ၶွမ်ႊပၼီႊလွႆသၢမ်သုမ် ဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ၶိုၼ်ႈၵႃႈၾႆးၾႃႉ 1 ၼူၺ်ႇ( 1 Unit) လႂ် 85 ပျႃးၼၼ်ႉ ယူႇတီႈၵူၼ်းဝၢၼ်ႈၵူၼ်းမိူင်း လႆႈဢွၼ်ၵၼ်သၢၼ်ၶတ်းတႅမ်ႈလိၵ်ႈတၢင်ႇၸူး ၽွင်းလူင်ၾၢႆႇၾႆးၾႃႉ မိူင်းတႆးလႄႈ လႆႈလူတ်းပၼ်ၶိုၼ်းၶၼ်ၵဝ်ႇၼိုင်ႈၼူၺ်ႇလႂ် 35 ပျႃး မိူၼ်ၵဝ်ႇၶိုၼ်း။
မိူဝ်ႈၼႆႉ ဝၼ်းတီႈ 20/09/2018 ၶွမ်ႊပၼီႊလွႆသၢမ်သုမ် ဢွၵ်ႇဝႂ်ၵႃႈၾႆးၾႃႉ ပၼ်ၵူၼ်းမိူင်းသၢတ်ႉ ၼိုင်ႈၼူၺ်ႇ(ယူႊၼိတ်ႊ)လႂ် 35 ပျႃး ၶိုၼ်းမိူၼ်ၵဝ်ႇ လႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ႁၼ်လီၸူမ်းသိူဝ်း ဝႃႈၼႆ။
ၸၢႆးသၢမ် ၵူၼ်းမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ဝႂ်ၵႃႈၾႆးၾႃႉ တူၵ်းလူင်းမႃး ၼိုင်ႈယူႊၼိတ်ႊလႂ် 35 ပျႃး ၶိုၼ်းမိူၼ်ၵဝ်ႇ တင်းဝဵင်းၶႃႈ။ သိုပ်ႇၵႂႃႇတင်းၼႃႈ ၶုၼ်ဝၢၼ်ႈၶုၼ်ၶူင်ႇၶဝ် ဢိၵ်ႇလူၺ်ႈ ၽူႈၵွၼ်းဢိူင်ႇ၊ ၶွမ်ႊပၼီႊ ၶဝ် တေဢမ်ႇၶိုၼ်ႈၵႃႈၾႆးထႅင်ႈ ၵူၼ်းမိူင်းယုမ်ႇယမ်ၼင်ႇၼႆ ယိၼ်းၸူမ်းၶႃႈ တႄႇဝၼ်းတီႈ 23/09/2018 ၼႆႉၵႂႃႇ ႁဝ်းၶႃႈတေ လႆႈသႂ်ႇၵႃႈၾႆး 1 ၼူၺ်ႇ 35 ပျႃး မိူၼ်ၵဝ်ႇၵူၺ်းယဝ်ႉ” ဝႃႈၼႆ။
ဢိင်ၼိူဝ် ဝၼ်းတီႈ 08/09/2018 ယၢမ်းၵၢင်ၼႂ် 10 မူင်းထိုင် 11:30 မူင်းပၢႆၼၼ်ႉ ၽူႈၵွၼ်းဢိူင်ႇ၊ ထဝ်ႈဝၢၼ်ႈထဝ်ႈ ၼႃး၊ ႁွင်ႈ ၵၢၼ်လူင်ပွင်ၸိုင်ႈ၊ ပႃႇတီႇၵၢၼ်မိူင်း လႄႈ ၶွမ်ႊပၼီႊလွႆသၢမ်သုမ် ၸဵမ်ၸိူဝ်းၼႆႉ ႁဵတ်းပၢင်ၵုမ်ၵၼ် တီႈ လုမ်း ၽူႈၵွၼ်းၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ဢဵၼ်ႁႅင်းၵူၼ်း 50 ပၢႆ လႆႈဢွၼ်ၵၼ်တူၵ်းလူင်းတႅပ်း တတ်း 1 ယူႊၼိတ်ႊလႂ် ႁႂ်ႈလႆႈသႂ်ႇ 35 ပျႃး ၶိုၼ်းမိူၼ်ၵဝ်ႇ ဝႃႈၼႆ။
