ၽူႈတႅၼ်းမိူင်းသူႈ ၵဵပ်းလၢႆးၸိုဝ်ႈသဵင် လၢႆးမိုဝ်း ၽူႈတႅၼ်းၼႂ်းသၽႃးမိူင်းတႆး တႃႇလႆႈသဵင် ၵမ်ႉထႅမ်ႁႂ်ႈၸၢင်ႈဢဝ်လိူင်ႈ ၼၢင်းမူဝ်ႁွမ် ဢၼ်သိုၵ်း TNLA တီႉၵႂႃႇၼၼ်ႉ လႆႈဢုပ်ႇၼႂ်းသၽႃး ဝၼ်းမိူဝ်ႈၼႆႉ မီးၽူႈတႅၼ်းၵမ်ႉထႅမ် 35 ၵေႃႉယဝ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 20/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 4 ဢၼ်ၸတ်း ႁဵတ်းတီႈ လုမ်းသၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၸၢႆးလိၼ်းမႅတ်ႈ ၽူႈတႅၼ်း သၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းသူႈ ႁၢင်ႈႁႅၼ်းၵဵပ်းလၢႆးၸိုဝ်ႈ/ လၢႆးမိုဝ်း ၽူႈတႅၼ်းသၽႃး မိူင်းတႆး ၸိူဝ်းႁၼ်လီၵမ်ႉထႅမ် လိူင်ႈၼၢင်းမူဝ်ႁွမ် ၼမ်ႉၶမ်း ဢၼ်ၺႃးတပ်ႉသိုၵ်းတဢၢင်း TNLA တီႉၺွပ်းၵႂႃႇ ပေႃးလႆႈၸိုဝ်ႈသဵင်လၢႆးမိုဝ်း ၵုမ်ႇထူၼ်ႈယဝ်ႉ တေတၢင်ႇၸူး ႁူဝ်ပဝ်ႈသၽႃးမိူင်းတႆး။ ယူႇတီႈႁူဝ်ပဝ်ႈသၽႃးမိူင်းတႆး တေသိုပ်ႇသူင်ႇထိုင် သၽႃးတီႈၼေႇပျီႇတေႃႇၵႂႃႇဝႃႈၼႆ။
ၸၢႆးလိၼ်းမႅတ်ႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၶႃႈႁဝ်းလႆႈသူၼ်းတုမ် ၵဵပ်းလၢႆးၸိုဝ်ႈ/ မိုဝ်း ၽူႈတႅၼ်းသၽႃး မိူင်းတႆး လႆႈ 35 ၵေႃႉ။ ၵူၺ်းၵႃႈ မိူဝ်ႈၽုၵ်ႈ တႄႉ ၸင်ႇတေႁူႉလႆႈဝႃႈ တင်းမူတ်းမီးၵႃႈႁိုဝ် ဢၼ်ႁၼ်လီၵမ်ႉထႅမ် လူင်းလၢႆးၸိုဝ်ႈ/ မိုဝ်း တႃႇတေတၢင်ႇလိူင်ႈ ၼၢင်းမူဝ်ႁွမ် ႁႂ်ႈပေႃးတၢင်ႇလၢတ်ႈလႆႈၼႂ်းသၽႃး” ဝႃႈၼႆ။
ၽူႈတႅၼ်းဢၼ်မႃးၶိုၼ်ႈပၢင်ၵုမ် သၽႃးမိူင်းတႆး မိူဝ်ႈၼႆႉသမ်ႉ တင်းမူတ်း မီး 121 ၵေႃႉ ယွၼ်းၶႂၢင်ႉ 22 ၵေႃႉ။ တင်း မူတ်း ၽူႈတႅၼ်းသၽႃးမိူင်းတႆး မီး 143 ၵေႃႉ ဝႃႈၼႆ။
ဝၼ်းတီႈ 19/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 3 ဢၼ်ၸတ်းႁဵတ်းတီႈ လုမ်း သၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၸၢႆးလိၼ်းမႅတ်ႈ ၶိုင်လွင်ႈၼၢင်းမူဝ်ႁွမ်ဢၼ်ၺႃး TNLA တီႉၵႂႃႇၼၼ်ႉ တၢင်ႇၼႂ်းသၽႃး။ ႁူဝ်ပဝ်ႈသၽႃးမိူင်းတႆး ဢမ်ႇႁပ်ႉ ၸႂ်ႉႁႂ်ႈၵဵပ်းလၢႆးၸိုဝ်ႈ/ လၢႆးမိုဝ်း ၽူႈတႅၼ်း ၸိူဝ်းၵမ်ႉထႅမ်သေ တေသိုပ်ႇတၢင်ႇၸူးသၽႃး တီႈၼေႇပျီႇတေႃႇ ဝႃႈၼႆ။
ၼၢင်းမူဝ်ႁွမ်ၼႆႉ ပဵၼ်မႄႈလုၵ်ႈဢွၼ်ႇ 3 ၵေႃႉ၊ ၺႃးသိုၵ်းလွႆ TNLA ၸီႉၼႄးဝႃႈ ၶတ်းၶႂၢင်ၵူၼ်းၵဵပ်းၶွၼ်ႇ ႁႂ်ႈပေႃးလူႉသုမ်းၼႆသေ မႃးတီႉဢဝ်ၼၢင်းမူဝ်ႁွမ်ၵႂႃႇ မိူဝ်ႈ 17/08/2018။
မိူဝ်ႈပီ 2016 ၼၼ်ႉ TNLA မႃးၵဵပ်းၶွၼ်ႇ ႁိူၼ်းၼၢင်းမူဝ်ႁွမ် 3 သႅၼ်၊ ပီ 2017 မႃးၵဵပ်းၵႂႃႇ 11 သႅၼ်။ ၽွင်းၼၼ်ႉ ၺႃးသိုၵ်းလူင်ပွင်ၸိုင်ႈမၢၼ်ႈငွႆးယိုဝ်းၸွမ်းတၢင်း တၢႆၵေႃႉၼိုင်ႈ၊ တီႉလႆႈတူဝ်လိပ်းၵႂႃႇၵေႃႉၼိုင်ႈ။ လွင်ႈၼႆႉ ၾၢႆႇသိုၵ်း လွႆၼႄးဝႃႈ ၼၢင်းမူဝ်ႁွမ်ပွင်ႇၶၢဝ်ႇၼႆသေ ၵပ်းၾူၼ်းၸီႉၼႄးဝၼ်းၼၼ်ႉၵမ်ႉလဵဝ်။ ၾၢႆႇၼၢင်းမူဝ်ႁွမ်ၵေႃႈတွပ်ႇ လၢတ်ႈဝႃႈ မၼ်းၼၢင်းဢမ်ႇၸႂ်ႈၵူၼ်းပွင်ႇၶၢဝ်ႇပၼ်ၽႂ်။ ယွၼ်ႉငိုၼ်း 11 သႅၼ်သေ ဢမ်ႇဢဝ်သၢႆၸႂ်လႅၵ်ႈလေႃႇ ဝႃႈၼႆ။
