ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ဝဵင်းသႅၼ်ဝီ တၢင်ႇၸူး လွင်ႈပၼ်ႁႃလူင် ၼႂ်းမိူင်းတႆးပွတ်းႁွင်ႇ လွင်ႈ ၵၢၼ်တေႃႇလွင်းလႄႈ ႁၢၼ်ႉၵဵမ်း ၼင်ႇႁိုဝ် တေမွတ်ႇႁၢႆၵိုတ်းပႅတ်ႈၼၼ်ႉ ႁႂ်ႈလူင်ပွင်ၸိုင်ႈၶပ်းၶိုင်ၵႂႃႇ ဝႃႈၼႆ။
ဝၼ်းတီႈ 19/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 3 ဢၼ်ၸတ်းႁဵတ်းတီႈ လုမ်း သၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၼၢင်းၶိၼ်ႇထႃးယီႇ တၢင်ႇထိုင်ၼႂ်းသၽႃး လွင်ႈၵၢၼ်တေႃႇလွင်း လႄႈ ႁၢၼ်ႉၵဵမ်း ဢၼ်ပဵၼ်ပၼ်ႁႃလူင် ၼႂ်းမိူင်းတႆးပွတ်းႁွင်ႇၼၼ်ႉ ႁႂ်ႈၶပ်းၶိုင်ၵႄႈလိတ်ႈ ပၼ်ႁႃလွင်ႈၼႆႉ ႁႂ်ႈၵိုတ်းပႅတ်ႈ ယွၼ်ႉတုမ်ႉတိူဝ်ႉၵူၼ်းမိူင်းဢၵျၢင်ႉတၢင်းယၢမ်ႈ လူႉတင်းၼမ် ဝႃႈၼႆ။
ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈတုမ်ႉတိူဝ်ႉၼႆႉ တေလႆႈဝႃႈ ႁၢဝ်ႈႁႅင်းတႄႉတႄႉ။ ဢၵျၢင်ႉတၢင်းယမ်ႈ လုၵ်ႈဢွၼ်ႇ၊ ၵူၼ်းၼုမ်ႇ လူႉလႅဝ်ၼမ်။ ၼႃႈႁေႃတေႃႁိူၼ်း ၽူဝ်မေးၽိတ်းၽႅၵ်ႇ တႅၵ်ႇယၢႆႈပႅတ်ႈၵၼ်ၵေႃႈၼမ်။ ၵူၼ်းၼုမ်ႇမၢင်ၵေႃႉ ပေႃႈမႄႈၶဝ် သိုဝ်ႉၵႃး သေ ပၼ်ၶဝ်လႅၼ်ႈၼၼ်ႉၵေႃႈ လူႉၼမ် မၢင်ၵေႃႉ ဢမ်ႇလႆႈငိုၼ်းမႃး ပေႃးလႆႈငိုၼ်းသမ်ႉ ၵႂႃႇတေႃႇလွင်း လဵၼ်ႈၵဵမ်း ႁဵတ်းၼၼ်။ တေလႆႈဝႃႈ တုမ်ႉတိူဝ်ႉၵူၼ်းမိူင်း ၵူၼ်းၼုမ်ႇ ဢၵျၢင်ႉတၢင်းယၢမ်ႈ လူႉတႄႉတႄႉ” ဝႃႈၼႆ။
သိုပ်ႇလၢတ်ႈဝႃႈ ၼႂ်းမိူင်းတႆးပွတ်းႁွင်ႇႁဝ်းၶႃႈၼႆႉ ပၢင်တေႃႇလွင်း ႁၢၼ်ႉၵဵမ်း လိူင်ႇၽႄႈၼမ် မိူၼ်ၼင်ႇ တၢင်းလႃႈ သဵဝ်ႈ၊ ၵူတ်ႉၶၢႆ၊ သႅၼ်ဝီ၊ မူႇၸေႊ၊ ၼမ်ႉၶမ်းလႄႈ ဢိၵ်ႇထႅင်ႈလၢႆလၢႆတီႈ ၸိူဝ်းၼႆႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ တၢင်ႇထိုင် ၼႂ်းပၢင်ၵုမ်သၽႃးမိူင်းတႆး လွင်ႈပၼ်ႁႃၵၢၼ်တေႃႇလွင်းလႄႈ ႁၢၼ်ႉၵဵမ်းၼႆႉ ယူႇတီႈ ၸၢႆးဝုၼ်းသၢမ် ႁူဝ်ပဝ်ႈ ၶွမ်ႊမတီႊပၢႆးပၺ်ၺႃ၊ ပၢႆးယူႇလီလႄႈ ၾၢႆႇမုၼ်းလႅင်းလုၵ်ႈဢွၼ်ႇ ႁၼ်လီၵမ်ႉထႅမ်ၸွမ်း။ မိူဝ်ႈၼႆႉဝၼ်းတီႈ 20 တေသိုပ်ႇဢုပ်ႇဢူဝ်းၵၼ်သေ တွတ်ႈၶႅပ်းၵၢင်ၸႂ် ယဝ်ႉၵေႃႈ တေတၢင်ႇၶိုၼ်ႈထႅင်ႈ ၸွင်ႇႁူဝ် ပဝ်ႈသၽႃး တေမၵ်းမၼ်ႈပၼ် ဢမ်ႇမၵ်းမၼ်ႈ တႃႇၽဵဝ်ႈလၢင်ႉ ၵၢၼ်တေႃႇလွင်း/ ႁၢၼ်ႉၵဵမ်း ၸိူဝ်းၼႆႉ။
ပူၼ်ႉမႃး မိူဝ်ႈဝၼ်းတီႈ 16/09/2018 ၼၼ်ႉၵေႃႈ ၵူၼ်းဝၢၼ်ႈ ၵူၼ်းမိူင်းလၢႆဝၢၼ်ႈဢဵၼ်ႁႅင်း 100 ပၢႆ ဢွၼ်ၵၼ်ၵႂႃႇ ယႃႉပႅတ်ႈ ပၢင်တေႃႇပၢင်လွင်း တူႈၵဵမ်းသ်ပႃ ဢၼ်မီးၼႂ်းဝဵင်းၵူတ်ႉၶၢႆလၢႆလၢႆတီႈ။ ၵူတ်ႉၶၢႆ ၸႄႈ တွၼ်ႈမူႇၸေႊ ၸိုင်ႈတႆးပွတ်းႁွင်ႇၼႆႉ ပဵၼ်ဝဵင်းဢၼ် ၸုမ်းပျီႇတုၸိတ်ႉၼမ်လိူဝ်ပိူၼ်ႈဝဵင်းၼိုင်ႈ၊ ၸဝ်ႈၶွင်ပၢင်တေႃႇ လွင်းႁၢၼ်ႉ ၵဵမ်း ၸိူဝ်းၼႆႉၵေႃႈ ၵမ်ႈပႃႈၼမ်ၵဵဝ်ႇၶွင်ႈတင်းၸုမ်း မီးငိုၼ်း၊ မီးဢႃႇၼႃႇၼႂ်းထုင်ႉၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