ၸၢႆးလူင် ၵူၼ်းမိူင်းသၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇၵပ်းလွင်ႈၼႆႉ ႁဝ်းၶႃႈၵူၼ်းမိူင်း လႆႈဢွၼ်ၵၼ်လူင်းလၢႆး မိုဝ်းသေ တႅမ်ႈလိၵ်ႈသူင်ႇၸူး ၽွင်းလူင်ၾၢႆႇၾႆးၾႃႉ 2 ပွၵ်ႈယဝ်ႉ။ ဢိင်ၼိူဝ်လိၵ်ႈတၢင်းၼိူဝ် လူင်းမႃးသေ ၵမ်းၼႆႉ ၶဝ်ၸင်ႇလူင်းၵူတ်ႇထတ်း ယဝ်ႉၵေႃႈ ၶဝ်ၶိုၼ်းႁွင်ႉ ၽူႈၵွၼ်းဢိူင်ႇ၊ ၾၢႆႇၶွမ်ႊပၼီႊ၊ ထဝ်ႈဝၢၼ်ႈ၊ ထဝ်ႈၼႃးၶဝ်၊ ပႃႇတီႇၵၢၼ် မိူင်း မႃးဢုပ်ႇၵၼ် တီႈလုမ်းၸႄႈတွၼ်ႈမိူင်းသၢတ်ႇ လႆႈဢုပ်ႇဢူဝ်း တူၵ်းလူင်းၵၼ်ဝႃႈ တေၶိုၼ်းၸႂ်ႉ ပဵၼ် ၼိုင်ႈယူႊ ၼိတ်ႊလႂ် 35 ပျႃး မိူၼ်ၵဝ်ႇၶိုၼ်းၵူၺ်း” ဝႃႈၼႆ။
သိုပ်ႇလၢတ်ႈဝႃႈ ၼႂ်းပၢင်ၵုမ်ၼၼ်ႉ ဢဝ်ၵၢင်ၸႂ်ၵူၼ်းတင်းၼမ်ဝႃႈ ယွၼ်ႉဝႃႈ ၵူၼ်းၶႂ်ႈလႆႈ ၼိုင်ႈၼူၺ်ႇလႂ် 35 ပျႃး ၼၼ်ႉ ႁူဝ်ပၢၵ်ႇလႂ် မီး 85 ပိူဝ်ႊသႅၼ်ႊ၊ ၵူၼ်းဢၼ်ၶႂ်ႈလႆႈ 85 ပျႃးသမ်ႉ ႁူဝ်ပၢၵ်ႇလႂ် မီး 15 ပိူဝ်ႊသႅၼ်ႊ ၵူၺ်းၵႃႈ လႆႈတူၵ်းလူင်းတႅပ်းတတ်းယွမ်းႁပ်ႉၵၼ်ၵႂႃႇ ၼိုင်းယူႊၼိတ်ႊလႂ် 35 ပျႃး တင်းမူတ်း ဝႃႈၼႆ။
ၾႆးၾႃႉ ဢၼ်ပၼ်ၵူၼ်းမိူင်းသၢတ်ႇ တင်း ၶႃႈႁၢပ်ႇၵၢၼ်လူင်ပွင်ၸိုင်ႈ တင်းမူတ်း မီးမီႊတိူဝ်ႊၿွၵ်ႉ 3,000 လုၵ်ႈပၢႆ။ ၵူၼ်းမိူင်းဢၼ်လႆႈၸႂ်ႉၾႆးၾႃႉသမ်ႉ ၼႂ်းဢိူင်ႇမႄႈသွၼ်ၸၢၼ်း၊ မႄႈသွၼ်ႁွင်ႇ၊ သၢႆးၶၢဝ်၊ ၵွင်းမူး တၼ်လႄႈ ဢိူင်ႇ ဝဵင်းလိူဝ်ႇ။ ပေႃးဢဝ်ဝၢၼ်ႈဝႃႈသမ်ႉ ဝၢၼ်ႈၵၢတ်ႇ၊ ဝၢၼ်ႈၵၢင်၊ ဝၢၼ်ႈၵျွင်း၊ ဝၢၼ်ႈတၢၵ်ႇလႅတ်ႇ၊ ဝၢၼ်ႈမႄႈသွၼ်ၸၢၼ်း၊ ဝၢၼ်ႈသၢႆးၶၢဝ်၊ ဝၢၼ်ႈၵွင်းမူးတၼ်၊ ဝၢၼ်ႈမႂ်ႇပၢင်ႁႆး၊ ဝၢၼ်ႈဝဵင်းၵွင်း၊ ဝၢၼ်ႈဝဵင်းၼိူဝ်၊ ဝၢၼ်ႈမႄႈသၢတ်ႇ၊ ဝၢၼ်ႈၵျုႈတႄႇ၊ ဝၢၼ်ႈဝဵင်းဝၢႆ၊ ဝၢၼ်ႈတၢင့်သႅင်လႄႈ ဝၢၼ်ႈႁုင်ႈ ၸိူဝ်းၼႆႉ။
ၸၢႆးသၢမ် ၵူၼ်းမိူင်းသၢတ်ႇ လၢတ်ႈဝႃႈ “ ဝၼ်းတီႈ 20 လိူၼ်ၼႆႉ ၶဝ်တေမႃးၵဵပ်းသဵၼ်ႈမၢႆ ၵႃႈၾႆးၾႃႉသေ ဝၼ်းတီႈ 23 ႁႂ်ႈၵႂႃႇသႂ်ႇငိုၼ်း ၵႃႈၾႆးဢၼ်ၵူၼ်းမိူင်းႁဝ်းၶႃႈ ၸႂ်ႉၵႂႃႇၼၼ်ႉ။ လင်ၸၢႆႇၵႃႈၾႆး ဝၼ်းတီႈ 23 ၵႂႃႇ ၶဝ်တေ သွၼ်ႇပဵၼ်ၼိုင်ႈၼူၺ်ႇ(ၼိုင်ႈယူႊၼိတ်ႊ)လႂ် 35 ပျႃး ၵႂႃႇမူတ်းမူတ်း” ဝႃႈၼႆ။
ပူၼ်ႉမႃး ဝၼ်းတီႈ 05/06/2018 ၼၼ်ႉ ၵူၼ်းမိူင်းသၢတ်ႇ ဢဵၼ်ႁႅင်း ႁိမ်း 300 ၵေႃႉ ႁူမ်ႈၵၼ် လူင်းၸိုဝ်ႈလူင်း လၢႆးမိုဝ်းတၢင်ႇထိုင် လူင်ပွင်ၸိုင်ႈမိူင်းတႆး ။ လွင်ႈဝႃႈ ဢမ်ႇႁၼ်လီၵမ်ႉထႅမ် လွင်ႈၶွမ်ႊပၼီႊလွႆသၢမ်သုမ် ၶိုၼ်ႈၵႃႈၾႆး လုၵ်ႉတီႈ 35 ပျႃး သေ ၶိုၼ်ႈပဵၼ် 85 ပျႃးၼၼ်ႉ။ တုၵ်းယွၼ်းထိုင် ႁႂ်ႈလူင်ပွင်ၸိုင်ႈ ၸီႉၸမ်ႈပၼ်ၾၢင်ႉ ၶွမ်ႊပၼီႊ လွႆသၢမ်သုမ် လွင်ႈဝႃႈ ဢမ်ႇလႆႈထၢမ်သဵင်ၵၢင်ၸႂ်ၵူၼ်းမိူင်းသေ ယွၼ်းၵႃႈၾႆးၶိုၼ်ႈသုင် ဝႃႈၼႆ။
တွၼ်ႈတႃႇၵူၼ်းမိူင်းသၢတ်ႇ တေလႆႈၾႆးၾႃႉၼၼ်ႉ မိူဝ်ႈပီ 2001-2002 ယူႇတီႈ ၵူၼ်းမိူင်းတင်း လူင်ပွင်ၸိုင်ႈ မၢၼ်ႈ ႁူမ်ႈၵၼ်သေ ၵေႃႇသၢင်ႈႁူင်းၾႆးၾႃႉ တီႈမႄႈၼမ်ႉပၢၼ်ႇ ဝႃႈၼႆ။
