တူင်ႇၵူၼ်းတီႈလႂ်သေဢမ်ႇဝႃႈ တႃႇတူၺ်းထိုင်လုမ်းလႃးပၢႆးယူႇလီၼၼ်ႉ တိုၼ်းမီးၾိင်ႈယူတ်းယႃၵိုၵ်းၶိူဝ်းၽႂ်မၼ်းမႃး ။ ၸဵမ်မိူဝ်ႈ ၵၢပ်ႈဝၢၼ်ႈပၢၼ်မိူင်းပႆႇႁိူင်းၵေႃႈ ၾိင်ႈၵိၼ်ဢီႈယုၵ်းဢီႈယႃၼႂ်းပိုၼ်ႉတီႈၽႂ်မၼ်းတိုၼ်းမီး ။ တေႃႇထိုင်ယၢမ်းလဵဝ် ယႃႈၸွမ်ႇၵွမ်ႇ ႁိုဝ်ဢမ်ႇၼၼ် ယႃပိုၼ်ႉမိူင်းၸိူဝ်းၼႆႉ ယင်းတိုၵ်ႉၸႂ်ႉတိုဝ်းၸႂ်ႉၵိၼ်ၵၼ်ယူႇၶိူဝ်းယႂ်း ။

ယႃဢၼ်ႁဵတ်းၸွမ်းၾိင်ႈၵဝ်ႇၵဝ်ႇၸိူဝ်းၼၼ်ႉ မိူဝ်ႈဢွၼ်တၢင်းတႄႉ ၽူႈလူင်ႉလႅၼ်ႇပၢႆးယႃႈယႃၶဝ် ႁႃၶူၼ်ႉသွၵ်ႈႁၢၵ်ႈမႆႉႁၢၵ်ႈတွၵ်ႇသေ ႁဵတ်းၸွမ်းလူၺ်ႈသၽႃႇဝၵူၺ်း ။ ၵၢပ်ႈယၢမ်းလဵဝ် ၼင်ႇႁိုဝ်တေလႆႈၼမ်ႉမႅတ်ႈၼမ်ႉတွၼ်းၼမ်ၼၼ်ႉ ၸဝ်ႈပၢႆးမၢၵ်ႈမီးမၢင်ၸိူဝ်း ဢဝ်ယႃပိုၼ်ႉမိူင်း ယႃႈၸွမ်ႇၵွမ်ႇၸိူဝ်းၼႆႉ လေႃးယႃၵၢပ်ႈပၢၼ်မႂ်ႇ ဢၼ်မိူင်းဝၼ်းတူၵ်းႁဵတ်းဢွၵ်ႇမႃးၸိူဝ်းၼႆႉလႄႈ ဢမ်ႇၵတ်ႉယမ်ပဵင်းယႃႈၸွမ်ႇၵွမ်ႇမိူဝ်ႈၵွၼ်ႇ ယင်းၸၢင်ႈပဵၼ်ၽေးလူးၵွၼ်ႇဝႃႈၼႆႉ ။

ယႃႈၸွမ်ႇၵွမ်ႇ ယႃပိုၼ်ႉမိူင်း ဢၼ်ဝႃႈၼႆႉ မၼ်းတိုၼ်းၵိုၵ်းၶိူဝ်းၵူၼ်းၼႂ်းလုမ်ႈၾႃႉၼႆႉမႃး ပီယၢဝ်းၶၢဝ်းႁိုင် ။ ပေႃးမႃးတူၺ်း ပိုၼ်းပုတ်ႉထၼႆၵေႃႈ ၼႂ်း ပၸ်ၸေး 4 ပိူင်ၼၼ်ႉ ယင်း ပႃးယႃႈယႃ ဝႆႉပိူင်ၼိုင်ႈယူႇ။

ၼႂ်းပိုၼ်းမိူင်းႁူမ်ႈတုမ်မၢၼ်ႈတႄႉႁၼ်တႅမ်ႈမၢႆဝႆႉဝႃႈ ဢီႈယုၵ်းဢီႈယႃ ဢၼ်ယၢမ်ႈၸႂ်ႉတိုဝ်းမႃးလၢႆးတၢင်းၾိင်ႈၶိူဝ်းၽႂ်မၼ်းၼႆႉ မီးမႃးၸဵမ်ၼႂ်းပၢၼ် ပူးၵမ်ႇ ပၢင်ယႃႈ ဢႃႇဝ ၵုင်းပွင်ႇ ၼပ်ႉႁူဝ်ႁဵင်ပီမၼ်းလူးၵွၼ်ႇဝႃႈၼႆ။

