢမ်ႇပႆႇပဵၼ်ၵၢၼ်။
ၸၢႆးၼွင်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ႁႂ်ႈ ႁဵတ်းပၼ်ဝႂ်ရူတ်ႉၵႃး တီႈဢၼ်ဢမ်ႇမီးဝႂ်ၼၼ်ႉ ႁႂ်ႈမီးလွင်ႈမၵ်းမၢႆႁပ်ႉႁွင်းဢၼ်ၼိုင်ႈ တႃႇၵူၼ်းမိူင်း။ ၵႃးတီႈဢၼ် ဢမ်ႇမီးဝႂ် ႁေႃႈၵႂႃႇမႃးၼႂ်းမိူင်းႁဝ်းၶႃႈၼၼ်ႉ လူင်ပွင်ၸိုင်ႈၵေႃႈဢမ်ႇလႆႈၶွၼ်ႇ။ ထႅင်ႈဢၼ်ၼိုင်ႈ ပေႃးႁဝ်းၶႃႈႁဵတ်း ပၼ်ဝႂ် ပၼ်ၵူၼ်းမိူင်းၼႆၸိုင် ၶွၼ်ႇၵေႃႈတေလႆႈၶဝ်ႈမႃး ၼႂ်းလူင်ပွင်ၸိုင်ႈႁဝ်းၶႃႈဢၼ်ၼိုင်ႈ။ လိူင်ႈပၼ်ႁႃ ၵႃးၽႃႇ/ တမ်ၵၼ်မႃးၼႆႉ ႁဝ်းၸၢင်ႈႁူႉလႆႈဝႃႈ ပဵၼ်ၵႃးၽႂ် ၸိူဝ်းၼၼ်ႉ။ မိူဝ်ႈလဵဝ် လႆႈႁၼ် ၵႃးတၢင်ႇယႃႈႁိုဝ်ႉ၊ တၢင်ႇမႆႉႁိုဝ်ႉ ၽႃႇၵူၼ်းႁိုဝ်ႉၼႆ ႁဝ်းၶႃႈလႆႈႁၼ်ဝႆႉဝႃႈ ပဵၼ်ရူတ်ႉၵႃး ဢမ်ႇမီးဝႂ်ၶွၼ်ႇ ၸိူဝ်းၼၼ်။ ယွၼ်ႉၼၼ် တၢင်းၾၢႆႇၵူၼ်းမိူင်း ၵေႃႈ ႁႂ်ႈၶဝ်လႆႈဢုၼ်ႇၸႂ်ၸိူင်ႉၼၼ်ၶႃႈ” ဝႃႈၼႆ။
ၶေႃႈတၢင်ႇထိုင် ၼႂ်းပၢင်ၵုမ်သၽႃးၸႄႈမိူင်းတႆး ၵဵဝ်ႇလူၺ်ႈ လွင်ႈရူတ်ႉၵႃးဢမ်ႇမီးဝႂ်ၶွၼ်ႇၼႆႉ ၽူႈတႅၼ်းသၽႃး ၸႄႈမိူင်း ၼႂ်းၸႄႈဝဵင်းလွၵ်ႉၸွၵ်ႇ NLD ဢူးၶၢႆႇၺီႇၺီႇၵျေႃႇ တင်း ၽူႈတႅၼ်းသၽႃးၸႄႈမိူင်း ၸႄႈဝဵင်းလၢင်းၶိူဝ်း ၸၢႆးဢွင်ႇမဵဝ်းၵျေႃႇ SNLD ၵမ်ႉထႅမ်ဢုပ်ႇဢူဝ်း ဝႃႈၼႆ။
ၸၢႆးၼွင်ႉ လၢတ်ႈဝႃႈ “ တေႃႈလဵဝ် ရူတ်ႉၵႃး ဢမ်ႇမီးဝႂ်ၶွၼ်ႇ မၼ်းလိူင်ႇၼမ် လွင်ႈၼႆႉ မၼ်းဢမ်ႇၸႂ်ႈတၢင်းၽိတ်း ၵူၼ်းမိူင်း။ လူင်ပွင်ၸိုင်ႈၵူႈပၢၼ်ပၢၼ် ဢၼ်ၽွင်းငမ်းမႃးၼႆႉ လွင်ႈပၵ်းပိူင်မၢႆမီႈသုမ်ႇငမ်း ၸွမ်းလႅၼ်လိၼ်ၼႆႉ တေ လႆႈဝႃႈ ပဵၼ်ဢၼ်ယူပ်ႈယွမ်းဝႆႉ” ဝႃႈၼႆ။
ၽူႈတႅၼ်းသၽႃးမိူင်းတႆး ဢၼ်ၶဝ်ႈႁူမ်ႈပၢင်ၵုမ် တင်းမူတ်း 118 ၵေႃႉ။ ၼႂ်းၼၼ်ႉ ဢၼ်ၵမ်ႉထႅမ် ၶေႃႈတၢင်ႇထိုင် ၸၢႆးၼွင်ႉ 53 ၶႅပ်း။ ဢၼ်သၢၼ်ၶတ်း မီး 58 ၶႅပ်း ဝႃႈၼႆ။
မိူဝ်ႈပီ 2005 ၼၼ်ႉ ပဵၼ်ပၢၼ်တပ်ႉသိုၵ်းလူင်ပွင်ၸိုင်ႈမၢၼ်ႈ ဢုပ်ႉပိူင်ႇၽွင်းငမ်းလႄႈ ရူတ်ႉၵႃး ဢၼ်ဢမ်ႇမီးၶွၼ်ႇ တီႉၺွပ်း မႃးယဝ်ႉၵမ်းၼိုင်ႈ။ ယွၼ်ႉၼၼ် ၵူၼ်းမိူင်းယၢမ်ႈလႆႈ လူႉသုမ်းမႃးယဝ်ႉပွၵ်ႈၼိုင်ႈ ယွၼ်ႉၵႃးဝိတ်ႉတွၵ်ႉသေ ဢမ်ႇၶႂ်ႈ ႁႂ်ႈၵူၼ်းမိူင်းသုမ်းယဝ်ႉသုမ်းထႅင်ႈ” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