ၵူၼ်းၸၢႆး ၼႂ်း ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၵေႃႉၼိုင်ႈ ထုၵ်ႇသိုၵ်းၵဝ်ႈၵၢင်ႉ MNDAA ပေႃႉႁႅမ် ထိုင်တီႈမၢတ်ႇၸဵပ်းမၢၼ်ႉၵမ်ႇ ၵူၼ်းပိုၼ်ႉတီႈလၢတ်ႈၼင်ႇၼႆ ။

မိူဝ်ႈဝႃႈ ဝၼ်းတီႈ 14/7/2026 ယၢမ်းၵၢင်ၼႂ် 10 မူင်း ၸုမ်းသိုၵ်းၵဝ်ႈၵၢင်ႉ ႁွင်ႉၵူၼ်းဝၢၼ်ႈလႄႈ ၵၢင်ႉၵႄႇ ႁဵတ်းပၢင်ၵုမ်ၵၼ် တီႈလုမ်းဝၢၼ်ႈဢီႇၼၢႆး ၊ တီႈၼႂ်းဢိူင်ႇဢီႇၼၢႆး   ။ ၼႂ်းပၢင်ၵုမ်ၼၼ်ႉ ပႃးၵူၼ်းဝၢၼ်ႈ လႄႈ ပူႇၵၢင်ႉၵႄႇၵုမ်းဝၢၼ်ႈ ႁူမ်ႈသဵင်ႈ ၶိုၼ်ႈႁွတ်ႈ 30 ၵေႃႉ ဝႃႈၼႆ  ။

ဝၢႆးပၢင်ၵုမ်ယဝ်ႉၼၼ်ႉ ၽွင်းၵၢင်ႉၵႄႇလႄႈ ၵူၼ်းဝၢၼ်ႈပွၵ်ႈၶိုၼ်းႁိူၼ်းၼၼ်ႉ ၵူၼ်းၸၢႆးဢႃယု 30 ပၢႆ  ၵေႃႉၼိုင်ႈ ထုၵ်ႇၸုမ်းသိုၵ်းၵဝ်ႈၵၢင်ႉ MNDAA ၵူတ်ႇထတ်းတီႈ 4 လၵ်း ႁိမ်းၼွင်မူဝ် ၼွင်လႅင် ၼိူဝ်သဵၼ်ႈ တၢင်းလူင် ဝၢၼ်ႈဢီႇၼၢႆး – လႃႈသဵဝ်ႈသေ ပေႃႉႁႅမ်ထိုင်တီႈမၢတ်ႇၸဵပ်း ၼႆယဝ်ႉ ။ 

 ၵူၼ်းဢၼ်ႁူႉၸွမ်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ၶဝ်ႁႄႉသေလႄႈ ၵူၼ်းဝၢၼ်ႈဢမ်ႇၵိုတ်း ပၼ်ၵမ်းလဵဝ်။ ၽိူဝ်ႇၵိုတ်းလႆႈၵေႃႈသမ်ႉပေႃးပူၼ်ႉ တီႈၶဝ်ႁႄႉၼၼ်ႉဢိတ်းၼိုင်ႈ။ ၵူၼ်းပႂ်ႉယၢမ်းၵေႃႉၼိုင်ႈ ဢမ်ႇလၢတ်ႈသင်သေ မႃးတူပ်းပၼ်ၼႃႈၸၢႆးၵူၼ်းဝၢၼ်ႈၼၼ်ႉႁေလႄႈလၢတ်ႈၵူၼ်းဝၢၼ်ႈၼၼ်ႉဝႃႈ ႁႂ်ႈၵႂႃႇၸူးၽူႈၼမ်းၶဝ်။ ၽွင်းၼၼ်ႉသိုၵ်းၵဝ်ႈၵၢင်ႉထႅင်ႈၵေႃႉၼိုင်ႈပႆမႃးၸူးၸၢႆးၵူၼ်းဝၢၼ်ႈၼၼ်ႉသေ ဢဝ်ၽႃႇမိုဝ်းမႃးတူပ်းပၼ် ၼႃႈမၼ်း ၵမ်းၼိုင်ႈ လႄႈ လၢတ်ႈဝႃႈ ႁႂ်ႈၵႂႃႇၸူးၽူႈဢွၼ်ႁူဝ်ၶဝ်ၼႆဢေႃႈ ။ ယဝ်ႉၵေႃႈ ၵူၼ်းသိုၵ်းၵဝ်ႈၵၢင်ႉထႅင်ႈၵေႃႉၼိုင်ႈသမ်ႉ ဢဝ်ၵွင်ႈ မႃးသွင်ႉတွႆႇပၼ် တီႈႁူဝ်မႃႇသမ်ႉပေႃးမၢၼ်ႉပေႃးၵမ်ႇပေႃးလိူတ်ႈ။ ယၢမ်းလဵဝ်ထုၵ်ႇယူတ်းယႃတူဝ်ဝႆႉ”- ဝႃႈၼႆ။