ထိုင်မႃး ပၢၼ်ၶူဝ်ႊလူဝ်ႊၼီႊ ၽူႈၶႂၢၵ်ႈမိူင်းဢိင်းၵလဵတ်ႈ( တႆးမၢင်တီႈႁွင်ႉဝႃႈ ၵလႃးၼႃႈၽိူၵ်ႇ) ၶဝ်ႈမႃးၵုမ်းၵမ်မိူင်းမၢၼ်ႈ (1885 – 1948 ) ၼၼ်ႉ ၸင်ႇႁဵတ်းႁႂ်ႈ ၾိင်ႈႁဵတ်းယႃႈယႃၵိုၵ်းၶိူဝ်းၵိုၵ်းမိူင်းၸိူဝ်းၼႆႉ မီးလွင်ႈလႅၵ်ႈလၢႆႈမႃး ။

ဝၢႆးၼႆႉမႃး ၽႂ်ၸမ်ၽူႈလူင်ႉလႅၼ်ႇ ယႃပိုၼ်ႉမိူင်းၵေႃႈ ၵဵပ်းလႆႈတၢင်းႁူႉတၢင်းႁၼ်မွၵ်ႈၼၼ်ႉၵူၺ်း။ ၵူၼ်းဢၼ်သူၼ်ၸႂ်လဵပ်ႈႁဵၼ်းဢဝ် ငဝ်ႈတေႃႇပၢႆၼၼ်ႉ မီးယူႇသေတႃႉ ႁူဝ်ၼပ်ႉဢေႇတႄႉတႄႉ ၼႆ ၵူၼ်းၶိုတ်းၼႃႈႁၼ်လင်ၶဝ်ယၢမ်ႈလၢတ်ႈၼင်ႇၼႆ။

ယႃပိုၼ်ႉမိူင်း ႁိုဝ် ယႃႈၸွမ်ႇၵွမ်ႇ ၸိူဝ်းၼႆႉ ၼႂ်းတူင်ႇတႆးတႄႉ ဢွၼ်ၵၼ်ႁိၵ်ႈႁွင်ႉၵၼ်ဝႃႈ ယႃတႆး ။ ယွၼ်ႉဝႃႈ ပူႇသြႃႇ ၽူႈလူင်ႉလႅၼ်ႇၾၢႆႇႁဵတ်းယႃႈယႃၸွမ်ႇၵွမ်ႇၸိူဝ်းၼႆႉ ၼႂ်းမိူင်းတႆးမီးၼမ် ။

မိူဝ်ႈပၢၼ် သိုၵ်းလုမ်ႈၾႃႉပွၵ်ႈသွင်ၼၼ်ႉၵေႃႈ ပေႃးၸပ်းမႆႈၶႆၼၢဝ် ၸဵပ်းသႅပ်ႇမႃး တႃႇယူတ်းယႃလႆႈၶိုတ်းတၼ်းၼၼ်ႉဢမ်ႇငၢႆႈ ၊ ၸင်ႇၼၼ် ၽွင်းၼၼ်ႉ ယႃႈၸွမ်ႇၵွမ်ႇၸိူဝ်းၼႆႉ ၶဝ်ႈတၢင်းတိုဝ်းတႃႇၵူၼ်းၽွင်းၼၼ်ႉ တႄႉတႄႉယူႇ။

ၸဵမ်ဢဝ် ၼႂ်းပၢင်တိုၵ်းသိုၵ်းသိူဝ်လႄႈသင် ၼႂ်းဝၢၼ်ႈၼွၵ်ႈၼႃးပၢင်ႇဢၼ်ႁၢင်ႇယၢၼ်ႁူင်းယႃၸိူဝ်းၼၼ်ႉ တိုၼ်းလႆႈသွၵ်ႈၵိၼ်ယႃႈၸွမ်ႇၵွမ်ႇၸိူဝ်းၼႆႉၵူၺ်းလႄႈ ထိုင်ပၢၼ်ႁိူဝ်ႈႁိူင်းလၢႆသမ်ႇသႅၼ်ပိူင်ၵေႃႈ ဢမ်ႇပႅတ်ႈလႆႈၾိင်ႈၵဝ်ႇၵဝ်ႇ ။

တႄႇၼၼ်ႉမႃး ယႃႈၸွမ်ႇၵွမ်ႇၼႆႉ ၶိုၼ်းႁိူင်းမႃးၶိုၼ်း ။ ယူႇတီႈႁွင်ႈၵၢၼ်ၾၢႆႇပၢႆးယူႇလီၵေႃႈ ပၼ်ၶႂၢင်ႉႁႂ်ႈယႃႈၸွမ်ႇၵွမ်ႇၸိူဝ်းၼႆႉ ၶဝ်ႈၼႂ်းလွၵ်းၵၢတ်ႇမႃး ။ ၵေႃႇမတီႇယႃပိုၼ်ႉမိူင်းႁိုဝ် ယႃႈၸွမ်ႇၵွမ်ႇၼႂ်းမိူင်းႁူမ်ႈတုမ်မၢၼ်ႈ ၼႆႉ တႄႇၽွတ်ႈမႃး ၼႂ်းပီ 1952 ။

