လုမ်းသၽႃးမိူင်းတႆး မၵ်ႉမၼ်ႈယွမ်းႁပ်ႉ ၼႂ်းတူင်ႇတၢင်ႇပိုၼ်ႉတီႈ ၶေႃႈတၢင်ႇလၢတ်ႈ ၽူႈတႅၼ်းၸႄႈမိူင်းသႅၼ်ဝီ ဢၼ်တၢင်ႇလၢတ်ႈလွင်ႈၵႂၢတ်ႇလၢင်ႉၽဵဝ်ႈပႅတ်ႈ ပၢင်တေႃႇလွင်းလႄႈႁၢၼ်ႉၵဵမ်း ဝႃႈၼႆ။
ဝၼ်းတီႈ 20/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 4 ဢၼ်ၸတ်းႁဵတ်းတီႈ လုမ်း သၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၼၢင်းၶိၼ်ႇထႃးယီႇ တၢင်ႇထိုင်ၼႂ်းသၽႃး လွင်ႈၵၢၼ်တေႃႇလွင်း လႄႈ ႁၢၼ်ႉၵဵမ်း ဢၼ်ပဵၼ်ပၼ်ႁႃလူင် ၼႂ်းမိူင်းတႆးပွတ်းႁွင်ႇၼၼ်ႉ ယူႇတီႈႁူဝ်ပဝ်ႈ သၽႃး မိူင်းတႆး မၵ်းမၼ်ႈပၼ်ပဵၼ်တၢင်းၵၢၼ်ၵႂႃႇ ႁႂ်ႈၾၢႆႇလူင်ပွင်ၸိုင်ႈ ၽူႈမီးပုၼ်ႈၽွၼ်းၶဝ် လူင်းၵူတ်ႇထတ်းၸတ်းၵၢၼ် ပၢင်တေႃႇလွင်းလႄႈ ႁၢၼ်ႉၵဵမ်းႁႂ်ႈပေႃး ႁၢႆၵႂႃႇ ဝႃႈၼႆ။
ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ တေလႆႈဝႃႈ ဢၼ်ႁဝ်းတၢင်ႇလၢတ်ႈၼႂ်းသၽႃး လွင်ႈပၼ်ႁႃၵၢၼ်တေႃႇလွင်းလႄႈ ႁၢၼ်ႉၵဵမ်း ၼင်ႇႁိုဝ် တေယွမ်းလူင်းလႄႈ ႁၢႆၵႂႃႇၼၼ်ႉ တေလႆႈဝႃႈဢွင်ႇပေႉၵႂႃႇယဝ်ႉ။ မၵ်းမၼ်ႈပဵၼ်တၢင်းၵၢၼ်ယဝ်ႉ ယူႇတီႈလူင်ပွင် ၸိုင်ႈၶဝ် ဢမ်ႇႁဵတ်းဢမ်ႇလႆႈယဝ်ႉ ၶဝ်လူဝ်ႇလႆႈႁဵတ်းၸွမ်း ဢၼ်ၶဝ်ပၼ်ၶေႃႈမၼ်ႈၵႅၼ်ႇဝႆႉၼၼ်ႉ” ဝႃႈၼႆ။
ၼႂ်းမိူင်းတႆးပွတ်းႁွင်ႇၼႆႉ ပၢင်တေႃႇလွင်း ႁၢၼ်ႉၵဵမ်း လိူင်ႇၽႄႈၼမ် မိူၼ်ၼင်ႇ တၢင်းလႃႈသဵဝ်ႈ၊ ၵူတ်ႉၶၢႆ၊ သႅၼ်ဝီ၊ မူႇၸေႊ၊ ၼမ်ႉၶမ်း ၸိူဝ်းၼႆႉ ႁဵတ်းႁႂ်ႈၵူၼ်းမိူင်း၊ ၵူၼ်းၼုမ်ႇတၢင်းယၢမ်ႈလူႉ။ ၽူႈၵွၼ်းပွၵ်ႉယွမ်ႇဝၢၼ်ႈ ၸိူဝ်းမီးပုၼ်ႈ ၽွၼ်းၶဝ် ထုၵ်ႇလႆႈသၢၼ်မိုဝ်းၵူၼ်းမိူင်း တင်းၽူႈတႅၼ်းသေ ႁူမ်ႈႁွမ်းၵၼ် ၸွႆႈထႅမ်ၵၼ် သူၼ်းဢီးၾၢႆႇၽွင်းငမ်း/ ပလိၵ်ႈ/ တပ်ႉသိုၵ်းၶဝ် ၵႂၢတ်ႉလၢင်ႉၵႂႃႇၸိုင် ပၢင်တေႃႇလွင်းႁၢၼ်ႉၵဵမ်း ၸိူဝ်းၼႆႉ တေႁၢႆလၢႆၵႂႃႇယူႇ ဢမ်ႇႁၢင်ႉ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 16/09/2018 ၼၼ်ႉၵေႃႈ ၵူၼ်းဝၢၼ်ႈ ၵူၼ်းမိူင်းၼႂ်းၸႄႈဝဵင်းၵူတ်ႉၶၢႆ လၢႆဝၢၼ်ႈဢဵၼ်ႁႅင်း 100 ပၢႆ ႁူမ်ႈၵၼ်ၵႂႃႇ ယႃႉပႅတ်ႈ ပၢင်တေႃႇပၢင်လွင်း တူႈၵဵမ်းသ်ပႃ လၢႆလၢႆတီႈ။ ၸႄႈဝဵင်းၵူတ်ႉၶၢႆ ၸႄႈ တွၼ်ႈမူႇၸေႊ ၸိုင်ႈတႆးပွတ်းႁွင်ႇၼႆႉ ပဵၼ်ဝဵင်းဢၼ် ၸုမ်းပျီႇတုၸိတ်ႉၼမ်လိူဝ်ပိူၼ်ႈဝဵင်းၼိုင်ႈ၊ ၸဝ်ႈၶွင်ပၢင်တေႃႇ လွင်းႁၢၼ်ႉ ၵဵမ်း ၸိူဝ်းၼႆႉၵေႃႈ ၵမ်ႈပႃႈၼမ်ၵဵဝ်ႇၶွင်ႈတင်းၸုမ်း မီးငိုၼ်း၊ ၸုမ်းမီးဢႃႇၼႃႇၼႂ်းထုင်ႉၼႆႉ။
