လုၵ်ႈၼွင်ႉပွင်ႈပၢႆတင်း ၶွပ်ႈၶူဝ်းၼႃႈႁိူၼ်း ၸၢႆးသႅင်ၸိုၼ်ႈ(ႁွင်ႉ) သၶႁ ႁူမ်ႈၵၼ်ႁႅၼ်းလူႇတၢၼ်းပၼ် ၸၢႆးသႅင် ၸိုၼ်ႈ လူႉၶွႆႈတဵမ် 7 ပီ တီႈလႅၼ်လိၼ်တႆး – ထႆး။
ဝၼ်းတီႈ 15/09/2018 ယၢမ်းၵၢင်ၼႂ် 6:30 မူင်း ထိုင် 2:00 မူင်းဝၢႆးဝၼ်း ၼၢင်းလွၼ်ႉယိုၼ်း(လႃႉယဵၼ်ႇ) ၵေႃႉ ပဵၼ်မေးၼၢင်း ၸၢႆးသႅင်ၸိုၼ်ႈ တင်း ၸုမ်းၶၢဝ်ႇၽူႈတွႆႇႁွၵ်ႈ ဢိၵ်ႇလူၺ်ႈ ပီႈၼွင်ႉဝၢၼ်ႈလၵ်းတႅင်ႇ၊ ပဵင်းလူင် ႁူမ်ႈ ၵၼ် ႁႅၼ်းတၢၼ်းပၼ် ၸၢႆးသႅင်ၸိုၼ်ႈ(ႁွင်ႉ) သၶႁ တီႈဝတ်ႉၾႃႉဝဵင်းဢိၼ်း ဝၢၼ်ႈလၵ်းတႅင်ႇ ဢိူင်ႇပဵင်းလူင် လႅၼ် လိၼ် တႆး – ထႆး ၸႄႈဝဵင်း ဝဵင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆး။ ႁႅၼ်းတၢၼ်းယိူင်းၸူးထိုင် ၸၢႆးသႅင်ၸိုၼ်ႈ(ႁွင်ႉ) သၶႁ လူႉၶွႆႈတဵမ် 7 ပီ ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းႁွင်ႈၵၢၼ် PI လႄႈ ၽူႈဢွၼ်ၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈ လၢတ်ႈဝႃႈ “ မိူဝ်ႈၼႆႉ တီႈဢၼ်ႁဝ်းၶႃႈလႆႈမႃး ၸတ်းႁႅၼ်းတၢၼ်းပၼ်တႃႇၸၢႆးသႅင်ၸိုၼ်ႈႁဝ်း (ႁွင်ႉ) သၶႁ လူႉၶွႆႈၶွပ်ႈတဵမ် 7 ပီ။ ယွၼ်ႉ ပိူဝ်ႈမၼ်းၸၢႆးၵေႃႈ ပဵၼ်ပႃးၽူႈၵေႃႇတင်ႈၸုမ်းၽူႈတွႆႇႁွၵ်ႈ လႆႈႁူမ်ႈၵၼ်ႁဵတ်းၵၢၼ်မႃးၵေႃႈၸႂ်ႈ၊ ပဵၼ်ၵူၼ်းလမ်ႇလွင်ႈ ပုၼ်ႈတႃႇၽူႈတွႆႇႁွၵ်ႈၵေႃႉၼိုင်ႈၵေႃႈၸႂ်ႈ” ဝႃႈၼႆ။
ၸဝ်ႈၶူးသီရိ ထမ်မ ဝဵင်းဢိၼ်း မဵတ်ႉတႃႇတြႃး ပၼ်ၸိုဝ်ႈႁူဝ်ၶေႃႈ ၽူႈႁတ်းႁၢၼ်ၵႂႃႇဝႃႈ “ ၽြႃးပဵၼ်ၸဝ်ႈ ႁေႃး ဝႆႉဝႃႈ လွင်ႈႁတ်းႁၢၼ်ၼႆႉ ပွင်ႇဝႃႈ ဝိရိယ။ ဝိရိယ ပွင်ႇဝႃႈ လွင်ႈႁတ်းႁၢၼ် လွင်ႈဝိရိယၼႆႉ မၼ်းဢမ်ႇၸႂ်ႈ ၵႂႃႇႁႅမ် ပိူၼ်ႈပေႉ သိုၵ်းဢၢၼ်ႇႁူဝ်ႁဵင်၊ ၾၢင်ႁၢင်ႈၽူႈႁၢတ်းႁၢၼ်ၼႆႉ မီး 4 ပိူင်။ ပေႃး 4 ပိူင် ၼႆႉ တဵမ်ထူၼ်ႈ ၸင်ႇႁွင်ႉဝႃႈ ဝိရိယ။ မိူၼ် ၼင်ႇ 1) ၵဝ်တေၶတ်းၸႂ်ၵႃႈ ဢမ်ႇထိုင်ယိူင်းမၢႆ ပဵၵ်ႉသမ်ႉဝႃႈ ၵိုတ်းၼင် ၵဝ်ၵူၺ်းၵေႃႈ ၵဝ်တေႁဵတ်း။ 2) ပဵၵ်ႉသမ်ႉ ဝႃႈ ၵိုတ်းဢဵၼ်ၵဝ်ၵူၺ်းၵေႃႈ ၵဝ်တေႁဵတ်း။ 3) ၵိုတ်းလုပ်ႇ ၵဝ်ၵူၺ်းၵေႃႈ ၵဝ်တေႁဵတ်း။ 4) ၵိုတ်းလိူတ်ႈၵဝ်ၵူၺ်း ၵေႃႈ ၵဝ်တေႁဵတ်း။ ဢၼ်ၼႆႉ ၶၢမ်ႇဢဝ်တူဝ် ဢဝ်ၼိူဝ်ႉဢဝ်လုပ်ႇ၊ ဢဝ်လိူတ်ႈ သေ ႁဵတ်းတႃႇပုၼ်ႈၵူၼ်းၼမ် ႁဵတ်း ႁိုင်ႁိုင်၊ ႁဵတ်းတႃႇသေႇ၊ ႁဵတ်းဢမ်ႇၶၢၼ်ႉဢမ်ႇထွႆ၊ ႁဵတ်းဢမ်ႇၵိုတ်းဢမ်ႇလိုဝ်ႈ မိူၼ်ၸိူင်ႉၼင်ႇ လုင်းသႅင်ၸိုၼ်ႈ ႁဝ်း ၼႆႉ ႁဵတ်းမႃးၸဵမ်မိူဝ်ႈ ၵေႃႉလဵၵ်ႉ ဢမ်ႇလိုဝ်ႈ။ တၢႆၸင်ႇၵွႆႈလိုဝ်ႈ ဢၼ်ၼႆႉႁွင်ႉဝႃႈ ဝိရိယ လွင်ႈႁတ်းႁၢၼ်ၼၼ်ႉယဝ်ႉ” ဝႃႈၼႆ။
ၼႂ်းပၢင်ႁႅၼ်းလူႇတၢၼ်း ၸၢႆးသႅင်ၸိုၼ်ႈ(ႁွင်ႉ) သၶႁၼႆႉ ယၢမ်းၵၢင်ၼႂ် 6 မူင်းပၢႆ လူႇတၢၼ်းၵၢပ်ႈသွမ်းသင်ၶၸဝ်ႈ။ ထိုင်မႃး ယၢမ်း 9 မူင်း ဢွၼ်ၵၼ်ၵႂႃႇလူႇတၢၼ်းတီႈၶုမ်ၵုတ်း ၸၢႆးသႅင်ၸိုၼ်ႈ(ႁွင်ႉ) သၶႁ။ ထိုင်မႃး ယၢမ်း 11 မူင်း ပၢႆသမ်ႉ ဢွၼ်ၵၼ်ၵၢပ်ႈသွမ်းဝၼ်းသင်ၶၸဝ်ႈ တီႈဝတ်ႉၾႃႉဝဵင်းဢိၼ်းသေ ဢွၼ်ၵၼ်လူႇတၢၼ်း ယၢတ်ႇၼမ်ႉ ယဝ်ႉတူဝ်ႈၵႂႃႇ ဝႃႈၼႆ။
လိူဝ်ၼၼ်ႉ ၸတ်းႁဵတ်းပႃးထႅင်ႈ ပၢင်ဢုပ်ႇၶႆႈ လွင်ႈပိုၼ်ႈၵႅပ်ႈၸၢႆးသႅင်ၸိုၼ်ႈ(ႁွင်ႉ) သၶႁ မီးၽူႈဢုပ်ႇၶႆႈၼႄ မိူၼ် ၼင်ႇ ၸဝ်ႈၶူးသီရိထမ်မ ဝဵင်းဢိၼ်း၊ ၸဝ်ႈၶိုၼ်းသႂ် ၸႂ်ယဵၼ်လႄႈ ၸၢႆးလႅင်း ႁူဝ်ၼႃႈၶႅမ်ႉပၢင်သဝ်း ၵုင်းၵျေႃႇ ၸဵမ် ၸိူဝ်းၼႆႉ ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် တင်း ၸၢႆးသႅင်ၸိုၼ်ႈ(ႁွင်ႉ) သၶႁၼႆႉ ႁူမ်ႈၵၼ်ၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈမႃးၸဵမ် မိူဝ်ႈပီ 1983 ႁၢၼ်ႉတေႃႇယၢမ်းလဵဝ် ၼႃႈၵၢၼ်တႃငၢၼ်း ဢၼ်ၶဝ်ၸဝ်ႈဢွၼ်ႁဵတ်းမႃး ယင်းတိုၵ်ႉသိုပ်ႇၵႂႃႇ သိုပ်ႇ ယၢင်ႈယူႇတေႃႇဝၼ်းမိူဝ်ႈၼႆႉ ။
