ပႃႇတီႇႁူဝ်သိူဝ် လူင်းႁႃသဵင်ၼႂ်းတိူင်းတႃႈလိူဝ်ႇ ႁူပ်ႉၺႃးလွင်ႈၵိတ်ႇၶႂၢင်

ပႃႇတီႇႁူဝ်သိူဝ် လူင်းႁႃသဵင်ၼႂ်းတိူင်းတႃႈလိူဝ်ႇ ၼႂ်းၸႄႈဝဵင်းပၢင်ဢူႈၼၼ်ႉ ၽူႈၵွၼ်းပွၵ်ႉယွမ်ႇ ဢမ်ႇယွၼ်းၶႂၢင်ႉသေ ၶဝ်ႈထၢႆႇႁၢင်ႈ၊ ႁွင်ႉဢဝ်ၸဝ်ႈႁိူၼ်းသေ လွၵ်ႇငိုတ်ႈဝႃႈ ပေႃးဢမ်ႇယွၼ်းၶႂၢင်ႉယႃႇႁႆႇၵွင်မွင်း ယႃႇႁူပ်ႉၵၼ်ၸိူင်ႉၼႆထႅင်ႈ ဝႃႈၼႆ။

တင်ႈတႄႇဝၼ်းတီႈ 17/09/2018 မႃးတေႃႇထိုင်ဝၼ်းမိူဝ်ႈၼႆႉ ဝၼ်းတီႈ 21/09/2018 ပႃႇတီႇႁူဝ်သိူဝ်လူင်း သူၼ်း တုမ် တႃႇပၢင်လိူၵ်ႈတင်ႈသွမ်ႈ ဝၼ်းမိူဝ်ႈၼႆႉ ယၢမ်းၵၢင်ၼႂ် 8:30 မူင်း ၽွင်းလူင်းႁႃသဵင် ၼႂ်းဢိူင်ႇၼွင်ၶမ်းလူင် ၸႄႈဝဵင်းပၢင်ဢူႈ တိူင်းဝဵင်းတႃႈလိူဝ်ႇၼၼ်ႉ ၺႃးၽူႈၵွၼ်းပွၵ်ႉ ၸိုဝ်ႈႁွင်ႉဢွင်ႇသေႃႇ တင်း ပူႇၵႄႇ ၸိုဝ်ႈႁွင်ႉ ၵူဝ်ႇၼၢႆႇ ႁၢမ်ႈႁႄႉ ဢမ်ႇၶႂ်ႈပၼ် ပႃႇတီႇႁူဝ်သိူဝ် SNLD သူၼ်းတုမ် ၵူၼ်းမိူင်း ၼႂ်းဝၢၼ်ႈ/ၼႂ်းပွၵ်ႉ ဝႃႈၼႆ။

