ပႃႇတီႇႁူဝ်သိူဝ် SNLD တႄႇလူင်းသူၼ်းတုမ် ႁႃသဵင်ၵမ်ႉထႅမ် တႃႇပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းႁူဝ်လိူၼ်ၼူဝ်ႊဝႅမ်ႊၿိူဝ်ႊ 2018 တေထိုင်ၼႆႉ ဝႃႈၼႆ။

မိူဝ်ႈၼႆႉ ဝၼ်းတီႈ 21/09/2018 ယၢမ်းၵၢင်ၼႂ် ထိုင် ဝၢႆးဝၼ်း ပႃႇတီႇႁူဝ်သိူဝ် SNLD လူင်းထူပ်းသူၼ်းတုမ်ၵူၼ်းမိူင်း ၼႂ်းတိူင်းတႃႈလိူဝ်ႇ(မၼ်းတလေး) မိူၼ်ၼင်ႇ ပၢင်ႇဢူႈ၊ ၼွင်ၶမ်းလူင်၊ ၼွင်ၶမ်းတီး၊ဝၢၼ်ႈ ၾႃႉၽႃႇ တင်း လွႆလူင် ၸဵမ်ၸိူဝ်းၼႆႉ။ ၼေႃႇၽူႈတႅၼ်းႁူဝ်သိူဝ် ဢၼ်ၶဝ်ႈလိူၵ်ႈတင်ႈၶေႉၶႅင်ႇသမ်ႉ ပဵၼ်ၼၢင်း ထူၺ်းမုင်ႇ ဝႃႈၼႆ။

ၼၢင်းထူၺ်းမုင်ႇ ၼေႃႇၽူႈတႅၼ်းပႃႇတီႇႁူဝ်သိူဝ် လၢတ်ႈတီႈၽူႈတွႆႇႁွၵ်ႈဝႃႈ “ တူဝ်ယၢင်ႇမၼ်း ပေႃးဝႃႈ ပႃႇတီႇႁူဝ် သိူဝ်ႁဝ်း လႆႈဢွင်ႇပေႉတီႈၼင်ႈဢၼ်ပဵၼ် ၽွင်းလူင်ၾၢႆႇၸၢဝ်းၶိူဝ်းတႆးၼႆ ပီႈၼွင်ႉတႆး ဢၼ်မီးၼႂ်းတိူင်းဝဵင်းလိူဝ်ႇ ၼႆႉ ႁဝ်းတေၸၢင်ႈၸွႆႈထႅမ်ၶဝ် လႆႈၼမ်တႄႉတႄႉ။ ၵွပ်ႈသင်လႃႇၼႆ မၼ်းဢမ်ႇၸႂ်ႈၵူၼ်းၵေႃႉလဵဝ်ၵႂႃႇမီးဝႆႉလူး။ မၼ်းမိူၼ်ၸိူင်ႉၼင်ႇပႃႇတီႇၼိုင်ႈဢၼ်ၵႂႃႇမီးဝႆႉလႄႈ မီးတၢင်းယၢပ်ႇသင် ပေႃႈမႄႈၵူၼ်းမိူင်းႁဝ်းတေလူဝ်ႇသင် ႁဝ်း ၶႃႈတေၸွႆႈထႅမ်ပၼ်။ တူဝ်ယၢင်ႇမၼ်း ၾၢႆႇဢၼ်ၽွင်းလူင်ၸၢဝ်းၶိူဝ်းတႆး ဢမ်ႇႁဵတ်းလႆႈၵေႃႈ တေၵွင်ႉၵၼ်တင်း ၽူႈတႅၼ်းသၽႃး ၵူၼ်းမိူင်း၊ ၸိူဝ်ႉၸၢတ်ႈ ဢၼ်မီးဝႆႉၼႂ်းသၽႃးၼၼ်ႉသေ ႁဵတ်းသၢင်ႈၵႂႃႇ တိုၼ်းတေၸွႆႈ ထႅမ်ပီႈ ၼွင်ႉတႆးႁဝ်း ၵႂႃႇထိုင်တီႈထိုင်တၢင်း” ဝႃႈၼႆ။

တီႈၼင်ႈၽွင်းလူင်ၸၢဝ်းၶိူဝ်းတႆး ၼႂ်းတိူင်းဝဵင်းတႃႈလိူဝ်ႇ(မၼ်းတလေး)ၼႆႉ တေမီးၼေႃႇၽူႈတႅၼ်း ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇၼူၵ်ႉယုင်း၊ ပႃႇတီႇသၢင်ႇသီႈလႄႈ ၵူၼ်းသုၼ်ႇလဵဝ် 1 ၵေႃႉ ၸဵမ်ၸိူဝ်းၼႆႉ ၶဝ်ႈၶႅင်ႇၵၼ် ဝႃႈၼႆ။

