ၵူၼ်းၼုမ်ႇ ၸၢဝ်းတႆး တင်း ၸၢဝ်းလွႆ(တဢၢင်း) 4 ၵေႃႉ ၵႂႃႇႁဵတ်းၵၢၼ်တၢင်းမိူင်းမၢဝ်း ၾၢႆႇမိူင်းၶႄႇသေ ပွၵ်ႈမႃးၶိုၼ်းတၢင်း ႁူဝ်ၼွင် – ၼမ်ႉပၢၼ်းၼၼ်ႉ ႁၢႆတူဝ်ၵႂႃႇ မိူဝ်ႈၵၢင်လိူၼ်ဢေႃႊၵတ်ႊသ်ၼၼ်ႉ ထိုင်ယၢမ်း လဵဝ်ပႆႇႁၼ် ပေႃႈမႄႈပီႈ ၼွင်ႉၸိူဝ်ႉၶိူဝ်းတၢင်းလင် ပဵၼ်ဢၼ်မႆႈၸႂ် ဝႃႈၼႆ။

ၵူၼ်းၼုမ်ႇ 4 ၵေႃႉ ဢၼ်ႁၢႆတူဝ်ၵႂႃႇၼၼ်ႉ ပဵၼ်ၸၢႆးဢၢႆႈယွၼ်း ဢႃယု 23 ပီ၊ ၸၢႆးဢၢႆႈထုၼ်း ဢႃယု 22 ပီ၊ ၸၢႆးဢၢႆႈ ယီႈ ဢႃယု 19 ပီလႄႈ ၸၢႆးမၢၼ်းလူႇၶဝ် ၸိူဝ်းၼႆႉ။ မိူဝ်ႈဝၼ်းတီႈ 19/08/2018 ၼၼ်ႉ ၶဝ်ၵႂႃႇႁဵတ်းၵၢၼ်သေ ပွၵ်ႈ တၢင်းတႃႈႁိူဝ်း ႁူဝ်ၼွင် – ၼမ်ႉပၢၼ်း လႅၼ်လိၼ်မိူင်းတႆး – မိူင်းၶႄႇ ၼႂ်းၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။

ၸၢႆးၵျၢၼ်ႇလႃႉ ၵေႃႉပဵၼ်ပီႈဢၢႆႈၵူၼ်းၼုမ်ႇ ၵေႃႉၼိုင်ႈ ဢၼ်ႁၢႆၵႂႃႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ၶႃႈႁဝ်းၵပ်း ၾူၼ်းၵႂႃႇတီႈပီႈၼၢင်းဢၢႆႈထုၼ်း။ ပီႈၼၢင်းဢၢႆႈထုၼ်းၵေႃႈ ၼႅတ်ႈၵႂႃႇထၢမ်တီႈ တႃႈႁိူဝ်းႁူဝ်ၼွင် ၼမ်ႉပၢၼ်း၊ ၽႂ်ၵေႃႈဢမ်ႇၶႂ်ႈလၢတ်ႈ ၵမ်းၼႆႉ ၶဝ်ဝႃႈလႆႈႁၼ် ပိူၼ်ႈၺွပ်းၵႂႃႇၵေႃႉၼိုင်ႈသေ ထႅင်ႈ 3 ၵေႃႉသမ်ႉ ၶဝ်လႅၼ်ႈပၢႆႈ ၵူၺ်းၵႃႈ ၶဝ်လႅၼ်ႈဢမ်ႇပူၼ်ႉ၊ ၺႃးပိူၼ်ႈၺွပ်း လႆႈသေ တေႃႇထိုင်ယၢမ်းလဵဝ် ဢမ်ႇႁၼ် ၶဝ်ပွၵ်ႈႁိူၼ်းမႃးၶႃႈ” ဝႃႈၼႆ။