မၼ်းၸၢႆးသိုပ်ႇလၢတ်ႈထႅင်ႈဝႃႈ – တီႈၵူၼ်းၸၢႆးၺႃးပေႃႉထုပ်ႉၼႆႉ ဢမ်ႇၸႂ်ႈပဵၼ်ၵဵတ်ႉလၢၼ်ႇတႄႉတႄႉ ပဵၼ်တီႈၸုမ်းသိုၵ်းၵဝ်ႈၵၢင်ႉ ပႂ်ႉႁႄႉၵူတ်ႇထတ်းၵူၼ်းၵႂႃႇမႃးၸွမ်းသဵၼ်ႈတၢင်းလူင် ၼိူဝ်သဵၼ်ႈတၢင်း ဝၢၼ်ႈဢီႇၼၢႆးလႄႈ လႃႈသဵဝ်ႈ ၵူၼ်းပိုၼ်ႉတီႈလၢတ်ႈ ။

ၵဵဝ်ၵပ်းလွင်ႈၼႆႉ ၵူၼ်းၸၢႆးပိုၼ်ႉတီႈထတ်းသၢင်ႈလၢတ်ႈဝႃႈ  လွင်ႈႁဵတ်းသၢင်ႈၼႆႉ ပဵၼ် ၵၢၼ်လွၵ်ႇငိုတ်ႈတေႃႇၵူၼ်းၵႂႃႇမႃး ပႆၼိူဝ်သဵၼ်ႈတၢင်းမီးၵဵတ်ႉလၢၼ်ၼၼ်ႉ ႁဵတ်းႁႂ်ႈ ၵူၼ်းမိူင်း ဢမ်ႇမီးလွင်ႈထၢင်ႇႁၢင်ႈလွတ်ႈလႅဝ်း မႆႈၸႂ်လွင်ႈႁူမ်ႇလူမ်ႈဝႆႉ ၼႆယဝ်ႉ ။

ၵူၼ်းၸၢႆးဝဵင်းလႃႈသဵဝ်ႈလၢတ်ႈၽူႈတွႆႇႁွၵ်ႈဝႃႈ -“ ၵဵတ်ႉလၢၼ်ႇၾၢႆႇၼွၵ်ႈလႃႈသဵဝ်ႈ ၼႆႉမီးၼမ်ၼႃႇ ၊ ၵူၼ်းမိူင်းၵႂႃႇမႃးဢမ်ႇမီးလွင်ႈလွတ်ႈလႅဝ်း ၊ လိူဝ်သေၼၼ်ႉ ဢိင်ႇၼိူဝ်ၵႂၢမ်းလၢတ်ႈၽႃႇသႃႇ ဢမ်ႇမိူၼ်ၵၼ်သေ လႆႈၵူဝ်ႇၸႅတ်ႈထၢမ် ၊ ၵူဝ်ၵႂၢမ်းလၢတ်ႈဢမ်ႇပွင်ႇၵၼ် ၊ လိူဝ်သေလႆႈၵူဝ် သမ်ႉၺႃးပေႃႉထုပ်ႉ ပဵၼ်ႁိုဝ်ၵေႃႈယဝ်ႉ တီႈၵဵတ်ႉလၢၼ်ႇၼၼ်ႉ ဢမ်ႇၵိုင်လီပႃးတိၼ်ပႃးမိုဝ်းပေႃႉထုပ်ႉ လီထၢမ်လွင်ႈတၢင်းမၼ်းဢေႃႈ”- ဝႃႈၼႆ ။ 

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ပဵၼ်သိုၵ်းမၢၼ်ႈယိုတ်းမိူင်း ၵုမ်းၵမ်ဝႆႉသေ ၾၢႆႇၼွၵ်ႈဝဵင်းတႄႉ ပဵၼ်ၸုမ်းသိုၵ်း ၶႄႇၵဝ်ႈၵၢင်ႉ (MNDAA) ပၼ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ်ၼႆယဝ်ႉ ။