ၸၢႆးလဵၵ်ႉ ၽူႈၶၢၼ်ပၢၵ်ႇ ပႃႇတီႇႁူဝ်သိူဝ် SNLD လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၽွင်းၼေႃႇၽူႈတႅၼ်းၶဝ် တိုၵ်ႉသပ်း လႅင်းႁႃသဵင်တီႈၵူၼ်းဝၢၼ်ႈယူႇၼၼ်ႉ မီးပူႇၵၢင်ႉ(ရာအိမ်မှူး) ၸိုဝ်ႈႁွင်ႉ ၵူဝ်ႇၼၢႆႇ ၶဝ်ႈမႃးတီႈပၢင်သူၼ်းတုမ်ၼၼ်ႉ သေ မႃးထႆႇႁၢင်ႈသေ ဢမ်ႇၵႃးလၢတ်ႈဝႃႈ တၢင်းၼိူဝ်ၸီႉသင်ႇမႃးလႄႈ ႁဵတ်းၼႆလူးၵွၼ်ႇ။ လွင်ႈၼႆႉ မၼ်းမိူၼ်ဝႃႈ ပဵၼ်ၵၢၼ်ႁၢမ်ႈႁႄႉ ၵၢၼ်လူင်း သူၼ်းတုမ်ၵူၼ်းမိူင်း၊ မိူၼ်ၼင်ႇ လွၵ်ႇငိုတ်ႈၽူႈမီးသုၼ်ႇ တွတ်ႈၶႅပ်းမႄးၶဝ်ႁႂ်ႈၵူဝ်ႁႄ။ လွင်ႈၼႆႉဢမ်ႇထုၵ်ႇလီႁဵတ်း။ ၵွပ်ႈပိူဝ်ႈဝႃႈ ၵွၼ်ႇၼႃႈၼၼ်ႉ ပႃႇတီႇၼူၵ်ႉယုင်းၵေႃႈ မႃးလူင်း သူၼ်းတုမ်ယဝ်ႉ၊ ပႃႇတီႇသၢင်ႇသီႈၵေႃႈ မႃးလူင်းသူၼ်းတုမ်ယဝ်ႉ ၵူၼ်းဝၢၼ်ႈၵေႃႈႁႆႇၵွင်ႁႆႇမွင်းသေႁပ်ႉ ယဝ်ႉၵႂႃႇတင်း 2 ပႃႇတီႇ လီလီငၢမ်းငၢမ်း ႁဵတ်းသင် ပႃႇတီႇတႆး မႃးသူၼ်းတုမ် သမ်ႉမႃးႁၢမ်ႈႁႄႉႁဵတ်းၼႆၼႆႉ မၼ်းဢမ်ႇထုၵ်ႇလီပဵၼ် လွင်ႈၼႆႉႁဝ်းသၢၼ်ၶတ်းၼၵ်းၼၵ်းၼႃၼႃ။ ပွၵ်ႈတေမႃး တၢင်ႇတီႈတၢင်ႇ လႅၼ်ၵေႃႈ ယႃႇႁႂ်ႈလႆႈပဵၼ်ၼႆထႅင်ႈ။ သင်ၸိူဝ်ႉဝႃႈ မၼ်းပဵၼ်ၼႆထႅင်ႈယူႇၼႆတႄႉ ႁဝ်းၶႃႈ ထုၵ်ႇလီတိူင်ႇတီႈ UEC ၵေႃႈ ႁဝ်းၶႃႈတေတိူင်ႇ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉၽွင်း ၵူၼ်းဝၢၼ်ႈ ဢွၼ်ၵၼ်ႁႆႇၵွင်မွင်းပႂ်ႉႁပ်ႉတွၼ်ႈ ပႃႇတီႇႁူဝ်သိူဝ်ယူႇၼၼ်ႉ ၽူႈၵွၼ်းပွၵ်ႉ ၼွင်ၶမ်း လူင် ၵပ်းၾူၼ်းႁႃၵူၼ်းဝၢၼ်ႈ သဵင်လင်သေ ႁၢမ်ႈတပ်ႈ။ မိူဝ်ႈၽွင်း ပႃႇတီႇႁူဝ်သိူဝ် တိုၵ်ႉသပ်းလႅင်း ၼႄၵူၼ်း ဝၢၼ်ႈယူႇၼၼ်ႉၵေႃႈ ပူႇၵၢင်ႉ ၵူဝ်ႇၼၢႆႇ ဢမ်ႇယွၼ်းၶႂၢင်ႉသင်သေ ၶဝ်ႈၵႂႃႇတီႈၼႂ်းပၢင်သူၼ်းတုမ်ၼၼ်ႉသေ ထၢႆႇၶႅပ်းႁၢင်ႈ ဝႃႈၼႆ။

