ၸုမ်းၾိင်ႈငႄႈ/ၾိင်ႈထုင်း ပွႆးႁူင်းၾႆးမိၼ် ၸႄႈမိူင်းတႆး ပိုၼ်ၽၢဝ်ႇပဵၼ်တၢင်းၵၢၼ်ဝႃႈ ပၢင်ပွႆးႁူင်းၾႆးမိၼ် လိူၼ် သိပ်းသွင်မူၼ်း တီႈတူၼ်ႈတီးၼႆႉ တႅပ်းတတ်း တေၸတ်းႁဵတ်း တႃႇ 9 ဝၼ်း ဝႃႈၼႆ။
မိူဝ်ႈဢွၼ်တၢင်းမီးၶၢဝ်ႇဢွၵ်ႇမႃးဝႃႈ ဝဵင်းတူၼ်ႈတီးတေဢမ်ႇမီးပွႆးပွႆႇႁူင်းၾႆးမိၼ်/ လိူၼ် 12 ၼႆသေတႃႉ ယၢမ်း လဵဝ် ၶွမ်ႊမတီႊတႅပ်းတတ်းဝႃႈ တေၸတ်းႁဵတ်း ၼႂ်းဝၼ်းတီႈ 15-22/11/2018 တႃႇၶၢဝ်းတၢင်း 9 ဝၼ်း တီႈၵၢင် ပၢင်ႇဢဝုၺ်ႇယႃႇ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
ၻွၵ်ႊတိူဝ်ႊတၼ်းဝိၼ်း ႁူဝ်ပဝ်ႈၾိင်ႈငႄႈ/ၾိင်ႈထုင်း ပၢင်ပွႆးႁူင်းၾႆးမိၼ် ၸႄႈမိူင်းတႆး လၢတ်ႈတီႈသိုဝ်ႇၶၢဝ်ႇ 7Day ဝႃႈ “ ပၢင်ၶေႉၶႅင်ႇပွႆႇႁူင်းၾႆးမိၼ်ၼႆႉ တင်းမူတ်း တေၶႅင်ႇၵၼ် 8 ဝၼ်း။ ဝၼ်းလိုၼ်းသုတ်းထႅင်ႈဝၼ်းၼိုင်ႈတႄႉ တေပဵၼ်ဝၼ်းတွၼ်ႈသူးရၢင်းဝလ်း။ ပီၼႆႉ ႁူင်းၾႆးဢၼ်တေၶဝ်ႈၶႅင်ႇၵၼ် တေၼမ်လိူဝ်ပီပူၼ်ႉထႅင်ႈ” ဝႃႈၼႆ။
မိူဝ်ႈပီ 2017 ၼၼ်ႉ ပွႆးလိူၼ်သိပ်းသွင်မူၼ်း(ပွႆးႁူင်းၾႆးမိၼ်)ၼႆႉ ၸတ်းႁဵတ်း တႃႇၶဝ်းတၢင်း 10 ဝၼ်း။ ပီၼႆႉသမ်ႉ တေၸတ်းႁဵတ်း တႃႇ 9 ဝၼ်း။ တေလႆႈဝႃႈ ယွမ်းလူင်းလိူဝ်ပီပူၼ်ႉဝၼ်းၼိုင်ႈ ဝႃႈၼႆ။
ပီ 2017 ၼၼ်ႉ ၸတ်းႁဵတ်း ၼႂ်းဝၼ်းတီႈ 26 လိူၼ်ဢွၵ်ႊထူဝ်ႊၿိူဝ်ႊ ထိုင် ဝၼ်းတီႈ 4 လိူၼ်ၼူဝ်ႊဝႅမ်ႊၿိူဝ်ႊ။ ႁူင်း ၾႆးမိၼ် ဢၼ်ၶဝ်ႈၶႅင်ႇၵၼ် တင်းမူတ်းမီး 300 လုၵ်ႈပၢႆ ႁူင်းၾႆးမိၼ်ဢၼ်တူၵ်းတိူဝ်ႉသႂ်ႇႁိူၼ်းၵူၼ်း၊ ဢၼ်မႆႈႁိူၼ်း၊ ဢၼ်တူၵ်းတိူဝ်ႉသႂ်ႇၵူၼ်းတူၺ်းပွႆးၵေႃႈမီးလႄႈ ပီၼႆႉလွင်ႈႁူမ်ႇလူမ်ႈၵေႃႈ တေၶဵင်ႈၶႅင်လိူဝ်ၵူႈပီ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