မိူဝ်ႈ 1953 ၼၼ်ႉ ႁွင်ႈယႃ ဢၼ်ယူတ်းယႃလူၺ်ႈလၢႆးတၢင်းပိုၼ်ႉမိူင်းၼႆႉ မီးတီႈတႃႈၵုင်ႈ 9 တီႈလႄႈ ဝဵင်းလိူဝ်ႇ 7 တီႈ ။ ထိုင်မႃး 1955 ၸင်ႇယိုၼ်ယၼ်မီးမႃး ပၵ်းပိူင်ဢၼ်ၵဵဝ်ႇယႃႈၸွမ်ႇၵွမ်ႇႁိုဝ်ယႃပိုၼ်ႉမိူင်းၸိူဝ်းၼႆႉ ။

လိူဝ်ၼၼ်ႉ တႄႇဢဝ် ဝၼ်းတီႈ 21/01/1976 ၼၼ်ႉမႃး ၸင်ႇမီးႁူင်းႁဵၼ်းၾၢႆႇပၢႆးသၢႆႊယႃပိုၼ်ႉမိူင်း တိုင်းရင်းဆေးသိပ္ပံကျောင်း ။ 2001 ၼၼ်ႉ ၸင်ႇတႄႇမီး ၸၼ်ႉၸွမ်ၾၢႆႇယႃပိုၼ်ႉမိူင်းၼႆ – မြန်မာ့တိုင်းရင်းဆေးပညာနှင့်-ဦးစီးဌာန တႅမ်ႈမၢႆပိုၼ်းဝႆႉ ၼင်ႇၼႆ။

မိူင်းႁူမ်ႈတုမ်မၢၼ်ႈၼႆႉ ဢမ်ႇၵတ်းယဵၼ်ၼိမ်တဵင်ႈၶၢဝ်းယၢဝ်းလႄႈ ႁွင်ႈၵၢၼ်လႄႈပၵ်းပိူင်မီးလၢႆသမ်ႇသႅၼ်ပိူင်သေတႃႉ ဢမ်ႇႁူမ်ႇငမ်းလႆႈပိူင်ပဵၼ်ၼႂ်းမိူင်းႁူမ်ႈတုမ်တင်းပိုၵ်း။
ယႃပိုၼ်ႉမိူင်းဢၼ်ၵူၼ်းမိူင်းလႆႈပိုင်ႈမႃးပၢၼ်သိုပ်ႇပၢၼ်ၼၼ်ႉၵေႃႈ ၵၢပ်ႈပၢၼ်မႂ်ႇၼႆႉ ၸဝ်ႈပၢႆးမၢၵ်ႈမီးမၢင်ၸိူဝ်း ႁဵတ်းဢဝ်လၢႆးလႅတ်းလၢႆးဝႆးမၼ်းမႃး ။ၼင်ႇႁိုဝ်တေၸဵဝ်းလႆႈ ၼင်ႇႁိုဝ် တေလႆႈၼမ်ႉမႅတ်ႈၼမ်ႉတွၼ်းၼမ်ၼၼ်ႉ ႁႃလွၵ်းလၢႆးမၼ်းမႃးၼႆ မေႃယႃ CDM ၵေႃႉၼိုင်ႈလၢတ်ႈ ။

ၸင်ႇၼၼ်လႄႈ ယႃႈၸွမ်ႇၵွမ်ႇ ယႃပိုၼ်ႉမိူင်း မၢင်သႅၼ်း ၸၢင်ႈပဵၼ်ၽေးတေႃႇပၢႆးယူႇလီၶိုၼ်းၼႆယူႇ ။
ၼႂ်းလိူၼ်မေႊ 2026 ၼႆႉ ႁွင်ႈၵၢၼ်ၾၢႆႇပၢႆးယူႇလီ တႂ်ႈသိုၵ်းမၢၼ်ႈ ပိုၼ်ၽၢဝ်ႇ ယႃပိုၼ်ႉမိူင်း ဢၼ်ဢမ်ႇမႅၼ်ႈၸွမ်းပၢႆးယူႇလီ မီး ဢမ်ႇယွမ်း 6 သႅၼ်း ၵမ်ႈၼမ် ပဵၼ်ယႃႁႅင်းတႃႇၵမ်ႉထႅမ်တၢင်းၵႃႇမၵူၼ်းၸၢႆး ။

