ၼၢင်းယိင်း 2 ၵေႃႉ ၶီႇရူတ်ႉၶိူင်ႈမႃးၸွမ်းၵၼ်ၼၼ်ႉ ၺႃးမၢၵ်ႇတႅၵ်ႇၽူင်ႉသႂ်ႇ ၼိူဝ်သဵၼ်ႈတၢင်းလူင် မူႇၸေႊ – ပၢင်ႇ သၢႆး ၵေႃႉၼိုင်ႈလႆႈလူႉတၢႆ၊ ထႅင်ႈၵေႃႉၼိုင်ႈ လႆႈမၢတ်ႇၸဵပ်း လႆႈသူင်ႇယူတ်း ယႃတူဝ်ဝႆႉတီႈႁူင်းယႃ မူႇၸေႊ။
ဝၼ်းတီႈ 19/09/2018 ယၢမ်းဝၢႆးဝၼ်း 3 မူင်း ၼၢင်းယိင်း ဢႃယု 59 ပီ ၸိုဝ်ႈႁွင်ႉ လုၼ်ႇထူႉ(ဒေါလွန်ထု) တင်း ဢႃးၼႃႇ(မအားနာ) ဢႃယု 28 ပီ ၶီႇရူတ်ႉၶိူင်ႈမႃးၸွမ်းၵၼ် လုၵ်ႉတၢင်း ဝၢၼ်ႈၼမ်ႉတွင်း တေၵႂႃႇတၢင်း ဝဵင်းပၢင်ႇ သၢႆးၼၼ်ႉ ၺႃးမၢၵ်ႇဢၼ်ႁၢင်ႈၵၢင်ဝႆႉၸွမ်းတၢင်း တႅၵ်ႇသႂ်ႇ ၶႃ 2 ၵေႃႉ ၼိူဝ်သဵၼ်ႈတၢင်းလူင် မူႇၸေႊ- ပၢင်ႇသၢႆး ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။ ၽူႈယိင်းၵေႃႉၸိုဝ်ႈႁွင်ႉ လုၼ်ႇထူႉ လႆႈလူႉတၢႆၸွမ်းတၢင်း ၽွင်းသူင်ႇယႃ တူဝ်ၵေႃႉၸိုဝ်ႈႁွင်ႉ ဢႃးၼႃႇၼၼ်ႉသမ်ႉ မၢတ်ႇၸဵပ်းႁၢဝ်ႈႁႅင်းလႄႈ သူင်ႇယႃတူဝ် တီႈႁူင်းယႃ ၵူၼ်းမိူင်းမူႇၸေႊဝႆႉ ဝႃႈၼႆ။
ၵူဝ်ႇထေး ၸုမ်းၸွႆႈထႅမ်ၽေးၵိုင်ႉၵၢင်ႉ ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၽူႈယိင်း ဢၼ်ႁွင်ႉဝႃႈ တေႃႇ လုၼ်ႇထူႉၼၼ်ႉ ဢမ်ႇတၼ်းၽႅဝ်ႁူင်းယႃ လႆႈလူႉသဵင်ႈၸွမ်းတၢင်း။ မဢႃးၼႃႇတႄႉ လုပ်ႇၶႃႁၵ်းၵႂႃႇ ၶွၼ်ၼိုင်ႈ ၸၢၵ်ႇမၢၵ်ႇတိူဝ်ႉ ၺႃးၸွမ်းတူဝ်။ ၵူၺ်းၵႃႈ ဢမ်ႇပေႃးလႆႈမႆႈၸႂ်။ တေႃႈလဵဝ် လႆႈသူင်ႇယူတ်းယႃတူဝ်ဝႆႉတီႈ မူႇၸေႊ ယဝ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ မၢၵ်ႇဢၼ်တႅၵ်ႇၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် မႃးႁၢင်ႈၵၢင်ဝႆႉ ဢၼ်ဝႃႈၼၼ်ႉ ပႆႇႁူႉ။ တေႃႈလဵဝ် ယူႇတီႈပလိၵ်ႈမၢၼ်ႈၶဝ် တီႈဝဵင်းမူႇၸေႊ တိုၵ်ႉၵူတ်ႇထတ်းယူႇ ဝႃႈၼႆ။
ၸႄႈဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ်ၶႄႇ ပဵၼ်ဝဵင်းဢၼ်ၵႃႉၶၢႆ ပၢႆးမၢၵ်ႈမီးၵေႃႈယႂ်ႇ ယွၼ်ႉ ၼၼ် တၢင်းပွတ်းတွၼ်ႈၼၼ်ႉ မီးပျီႇတူႉၸိတ်ႉ၊ ပလိၵ်ႈမၢၼ်ႈ၊ သိုၵ်းလူင် ပွင်ၸိုင်ႈမၢၼ်ႈ တူင်ႉၼိုင်ၵႂႃႇမႃးယူႇသေ တႃႉ ၶီႈလၵ်ႉၵူၼ်းၸူၼ်လိူင်ႇ၊ ပၢင်တေႃႇလွင်းၼမ်၊ မၢၵ်ႇၵေႃႈၵႆႉတႅၵ်ႇ။ လိူဝ်ၼၼ်ႉ ၸုမ်းယိပ်းၵွင်ႈၵၢင်ႇၵေႃႈ ၵႆႉၶဝ်ႈလူမ်ႇတိုၵ်းယိုဝ်း ၸဝ်ႈၵႃးၵေႃႈၵႆႉၺႃးယိုဝ်းတၢႆ သၢႆၸႂ်ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ၵူၼ်းယူႇမူႇၸေႊ ၶဝ်လၢတ်ႈၼႄၼင်ႇၼႆ။