သိုပ်ႇလၢတ်ႈဝႃႈ ဢၼ်ၶဝ်ၵႂႃႇႁဵတ်းၵၢၼ်ၼႂ်းမိူင်းမၢဝ်းၼၼ်ႉ ၶဝ်ၵႂႃႇႁႃငိုၼ်း တႃႇၶိုၼ်ႈႁူင်းႁဵၼ်း ယဝ်ႉၵေႃႈ တႃႇလဵင်ႉ ၼႂ်းၼႃႈႁိူၼ်း သင်ဝႃႈ ၸုမ်းယိပ်းၵွင်ႈၵၢင်ႇၸုမ်းလႂ် တီႉၵႂႃႇၵေႃႈ ၶႅၼ်းတေႃႈ ပွႆႇပၼ်တူဝ်ၶဝ်ပွၵ်ႈမႃးၶိုၼ်းသေၵမ်း။ ဢမ်ႇၼၼ် သင်ဝႃႈ ၽႂ်ၵေႃႉလႂ် ထူပ်းႁၼ်ၶဝ်ၼႆၵေႃႈ ၶႅၼ်းတေႃႈ ပွင်ႇၶၢဝ်ႇၸူး ၵူၼ်းႁိူၼ်းၵူၼ်းယေး ၶဝ်ၽွင်ႈ ယွၼ်းတၢင်း ၸွႆႈထႅမ်ယႂ်ႇၼမ်ၶႃႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈပေႃႈမႄႈပီႈၼွင်ႉၸိူဝ်ႉၶိူဝ်း ၵူၼ်းၼုမ်ႇ 4 ၵေႃႉၼႆႉ ပဵၼ်ဢၼ်မႆႈၸႂ်သေ ထိုင်မႃးၼိုင်ႈလိူၼ် ယဝ်ႉ ပႆႇလႆႈငိၼ်းၶၢဝ်ႇငၢဝ်းသင် ယွၼ်ႉၼၼ် ၸင်ႇဢွၼ်ၵၼ် ၵႂႃႇတိူင်ႇလၢတ်ႈ/ ပွင်ႇၶၢဝ်ႇပၼ် တီႈလုမ်းပႃႇတီႇ ႁူဝ်သိူဝ် ၸႄႈဝဵင်းၵူတ်ႉၶၢႆ၊ မူႇၸေႊ၊ လႃႈသဵဝ်ႈ ႁႂ်ႈၸွႆႈႁႃတူဝ်ပၼ် ဝႃႈၼႆ။

ၽူႈမီးပုၼ်ႈၽွၼ်း ၼႂ်းလုမ်းပႃႇတီႇႁူဝ်သိူဝ် ၵေႃႉၼိုင်ႈ လၢတ်ႈဝႃႈ “ ၵူၼ်းၼုမ်ႇ ဢၼ်ႁၢႆၵႂႃႇၼၼ်ႉ ယူႇတီႈပေႃႈ မႄႈပီႈၼွင်ႉၶဝ် ပဵၼ်ဢၼ်မႆႈၸႂ်သေ မႃးယွၼ်းတၢင်းၸွႆႈထႅမ်တီႈပႃႇတီႇႁူဝ်သိူဝ် ၵူတ်ႉၶၢႆ၊ လႃႈသဵဝ်ႈလႄႈ မူႇၸေႊ ယူႇတီႈၽူႈတႅၼ်းႁဝ်းၶႃႈသေ တိုၵ်ႉဢွၼ်ၵၼ်ႁႃလၢႆးတၢင်းမၼ်း တႃႇတေၸွႆႈထႅမ်ပၼ်ၶဝ်ယူႇ” ဝႃႈၼႆ။

ၵူၼ်းၼုမ်ႇ ၸၢဝ်းတႆး၊ တဢၢင်း 4 ၵေႃႉၼႆႉ ပဵၼ်ၵူၼ်းၸႃတိ ဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။

တၢင်းပွတ်းတႃႈႁိူဝ်း ႁူဝ်ၼွင် – ၼမ်ႉပၢၼ်းၼၼ်ႉ ပဵၼ်လႅၼ်လိၼ် တႆး – ၶႄႇသေ မီးၸုမ်းယိပ်းၵွင်ႈၵၢင်ႇတူင်ႉၼိုင် ၵႂႃႇမႃး မိူၼ်ၼင်ႇ သိုၵ်းလူင်ပွင်ၸိုင်ႈမၢၼ်ႈ၊ ၸုမ်းပျီႇတူႉၸိတ်ႉ၊ သိုၵ်းတဢၢင်း၊ သိုၵ်းၶၢင် KIA လႄႈ သိုၵ်းတႆး RCSS ၸိူဝ်းၼႆႉ ဝႃႈၼႆ။