ၼႂ်းၸိုင်ႈတႆးပွတ်းၵၢင် ပွတ်းၸၢၼ်းလၢႆလၢႆဝဵင်း လူမ်းလူင်ၶဝ်ႈၽတ်ႉတူၼ်းမႆႉလူင် သဝ်ၾႆးႁၵ်း ပႃးၸဵမ်ၼႂ်းၸႄႈ ဝဵင်းတူၼ်ႈတီး ဝဵင်းၶူဝ်လမ် ၸိူဝ်းၼႆႉ။
ဝၼ်းတီႈ 17/09/2018 တင်ႈတႄႇဝၢႆးဝၼ်းတေႃႇ ၵၢင်ၶမ်ႈ လူမ်းလူင်ၶဝ်ႈၽတ်ႉဝဵင်း တၢင်ႉယၢၼ်း၊ တူၼ်ႈတီး၊ ၶူဝ်လမ်၊ မိူင်းၼၢႆး၊ လၢင်းၶိူဝ်းလႄႈ မိူင်းပၼ်ႇ ၸိူဝ်းၼႆႉ။
ဝၼ်းတီႈ 17/09/2018 ယၢမ်းႁူဝ်ၶမ်ႈမွၵ်ႈ 5:45 မူင်းၼၼ်ႉ လူမ်းလူင် ၽတ်ႉၼႂ်းပွၵ်ႉ 1 ဝဵင်းၶူဝ်လမ် ၸႄႈဝဵင်း ၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တူၼ်ႈမႆႉလူင် မႆႉဢွၼ်ႇလႄႈ သဝ်ၾႆးၾႃႉ ႁၵ်းလူမ်ႉ တင်းၼမ် ဝႃႈၼႆ။
ၸၢႆးမူၼ်းဢွၼ်ႇ ၵူၼ်းၼုမ်ႇတႆး ဝဵင်းၶူဝ်လမ် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး လူမ်ႉၽတ်ႉႁႅင်းတႄႉ မႃးမွၵ်ႈႁိမ်း 6 မူင်း တူၼ်ႈမႆႉလူမ်ႉ သဝ်ၾႆးၾႃႉ တင်းၼမ် ႁၵ်းလူမ်ႉ။ ၾႆးၾႃႉမွတ်ႇၵႂႃႇတႄႇၸဵမ် လူမ်းၽတ်ႉပဝ်ႇၼၼ်ႉ တေႃႇ ထိုင်ယၢမ်းလဵဝ် ၾႆးၾႃႉပႆႇမႃး။ လႆႈၸႂ်ႉၾႆးထၢၼ်ႇသေ တူမ်ႈႁုင်ၶဝ်ႈၵူၺ်း” ဝႃႈၼႆ။
ၼႂ်းဝဵင်းၶူဝ်လမ် ဢၼ်တူၼ်ႈမႆႉ သဝ်ၾႆးၾႃႉ ႁၵ်းလူမ်ႉသမ်ႉ ၵမ်းၼမ်ပဵၼ်ပွၵ်ႉ 1 ။ လိူဝ်ၼၼ်ႉ တၢင်ႇပွၵ်ႉၵေႃႈ ပဵၼ် ယူႇ ၵူၺ်းၵႃႈ ဢမ်ႇပေႃးႁၢဝ်ႈႁႅင်းမိူၼ်ပွၵ်ႉ 1 ဝႃႈၼႆ။
လူမ်းလႅင်ႉလူင်ဢၼ်ၶဝ်ႈမႃးတၢင်း ပၢင်ႇလၢႆႇၶႄႇ(ၸၢၼ်း) ၼၼ်ႉ လတ်းမိူင်းဝႅတ်ႉၼၢမ်း တွၼ်ႈၼိူဝ်။ မိူင်းၶႄႇ ယုၼ် ၼၢၼ်တွၼ်ႈၸၢၼ်း လတ်းထိုင်မိူင်းတႆးသေတႃႉ ႁႅင်းလူမ်းလႅင်ႉဢွၼ်ႇလူင်းလႄႈ ၵူၼ်းမိူင်းတႆး ဢမ်ႇၺႃးၽေး လူမ်းလႅင်ႉလူင် ႁၢဝ်ႈႁၢဝ်ႈႁႅင်းႁႅင်း။ တင်းမိူင်းၶႄႇတႄႉ ယင်းမီးၵူၼ်းလူႉတၢႆပႃးလူးၵွၼ်ႇ။