ၸၢႆးဝၼ်းလႅင်းၶမ်း ၽူႈၼမ်းၼႂ်းပႃႇတီႇႁူဝ်သိူဝ် ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ သင်ႁဝ်းၶႃႈ လႆႈတီႈ ၼင်ႈ ဢွင်ႇပေႉၼႆႉၼႆၸိုင် တွၼ်ႈတႃႇ ပေႃႈမႄႈပီႈၼွင်ႉတႆးႁဝ်းၶႃႈ တီႈတိူင်းဝဵင်းလိူဝ်ႇ ၵဵဝ်ႇလူၺ်ႈၵၢၼ်လိၵ်ႈလၢႆး ၾိင်ႈငႄႈ။ ၵၢၼ်ယိုတ်းတီႈလိၼ် ႁႆႈၼႃးၶဝ်ၼၼ်ႉ ႁဝ်းၶႃႈတေၸၢင်ႈတၢင်တူဝ်ၶဝ်သေ ဢဝ်ၵႂႃႇဢုပ်ႇၶႆႈတၢင်ႇထိုင် ၼႂ်းသၽႃးမိူင်းႁူမ်ႈတုမ်၊ ၼႂ်းတိူင်းဝဵင်းလိူဝ်ႇ။ လွင်ႈပိူၼ်ႈပေႉၵိၼ်တဵၵ်းတဵင်ႁဝ်းၸိူဝ်းၼၼ်ႉၵေႃႈ တေဢမ်ႇႁႂ်ႈလႆႈမီး၊ ဢမ်ႇႁႂ်ႈလႆႈထၢင်ႇလဵၵ်ႉတႆးႁဝ်း တႃႇပွင်ပဵၼ်လႆႈ တေၶတ်းၸႂ် ႁဵတ်းသၢင်ႈႁႂ်ႈထိုင်တီႈ တွၼ်ႈတႃႇပီႈၼွင်ႉတႆးႁဝ်း” ဝႃႈၼႆ။

တီႈယူႇၽွင်းလူင်ၾၢႆႇၸၢဝ်းၶိူဝ်းတႆး တီႈဝဵင်းလိူဝ်ႇ ဢၼ်လုတ်ႈႁၢမ်းပဝ်ႇဝႆႉ ၼိုင်ႈတီႈၼင်ႈၼၼ့် ၼေႃႇၽူႈတႅၼ်း ၸၢဝ်းတႆး ၸိူဝ်းတေၶဝ်ႈၶႅင်ႇၵၼ် တေမီး ၼၢင်းထူၺ်းမုင်ႇ ပႃႇတီႇႁူဝ်သိူဝ်၊ ၻွၵ်ႊတိူဝ်ႊ ၸၢႆးၵျေႃႇဢုင်း ပႃႇတီႇ သိူဝ်ၽိူၵ်ႇ၊ ၸၢႆးပၢၼ်းသႅင် (ႁွင်ႉ) ၸၢႆးထုၼ်းၸိင်ႇ (ဢမ်ႇၼၼ်) ၸၢႆးၵျေႃႇၸိင်ႇ ပႃႇတီႇၼူၵ်ႉယုင်း၊ ၸၢႆးဢွင်ႇၵျီႇ ပႃႇတီႇသၢင်ႇသီႈလႄႈ သုၼ်ႇတူဝ် ဢူးဢွင်ႇထေး ၸဵမ်ၸိူဝ်းၼႆႉ။ မိူဝ်ႈပၢင်လိူၵ်ႈတင်ႈ 2015 ၼၼ်ႉ ဢူးၵျေႃႇၸေႃး ပႃႇတီႇ NLD ပေႉၵႂႃႇ။ တူဝ်မၼ်းၸၢႆးဢမ်ႇၸႂ်ႈတႆး သမ်ႉလူႉတၢႆၵႂႃႇမိူဝ်ႈႁူဝ်ပီ 2018 ၼႆႉလႄႈ ၸင်ႇလိူၵ်ႈ တင်ႈသွမ်ႈ ႁႃၽူႈပုတ်ႈတႅၼ်းၶိုၼ်း။

တီႈၼင်ႈသၽႃးဢၼ်လုတ်ႈႁၢမ်းပဝ်ႇဝႆႉ တင်းမူတ်း မီး 13 တီႈၼင်ႈ။ ၼႂ်း 13 တီႈၼင်ႈၼၼ်ႉ ပႃးၼႂ်းမိူင်းတႆး ၼိုင်ႈ တီႈၼင်ႈ ပဵၼ်တီႈၼင်ႈၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ။ ပၢင်လိူၵ်ႈတင်ႈသွမ်ႈၼႆႉ တေၸတ်းႁဵတ်း ၼႂ်းဝၼ်းတီႈ 03/11/2018 တၢင်းၸႄႈဝဵင်းလၢႆးၶႃႈ မိူင်းတႆးပွတ်းၸၢၼ်းၼၼ်ႉၵေႃႈ ပႃႇတီႇႁူဝ်သိူဝ် SNLD တႄႇလူင်းပိုၼ်ႉတီႈႁႃသဵင်ၵႂႃႇဝႆႉယူႇ ဝႃႈၼႆ။