ဝၢႆးသေ ပႃႇတီႇႁူဝ်သိူဝ် လူင်းသူၼ်းတုမ်ယဝ်ႉၵႂႃႇၼၼ်ႉ ၽူႈၵွၼ်းပွၵ်ႉ ၼွင်ၶမ်းလူင် ၵပ်းၾူၼ်းႁႃၸဝ်ႈႁိူၼ်းပႃႈၼၢင်း ၵျွင်းဢိင်ႇသေ လၢတ်ႈဝႃႈ “ၶၢမ်ႈၼႃႈၵၢႆးတႃ ၽူႈယႂ်ႇၵူၼ်းလူင် ၼႂ်းဝၢၼ်ႈ။ ႁႆႇၵွင်မွင်းၼႂ်းဝၢၼ်ႈၸိူင်ႉၼႆ တိုၼ်း တေလႆႈယွၼ်းၶႂၢင်ႉတီႈၽူႈယႂ်ႇၵူၼ်းလူင်ၵွၼ်ႇ ၸင်ႇတေလႆႈႁႆႇ။ လိူဝ်ၼၼ်ႉ ႁႂ်ႈၵႂႃႇသပ်းလႅင်း တီႈလုမ်းၽူႈၵွၼ်း ပွၵ်ႉ” ဝႃႈၼႆ။

ၸၢႆးဝၼ်းလႅင်းၶမ်း ၽူႈၼမ်းၼႂ်းပႃႇတီႇႁူဝ်သိူဝ် ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈသိုပ်ႇၾူၼ်း ပၼ်ၾၢင်ႉၵႂႃႇ တီႈၽူႈၵွၼ်းၸႄႈဝဵင်းပၢင်ဢူႈ ႁႂ်ႈမၼ်းၶိုၼ်း ထိင်းပၼ်ၵူၼ်းမၼ်းဢိတ်းၼိုင်ႈ ၵဵဝ်ႇၵပ်းလွင်ႈ ၸိူင်ႉၼႆ သူႁဵတ်းဝႆႉ သူၸႂ်ႉၸီႉသင်ႇႁႃႉ မဵဝ်းၼႆႉ၊ သူမီးယိူင်းဢၢၼ်းဝႆႉႁႃႉမဵဝ်းၼႆႉ၊ ႁဝ်းၵေႃႈလၢတ်ႈၵႂႃႇ။ ၶဝ်ၵေႃႈဝႃႈ ဢမ်ႇမီးၶႃႈ တေႁွင်ႉၶဝ်မႃးသင်ႇသွၼ် ပၼ်ၾၢင်ႉၶဝ်ၵူၺ်းၶႃႈ ၽူႈၵွၼ်းၸႄႈဝဵင်းတွပ်ႇလၢတ်ႈၼင်ႇၼႆ” ဝႃႈၼႆ။

ၵဵဝ်ႇၵပ်းလွင်ႈသူၼ်းတုမ်ၵူၼ်းမိူင်း ႁႃသဵင်ၵမ်ႉထႅမ်ၼႆႉ ပႃႇတီႇႁူဝ်သိူဝ် လႆႈၶႂၢင်ႉလူင်းသူၼ်းတုမ် တီႈၶွမ်ႊမသျိၼ်ႊ ပၢင်လိူၵ်ႈတင်ႈ တီႈၸႄႈတွၼ်ႈပၢင်ဢူႈဝႆႉယဝ်ႉ။ လိူဝ်ၼၼ်ႉ ႁဵတ်းၽိုၼ်လိၵ်ႈ ၽိုၼ်မိူၼ်သေ သူင်ႇၸူးထိုင် ၽူႈၵွၼ်း ၸႄႈဝဵင်း ၽူႈၵွၼ်းၸႄႈတွၼ်ႈဝႆႉမူတ်းယဝ်ႉ ဝႃႈၼႆ။

ပွၵ်ႉၼွင်ၶမ်းလူင် ၸႄႈဝဵင်းပၢင်ဢူႈၼႆႉ မီးပီႈၼွင်ႉတႆး ယူႇသဝ်းႁူဝ်ၵူၼ်း 500 ပၢႆ လင်ႁိူၼ်းမီ 150 လင်ပၢႆ ဝႃႈၼႆ။