ရူတ်ႉၵႃး လမ်းၼိုင်ႈတမ်ၽႃႇသႂ်ႇ ပၢႆႉတၢင်းၽႄ ၶဝ်ႈမိူင်းယူႉ ၵူၼ်ႇပၢင်းလူႉၵွႆ ၵႂႃႇပဵၼ်ရူတ်ႉၵႃးၽႂ် တမ်သႂ်ႇ ဢၼ် ဝႃႈၼၼ်ႉ ပႆႇႁူႉ ဝႃႈၼႆ။

ဝၼ်းတီႈ 18/09/2018 ယၢမ်းၵၢင်ၶမ်ႈ မွၵ်ႈ 8 မူင်းပၢႆၼၼ်ႉ ပၢႆႉတၢင်းၽႄ ၶဝ်ႈမိူင်းယူႉ ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဢၼ်ပႃးလိၵ်ႈတႆးတႅမ်ႈဝႆႉၼၼ်ႉ ၺႃးရူတ်ႉၵႃးတမ်ၽႃႇသႂ်ႇသေ လႆႈၵူၼ်ႇ လူႉပင်းပႅတ်ႈ။ ပၢႆႉတၢင်းၽႄ ၶဝ်ႈမိူင်းယူႉၼႆႉ ပူၵ်း/ပၵ်းဝႆႉ ၼႂ်းၵႄႈ ၵူတ်ႉၶၢႆ – မူႇၸေႊ ဝႃႈၼႆ။

ၸၢႆးလႅဝ်းၸတ်ႉ ၵူၼ်းမိူင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈယူႇႁိမ်းႁွမ်းၶဝ်ဝႃႈ မီးၵႃးလမ်းၼိုင်ႈ မႃး ပိၼ်ႇႁူဝ်ၵႃး ထွႆၵႂႃႇ ထွႆမႃးသေ တုမ်ႉသႂ်ႇၼႆဝႃႇ။ မိူဝ်ႈႁဝ်းၶႃႈ ၵႂႃႇထတ်းတူၺ်းတႄႉ ႁၼ်ႁွႆးၵႃး ထွႆလူင်းမႃးတုမ်ႉ သႂ်ႇတႄႉ။ ဢၼ်ဝႃႈ တၢင်ႇမူႇတၢင်ႇၸုမ်း တင်ႈၸႂ်မႃးယႃႉလႅဝ်တႄႉ လႅပ်ႈတေဢမ်ႇၸႂ်ႈ။ ပၢႆႉၼႆႉ မီးၼႂ်းၵႄႈ ၵူတ်ႉၶၢႆ – မူႇၸေႊ ပေႃးလုၵ်ႉတၢင်း ၵူတ်ႉၶၢႆမႃး တေမီးၾၢႆႇသၢႆႉမိုဝ်း” ဝႃႈၼႆ။

ပၢႆႉတၢင်းၽႄၶဝ်ႈမိူင်းယူႉၼႆႉ ယူႇတီႈၸုမ်းဝူင်းမဵတ်ႉတႃႇ မိူင်းယူႉသေ ႁူမ်ႈၵၼ်ၵေႃႇသၢင်ႈမႃး မီးၶၢဝ်းတၢင်း 6 ပီ ပၢႆယဝ်ႉ ဝႃႈၼႆ။

ၸၢႆးလႅဝ်းၸတ်ႉ လၢတ်ႈဝႃႈ ယူႇတီႈၵူၼ်းမိူင်းသေ ႁူမ်ႈၵၼ်ႁဵတ်းဝႆႉ။ မိူဝ်ႈၽွင်းႁဵတ်းၼၼ်ႉ သဵင်ႈငိုၼ်းမွၵ်ႈ သႅၼ်ပၢႆၵူၺ်း။ ပေႃးသွၼ်ႇၼပ်ႉငိုၼ်းတေႃႈလဵဝ်တႄႉ တေသဵင်ႈႁိမ်း 4 – 5 သႅၼ်။ လွင်ႈတႃႇၵေႃႇ သၢင်ႈၶိုၼ်းတႄႉ လူဝ်ႇဢုပ်ႇၵုမ်ၵၼ်ၶိုၼ်းထႅင်ႈၵမ်းၼိုင်ႈ” ဝႃႈၼႆ။

ပၢႆႉတၢင်းၽႄ ၶဝ်ႈမိူင်းယူႉၼႆႉ ယၢၼ်ၵႆဝဵင်းၵူတ်ႉၶၢႆ မွၵ်ႈ 19 လၵ်း။ သဵၼ်ႈတၢင်းၼႆႉ ပွင်ႇထိုင်တၢင်းမိူင်းမေႃႇ၊ မိူင်း ယဵၼ်၊ ၼမ်ႉတူႈ၊ ပၢင်ႁႆး၊ ပၢၼ်းသေး ၸဵမ်ၸိူဝ်းၼႆႉ။