လူင်ပွင်ၸိုင်ႈမိူင်းၶႄႇ ပူၼ်ႉပႅၼ်ၶဝ်ႈမႃးတၢင်းမိူင်းတႆး ပွတ်းႁွင်ႇသေ မႃးၶုတ်းႁွင်ႈ ၵေႃႇတႅၼ်ႈႁဵတ်းႁူဝ်ႉ ၶႅၼ်ႈၵၼ် လႅၼ်လိၼ်တႆး – ၶႄႇ ဝႃႈၼႆ။
ဝၼ်းတီႈ 19/09/2018 လူင်ပွင်ၸိုင်ႈမိူင်းၶႄႇ ပူၼ်ႉပႅၼ် ၶဝ်ႈမႃးၼႂ်းၶွပ်ႇလႅၼ်ၶႅၼ်ႈ သွင်မိူင်း မိူင်းတႆး – မိူင်းၶႄႇသေ ဢဝ်ၶိူင်ႈၸၢၵ်ႈၶုတ်းလိၼ် မႃးၶုတ်းႁွင်ႈ ၵေႃႇတႅၼ်ႈႁဵတ်းႁူဝ်ႉ လႅၼ်ၶႅၼ်ႈ သွင်မိူင်း ၼိူဝ်သဵၼ်ႈတၢင်း ႁိမ်းဝၢၼ်ႈၾၢႆႇ ၵွင်း ၵိင်ႇၸႄႈဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။
ၵူၼ်းမိူင်း ပၢင်ႇသၢႆး လၢတ်ႈဝႃႈ “ ၾၢႆႇမိူင်းၶႄႇပူၼ်ႉၶဝ်ႈမႃးၼႂ်းလိၼ်တႆး မီးမွၵ်ႈ 25 ထတ်း။ ယူႇတီႈၾၢႆႇ ၸဝ်ႈၼႃႈတီႈ မိူင်းမၢၼ်ႈ ၵႂႃႇႁၢမ်ႈလႄႈ တၢင်းၾၢႆႇၶႄႇၶဝ် လႆႈၵိုတ်းယင်ႉၵႃး။ တေႃႈလဵဝ်ၼႆႉ ၵူၼ်းမိူင်းႁဝ်းၶႃႈတၢင်းပၢင်ႇသၢႆးသေ ၵူၼ်းတၢင်းမိူင်းၶႄႇၶဝ် လႆႈဢွၼ်ၵၼ်မႃးထူမ်လိၼ်သႂ်ႇၶိုၼ်းတီႈၼိူဝ်သဵၼ်ႈတၢင်းၼၼ်ႉယူႇ တွၼ်ႈတႃႇတေၵႂႃႇ မႃး ၶိုၼ်းမိူၼ်ၵဝ်ႇ”ဝႃႈၼႆ။
မိူဝ်ႈဝၼ်းတီႈ 20 ၼၼ်ႉ ၸဝ်ႈၼႃႈတီႈၶႄႇ ၶိုၼ်းဢွၼ်မႃးၵဵပ်းဢဝ် ၶိူင်ႈၸၢၵ်ႈ ၶိူင်ႈမႆႉၶိူင်ႈမိုဝ်းၶဝ်ၵႂႃႇၶိုၼ်း ဝႃႈၼႆ။
တီႈဢိူင်ႇၾၢႆႇၵွင်းၼႆႉ ယွၼ်ႉမၼ်းၸမ် မိူင်းတိင် ဢၼ်မီးတၢင်းဝႆႉၼႂ်းမိူင်းၶႄႇၼၼ်ႉ ယွၼ်ႉဝႃႈ ၵူၼ်းမိူင်း တင်းသွင်ၾၢႆႇ ၵႆႉၶဝ်ႈဢွၵ်ႇၵၼ်။ ၼွၵ်ႈလိူဝ်ၼၼ်ႉ ပေႃးထိုင်မႃးဝၼ်းၵၢတ်ႇၸိုင် ၵူၼ်းမိူင်းတၢင်းပၢင်ႇသၢႆး ဢိူင်ႇ ၾၢႆႇၵွင်း ၵႆႉၵႂႃႇသိုဝ်ႉၸၢႆႇၵၢတ်ႇတီႈၼၼ်ႈၵၼ် မီးၶၢဝ်းတၢင်း မွၵ်ႈ 70 ပီယဝ်ႉ ၵူၼ်းဝၢၼ်ႈဢိူင်ႇၾၢႆႇၵွင်း လၢတ်ႈ ၼင်ႇၼႆ။
ဢၼ်ၶႄႇၶဝ်မႃးၶုတ်းႁွင်ႈၼႆႉ ပဵၼ်တီႈႁိမ်းလၵ်းလႅၼ်ၶႅၼ်ႈလႅၼ်လိၼ် ဢၼ်သွင်မိူင်း လႆႈၸႂ်ၵၼ်ဝႆႉ မိူဝ်ႈပီ 1993 ။ ၵူၺ်းၵႃႈ ၶႄႇၶဝ် ပူၼ်ႉပႅၼ်လၵ်းၼၼ်ႉၶဝ်ႈမႃးၼႂ်းလိၼ်မိူင်းတႆးထႅင်ႈ ဝႃႈၼႆ။