ၸၢႆးလိၼ်းမႅတ်ႈ ၽူႈတႅၼ်းသၽႃးၸႄႈမိူင်း မိူင်းသူႈ ႁၢင်ႈႁႅၼ်း လွင်ႈၼၢင်းမူဝ်ႁွမ် ၵူၼ်းမိူင်းၼမ်ႉၶမ်း တၢင်ႇလၢတ်ႈ ၼႂ်း ပၢင်ၵုမ်သၽႃးမိူင်းတႆးၼၼ်ႉ ယူႇတီႈႁူဝ်ပဝ်ႈသၽႃးမိူင်းတႆး ပႆႇႁပ်ႉ ဝႃႈၼႆ။

ဝၼ်းတီႈ 19/09/2018 ပၢင်ၵုမ်သၽႃးမိူင်းတႆး ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 3 ဢၼ်ၸတ်းႁဵတ်းတီႈ လုမ်းသၽႃးၸႄႈမိူင်းတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်းၼၼ်ႉ ၸၢႆးလိၼ်းမႅတ်ႈ ၶိုင်ဢၢင်ႈ တၢင်ႇထိုင် ၼႂ်းသၽႃး လွင်ႈၼၢင်းမူဝ်ႁွမ် ၵူၼ်းမိူင်းၼမ်ႉၶမ်း ဢၼ်သိုၵ်းတဢၢင်း TNLA တီႉၺွပ်းတူဝ်ၵႂႃႇ မီးၶၢဝ်းတၢင်း 1 လိူၼ်ၼၼ်ႉ ႁူဝ်ပဝ်ႈသၽႃးမိူင်းတႆး ပႆႇႁပ်ႉ ႁႂ်ႈၵဵပ်းလၢႆးၸိုဝ်ႈ/ လၢႆးမိုဝ်း ၽူႈတႅၼ်းသၽႃးၸႄႈမိူင်းတႆး တင်းမူတ်း သေ မၼ်းၸၢႆးတေသိုပ်ႇတၢင်ႇပၼ်တီႈၼေႇပျီႇတေႃႇ။

ၸၢႆးလိၼ်းမႅတ်ႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်တင်ႈ မၢႆ 2 ၸႄႈဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ “ ဢၢင်ႈတေတၢင်ႇမိူဝ်ႈၼႆႉ ၵူၺ်းၵႃႈ ႁူဝ်ပဝ်ႈသၽႃးမိူင်းတႆးလၢတ်ႈဝႃႈ ယႃႇပေၽူမ်ႈတၢင်ႇ ပႆႇႁပ်ႉ။ ပေႃးၶႂ်ႈတၢင်ႇၵေႃႈ ႁႂ်ႈၵဵပ်းလၢႆးမိုဝ်း ၽူႈတႅၼ်းၼႂ်းသၽႃးမိူင်းတႆးသေ တၢင်ႇၶိုၼ်ႈမႃးလႄႈ တေသိုပ်ႇတၢင်ႇပၼ် တီႈၼေႇပျီႇတေႃႇ ဝႃႈၼႆသေ မိူဝ်ႈၼႆႉတေၵဵပ်းလၢႆးမိုဝ်း ၽူႈတႅၼ်းသၽႃးၼႂ်းမိူင်းတႆးၶႃႈဢေႃႈ”ဝႃႈၼႆ။

မိူဝ်ႈဝၼ်းတီႈ 17/09/2018 ယၢမ်းၵၢင်ၼႂ် မွၵ်ႈ 8 မူင်း ၵူၼ်းမိူင်းၼမ်ႉၶမ်း 2 မိုၼ်ႇပၢႆ ဢွၼ်ၵၼ်ပႆတၢင်း ၼႄၵၢင်ၸႂ် လူၺ်ႈလၢႆး ၵတ်းယဵၼ်သေ တုၵ်းယွၼ်းႁႂ်ႈတပ်ႉသိုၵ်းတဢၢင်း ပွႆႇပၼ်တူဝ်ၼၢင်းမူဝ်ႁွမ်ၶိုၼ်းၽႂ်းၽႂ်း ဝႃႈၼႆ။

မိူဝ်ႈဝၼ်းတီႈ 17/08/2018 ယၢမ်းၵၢင်ၼႂ်ၼၼ်ႉ ၵူၼ်းသိုၵ်းတဢၢင်း TNLA ႁႃႈၵေႃႉ ပႃးၵွင်ႈၸေးမိုဝ်း ၶဝ်ႈတီႉဢဝ် တူဝ်ၼၢင်းမူဝ်ႁွမ်ၵႂႃႇ တေႃႇထိုင်ယၢမ်းလဵဝ် ပႆႇပွႆႇပၼ်မႃး မီးလိူၼ်ပၢႆယဝ်ႉ ဝႃႈၼႆ။

ၼၢင်းမူဝ်ႁွမ်ၼႆႉ မီးလုၵ်ႈ 3 ၵေႃႉ၊ ပဵၼ်ၵူၼ်းႁႃၵိၼ်လဵင်ႉတွင်ႉသိုဝ်ႈယူဝ်း “မိူဝ်ႈပီ 2016 သိုၵ်း TNLA မႃးၵဵပ်းၶွၼ်ႇ (ၶွၼ်ႇႁိူၼ်း/ ၶွၼ်ႇႁၢၼ်ႉၶၢႆၶိူင်ႈ ႁဵတ်းႁိူၼ်း) ၵႂႃႇ 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်း ငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင် ၵေႃႉ ၺႃးသိုၵ်းမၢၼ်ႈ မူၵ်းယိုဝ်းၸွမ်းတၢင်းတၢႆၵေႃႉၼိုင်ႈ၊ တီႉလႆႈတူဝ် လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်းၾူၼ်းလၢတ်ႈဝၼ်းၼၼ်ႉ ၵမ်း လဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်ၵူၺ်းသေ ႁဝ်းဢမ်ႇဢဝ်သၢႆ ၸႂ်ႁဝ်းလႅၵ်ႈ သေပွင်ႇၶၢဝ်ႇလေႃႇ ႁဝ်းဢမ်ႇ ၸႂ်ႈၵူၼ်းဢဝ်ၶၢဝ်ႇပွင်ႇၶၢဝ်ႇပၼ်ၽႂ် – ဝႃႈၼႆ။