ၵူၼ်းၼုမ်ႇလႄႈ ၵူၼ်းမိူင်းလၢႆးၶႃႈ တေႁူမ်ႈၵၼ်ၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးပၢႆးႁၼ် ပွၵ်ႈၵမ်းတီႈ 5 ႁွင်ႉမွၵ်ႇၽူႈသူၼ်ၸႂ်ၶဝ်ႈႁူမ်ႈထွမ်ႇငိၼ်း။
ဝၼ်းတီႈ 30/09/2018 ၼႆႉၸုမ်းၵူၼ်းၼုမ်ႇတႆးလႄႈ ၵူၼ်းမိူင်းလၢႆးၶႃႈ တေႁူမ်ႈၵၼ် ၸတ်းႁဵတ်းပၢင်တၢၼ်ႈၶႆႈလိၵ်ႈလၢႆးပၢႆးႁၼ် ပွၵ်ႈၵမ်းတီႈ 5 တီႈႁွင်ႈၸွမ်သႅင် ဢိူင်ႇႁူဝ်ၼွင်လူင် ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
တီႈပၢင်တၢၼ်ႈၶႆႈၼၼ်ႉ တေမီး ၽူႈတၢၼ်ႈၶႆႈမိူၼ်ၼင်ႇ ၸဝ်းၶူးသုၶမ်း ၽူႈမၢႆလူင် ငဝ်ႈငုၼ်းမုၵ်ႉၸုမ်းလူင်သင်ႇၶႃႇၸိုင်ႈတႆး၊ ၸၢႆးႁၢၼ်မိူင်း (ၸၢႆးၵၢမ်ႈယႂ်ႇ)၊ ၸၢႆးသႅင်မိူင်း (ၶမ်းၵူႇ) ၼၢင်းႁဵဝ်းသႅင် (ၵေႃတႆး) ၸိူဝ်းၼႆႉ။
ၸၢႆးလႅင်းႁိူင်း တီႈၵိူဝ်းၵုမ် ၵူၼ်းၼုမ်ႇတႆးလၢႆးၶႃႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ – “ ယိူင်းဢၢၼ်း ဢၼ်ႁဝ်းၶႃႈ ၸတ်း ႁဵတ်းတႄႉ ႁႂ်ႈၵူၼ်းၼုမ်ႇၵူၼ်းမိူင်းႁဝ်းလႆႈမီးတၢင်းႁူႉတၢင်းႁၼ် ၶိုတ်းပဵင်းပိူၼ်ႈ ႁႂ်ႈမေႃႁူႉၸၵ်းၾိင်ႈႁိတ်ႈႁွႆးလိၵ်ႈလၢႆးၵႂၢမ်းလၢတ်ႈတႆးသေ မေႃပႅင်းမႅတ်ႇၵႂႃႇ၊ ႁႂ်ႈပဵၼ်ၵၢၼ် ယုၵ်ႉယွင်ႈၽူႈႁူႉၽူႈႁၼ် ႁဝ်းႁႂ်ႈမီးႁႅင်းၸႂ်သိုပ်ႇတႅမ်ႈဢွၵ်ႇတၢင်းႁူႉတၢင်း ႁၼ်ၵႂႃႇမိူဝ်းၼႃႈၸိူဝ်းၼႆႉ ၵွပ်ႈၼၼ်လႄႈ ပီႈၼွင်ႉႁဝ်းၶႃႈ တီႈၸမ်တီႈၵႆ သင်ဝႃႈတူဝ်ႈတၼ်းၼႆ ၶႅၼ်းတေႃႈမႃးၶဝ်ႈႁူမ်ႈၼမ် ၼမ်သေၵမ်းၶႃႈ” ဝႃႈၼႆ။
ယိူင်းဢၢၼ်း တႃႇႁႂ်ႈၵူၼ်းဝၢၼ်ႈၵူၼ်းမိူင်း လႆႈမီးတၢင်းႁူႉတၢင်းႁၼ်သေ ၸတ်းပၢင်တၢၼ်ႈၶႆႈ လိၵ်ႈလၢႆး ပၢႆးႁၼ်မႃးတင်ႈတႄႇပီ 2014 ၸတ်းႁဵတ်းၵွၼ်ႇၼႃႈဢွၵ်ႇဝႃႇမႃးၵူႈပီၼႆယဝ်ႉ။