တႆးႁႃႁဵတ်းၵၢၼ် ၼႂ်းၸႄႈတွၼ်ႈၵဵင်းမႆႇ ၶႃႈၵၼ်တၢႆ – ပလိၵ်ႈထႆးတီႉလႆႈတူဝ်ၵူၼ်းႁၢႆႉ

တႆးၵႂႃႇႁဵတ်းၵၢၼ်မိူင်းထႆး ၼႂ်းၸႄႈတွၼ်ႈၵဵင်းမႆႇ ၸႄႈဝဵင်းမႄႈရိမ်း ၺႃးၶႃႈတၢႆႁိုင် 20 ဝၼ်းပၢႆယဝ်ႉ ပလိၵ်ႈထႆးၸင်ႇၵွႆႈႁူႉ လမ်းၵႂႃႇတီႉတူဝ်ၵူၼ်းႁၢႆႉ ၊ တီႉလႆႈယဝ်ႉ လႆႈႁူႉဝႃႈ ပဵၼ်တႆးၵူၺ်းဝႃႈၼႆ။

ဝၼ်းတီႈ 17/09/2018 ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ပိုတ်ႇလၢတ်ႈဝႃႈ – ၸဝ်ႈၼႃႈတီႈပလိၵ်ႈထႆး ဝဵင်းၵဵင်းမႆႇ တီႉၺွပ်းလႆႈတူဝ်ၸၢႆးတႃႉ ဢႃယု 32 ပီ ၵေႃႉဢၼ်ၶႃႈႁႅမ် ၸၢႆးထုၼ်း ဢႃယု 45 ပီ ပူၼ်ႉမႃး မိူဝ်ႈႁၢင်လိူၼ်ဢေႃႊၵတ်ႉသ် 2018 ။

ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ- “ ၸဝ်ႈၼႃႈတီႈၶဝ်ၵပ်းမႃးဝႃႈ မိူဝ်ႈလဵဝ်တီႉၺွပ်းလႆႈတူဝ်ၸၢႆးတႃႉ ၵူၼ်းၵေႃႉဢၼ် ႁႅမ်ၸၢႆးထုၼ်းတၢႆ၊ မိူဝ်ႈၼႆႉၸဝ်ႈၼႃႈတီႈတေဢဝ်တူဝ် မၼ်းၸၢႆးၵႂႃႇၸီႉၼႄ ဢၼ်ၶဝ်ႁႅမ်ၵၼ်ၼႆႉ လွင်ႈၸဝ်ႈၼႃႈတီႈ တေတႅပ်းတတ်း ပၼ်တူတ်ႈတၢမ်ႇၸိူင်ႉႁိုဝ်ဢၼ်ဝႃႈၼၼ်ႉ ႁဝ်းၶႃႈတေသိုပ်ႇတိတ်းတၢမ်ၵႂႃႇထႅင်ႈ ” ဝႃႈၼႆ။

ပူၼ်ႉမႃးမိူဝ်ႈ ဝၼ်းတီႈ 13/09/2018 ၵေႃႉပဵၼ်လုၵ်ႈၸၢႆး ၸၢႆးထုၼ်း ဢႃယု 20 ပီ ၵႂႃႇၸႅင်ႈၵႂၢမ်းတီႈႁူင်း ပလိၵ်ႈမႄႈရိမ်း လွင်ႈဝႃႈပေႃႈမၼ်းၸၢႆး ႁၢႆတူဝ်ၵႂႃႇၸဵမ်မိူဝ်ႈဝၼ်းတီႈ 24/08/2018 သေ ၵပ်းသိုပ်ႇၵေႃႈ ဢမ်ႇလႆႈ ။ ထိုင်မႃးဝၼ်းတီႈ 15/09/2018 ၸၢႆးၵေႃးလိင်ႇ လုင်းလၢႆး ပီႈၼွင်ႉၽူႈတၢႆလႆႈထူပ်းႁၼ်ၶၢပ်ႈတူဝ် ၸၢႆးထုၼ်း တၢႆဝႆႉယူႇၼႂ်းဢုမ်ၼမ်ႉ ၼဝ်ႈလၢၼ်ႈၵႂႃႇမူတ်းယဝ်ႉၵိုတ်းလုပ်ႇမၼ်းၵူၺ်း ၸင်ႇၸႅင်ႈၸဝ်ႈ ၼႃႈတီႈလႄႈၾၢႆႇမေႃယႃၵူတ်ႇထတ်းလွင်ႈၵၢၼ်တၢႆ။

လႆႈႁူႉဝႃႈၵူၼ်းၵေႃႉၺႃးၶႃႈတၢႆ ၸၢႆးထုၼ်းၼၼ်ႉပဵၼ်ၵူၼ်းၸႃႇတိၵဵင်းတွင်း၊ ၸၢႆးတႃႉ ၵေႃႉပဵၼ် ၵူၼ်းၶႃႈႁႅမ်သမ်ႉ ပဵၼ်ၵူၼ်းၸႃႇတိလၢႆးၶႃႈ – ဝႃႈၼႆ။