လုၵ်ႈႁဵၼ်းၸၼ်ႉသိပ်း ဢၼ်တူၵ်းၶွၵ်ႈဝႆႉ ၼႂ်းမိူင်းတႆးပတ်းပိုၼ်ႉ တင်းမူတ်း မီး 34 ၵေႃႉ ၼႂ်းၼၼ်ႉ တႃႇ 16 ၵေႃႉ တေလႆႈတိုဝ်ႉတၢင်းၶဝ်ႈတွပ်ႇလိၵ်ႈယူႇၼႆ ယူႇတီႈၽွင်းလူင်ၾၢႆႇတူင်ႇဝူင်းၵူၼ်း တွပ်ႇလၢတ်ႈၼႂ်းသၽႃးမိူင်းတႆး ၼင်ႇၼႆ။
ဝၼ်းတီႈ 18/09/2018 ၸၢႆးမဵဝ်းမိၼ်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းၼၢႆး တွင်ႈ ထၢမ် ၼႂ်းပၢင်ၵုမ်သၽႃးမိူင်းတႆး ဢၼ်ၸတ်းႁဵတ်း ၵမ်းတီႈ 2 ပွၵ်ႈထူၼ်ႈ 11 ဝၼ်းထူၼ်ႈ 2 တီႈလုမ်းသၽႃးမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၵဵဝ်ႇၵပ်းလွင်ႈလုၵ်ႈႁဵၼ်းၸၼ်ႉသိပ်း ဢၼ်တူၵ်းၶွၵ်ႈဝႆႉယူႇၼၼ်ႉ ၸွင်ႇ မီးၽႅၼ်ၵၢၼ် ႁႂ်ႈၶဝ်လႆႈႁပ်ႉမီးသုၼ်ႇၶဝ်ႈတွပ်ႇလိၵ်ႈၸၼ်ႉသိပ်း ဝႃႈၼႆ။
ၸၢႆးမဵဝ်းမိၼ်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ယိူင်း ဢၢၼ်းတႄႉ ဢမ်ႇၶႂ်ႈႁႂ်ႈဢိုတ်းပႅတ်ႈသဵၼ်ႈတၢင်းပၢႆးပၺ်ၺႃၶဝ်။ ဢၼ်ၶဝ်ႁွတ်ႈၽႅဝ်တီႈၼႂ်းၶွၵ်ႈၼၼ်ႉ ဢမ်ႇၶႂ်ႈႁႂ်ႈ ၸၢတ်ႈပၢၼ်ၶဝ် မူတ်းသဵင်ႈ ၼႂ်းၵၢၼ်ႁဵၼ်း။ ၶႂ်ႈႁႂ်ႈၶဝ် သိုပ်ႇၶတ်းၸႂ်ၵႂႃႇထႅင်ႈ။ ၽဝႃႉၶဝ်ပဵၼ်ၵူၼ်းတူၵ်းၶွၵ်ႈၼႆ သေ တႃႉၵေႃႈ ၶဝ်ယူႇၼႂ်းၶွၵ်ႈၼၼ်ႉ ဢမ်ႇလႆႈၶႂၢင်ႉလူလိၵ်ႈ လွင်ႈၼႆႉၶဝ်ပေႃးတူၵ်းသုမ်းႁႅင်းၼႃႇယဝ်ႉ။ ၶဝ်ဢမ်ႇလႆႈလူ လိၵ်ႈ/ဢၢၼ်ႇလိၵ်ႈ လိူဝ်ၼၼ်ႉ ဢမ်ႇမီးသုၼ်ႇလႆႈယိပ်းၵမ်တႅမ်ႈလူးၵွၼ်ႇ သင်ထူပ်းႁၼ်ၸိုင် ပၢႆၺႃးတၢမ်ႇၶွၼ်ႉ လူးၵွၼ်ႇ။ မိူဝ်ႈပူၼ်ႉမႃး ပီ 1991 ထိုင် 1999 ၼၼ်ႉ ၵူၼ်းယူႇၼႂ်းၶွၵ်ႈ ဢမ်ႇလႆႈလူလိၵ်ႈ၊ တႅမ်ႈလိၵ်ႈ။ ယွၼ်ႉၼၼ် လႄႈ ၶဝ်လႆႈႁူပ်ႉမႃးၸိူင်ႉၼၼ်။ တေႃႈလဵဝ် လုၵ်ႈႁဵၼ်း ဢၼ်တူၵ်းၶွၵ်ႈၼႆႉ မီးသုၼ်ႇလႆႈတွပ်ႇလိၵ်ႈၸိုင် တေလႆႈဝႃႈ ပဵၼ်ဢၼ်ၵၢမ်ႇလီတႄႉတႄႉ” ဝႃႈၼႆ။
ၻွၵ်ႊတိူဝ်ႊမဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၸႄႈမိူင်းတႆး လၢတ်ႈဝႃႈ “ ၼႂ်းၶွၵ်ႈမိူင်းတႆး ဢၼ်လုၵ်ႈႁဵၼ်း ၸၢႆး/ယိင်း တူၵ်းၶွၵ်ႈၶင်ဝႆႉယူႇၼၼ်ႉ ၼႂ်းၶွၵ်ႈယွင်ႁူၺ်ႈ 19 ၵေႃႉ၊ ၶွၵ်ႈၵဵင်းတုင် 4 ၵေႃႉ၊ လႃႈသဵဝ်ႈ 10 ၵေႃႉ၊ သီႇပေႃႉ 10 ၵေႃႉ ႁူမ်ႈၵၼ်တင်းမူတ်း မီး 34 ၵေႃႉ။ ၼႂ်း 34 ၵေႃႉၼၼ်ႉ ဢၼ်တေၶဝ်ႈတွပ်ႇလိၵ်ႈၸၼ်ႉသိပ်း ပီ 2018-2019 ၶွၵ်ႈယွင်ႁူၺ်ႈ 9 ၵေႃႉ၊ ၵဵင်းတုင် 4 ၵေႃႉ၊ လႃႈသဵဝ်ႈ 2 ၵေႃႉ၊ သီႇပေႃႉ 1 ၵေႃႉ ႁူမ်ႈၵၼ် တင်းမူတ်း 16 ၵေႃႉ ဝႃႈၼႆ။
ၸၢႆးမဵဝ်းမိၼ်ႉ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းမိူင်းၼၢႆး လၢတ်ႈဝႃႈ “ လုၵ်ႈႁဵၼ်းၸၼ်ႉ သိပ်း ၸၢႆး/ ယိင်း ဢၼ်တူၵ်းၶွၵ်ႈ ၼႂ်းမိူင်းတႆးသေ မီးသုၼ်ႇလႆႈၶဝ်ႈတွပ်ႇလိၵ်ႈၸၼ်ႉသိပ်း ပီ 2018-2019 ဢၼ် တေထိုင်ၼႆႉ ပွၵ်ႈၼႆႉ တေလႆႈဝႃႈ ပဵၼ်ပွၵ်ႈၵမ်း ဢွၼ်တၢင်းသုတ်းယဝ်ႉ” ဝႃႈၼႆ။
ပၢင်တွပ်ႇလိၵ်ႈၸၼ်ႉသိပ်း ၼႂ်းပီ 2018-2019 ၼႆႉ လုၵ်ႈႁဵၼ်းဢၼ်တူၵ်းၶွၵ်ႈ ၼႂ်းမိူင်းတႆး 16 ၵေႃႉ တေလႆႈၵႂႃႇ ၶဝ်ႈတွပ်ႇၸၼ်ႉသိပ်း တီႈၼႂ်းၶွၵ်ႈဢိၼ်းၸဵင်ႇ ဢမ်ႇၼၼ် ၶွၵ်ႈဝဵင်းလိူဝ်ႇ(မၼ်းတလေး) ၼႆႉၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