ၼႂ်းၼၼ်ႉ ဆင်ပြောင်ကြီး နတ်စည်းစိမ် ဇော်ဂျီလပ်စွဲ တောင်ကြာပန်း ဘီလူးငါးကောင် Double X ၼႆၸိူဝ်းၼႆႉ ။ ၼႂ်းၼၼ်ႉ ဢၼ်ၽႄႈယူႇၼႂ်းမိူင်းတႆးသေ ဢၼ်ၵူၼ်းမိူင်းတႆးသူင်ၵိၼ်ၵေႃႈ ပဵၼ် တောင်ကြာပန်း ယႃႁႅင်းၵႃႇမၵူၼ်းၸၢႆး ဝႃႈၼႆ ။

ၵူၼ်းၸိူဝ်းယၢမ်ႈၸႂ်ႉတိုဝ်းလၢတ်ႈဝႃႈ – ယႃ တောင်ကြာပန်း မိၵ်ႈမွၵ်ႇမူဝ်လွႆၼၼ်ႉ ၸဵဝ်းၼႄဢႃႇၼိတိၼ်ႇမၼ်းတႄႉယူႇ ။ ၵိၼ်ယဝ်ႉဢမ်ႇႁိုင် ႁဵတ်းႁႂ်ႈမီးလူမ်းၵႃႇမႁႅင်းလိူဝ်ၵဝ်ႇတႄႉယူႇ ။ ၵူၺ်းၵႃႈ ဢၼ်လေႃးသင်ဢမ်ႇလေႃးသင်ၼၼ်ႉတႄႉ ဢမ်ႇႁူႉ ” – ဝႃႈၼႆ။

ၸွမ်းၼင်ႇ ၼႂ်းလိၵ်ႈပိုၼ်ၽၢဝ်ႇႁွင်ႈၵၢၼ်ၾၢႆႇပၢႆးယူႇလီၼၼ်ႉ ပႃးဝႆႉဝႃႈ – ယႃဢၼ်လၢတ်ႈမႃးၼၼ်ႉ ဢမ်ႇတၢင်ႇဝႆႉမၢႆၾၢင်ပဵၼ်တၢင်းၵၢၼ် ၊ ဢမ်ႇၶဝ်ႈၸွမ်းလၵ်းၸဵင် ဢၼ်တမ်းဝႆႉ ၊ ပႃးဝႆႉ ယႃပွမ် ၸိူဝ်းၼႆႉလႄႈ ဢမ်ႇထုၵ်ႇလီၸႂ်ႉတိုဝ်း ဢမ်ႇထုၵ်ႇလီဝၢင်းၶၢႆ ။ သင်ၽူႈလႂ်ၽႂ် ဢမ်ႇၸွမ်းၼင်ႇပၼ်ၾၢင်ႉဝႆႉၸိုင် တေဢဝ်လိူင်ႈပၼ်တူတ်ႈတၢမ်ႇ လူၺ်ႈမတ်ႉတႃၼႂ်းမၢႆမီႈယႃပိုၼ်ႉမိူင်း 31 32 ၼၼ်ႉ ဝႃႈၼႆ။

ပိုၼ်ၽၢဝ်ႇပႃးဝႃႈ – မိူဝ်ႈထတ်းထွင်တူၺ်း လၢႆးလေႃးယႃႈၸွမ်ႇၵွမ်ႇၸိူဝ်းၼႆႉၼၼ်ႉ လႆႈႁၼ်ဢမ်ႇၸွမ်းပိူင်ယႃႈယႃ ၊ လေႃးပႃးယႃႈယႃမိူင်းဝၼ်းတူၵ်း Sildenafil လႄႈ Tadalafil ၸိူဝ်းၼႆႉ ။ လိူဝ်ၼၼ်ႉ ဢမ်ႇႁပ်ႉပၢၵ်ႇဢမ်ႇပၼ်ၵႂၢမ်းမၼ်ႈဝႃႈ ယႃၼႆႉလီဢမ်ႇလီၸိူဝ်းၼႆႉတႄႉလႄႈ ၵူၼ်းမိူင်း ဢမ်ႇၵိုင်ႇလီၸႂ်ႉတိုဝ်း ၼႆယူႇ။

ဢိင်ၼိူဝ်ၶေႃႈပိုၼ်ၽၢဝ်ႇၼႆႉသေ ၸိူဝ်းႁၼ်လီၵေႃႈမီး ၸိူဝ်းဢမ်ႇႁၼ်လီၵေႃႈမီး ၵွပ်ႈတိုၵ်ႉမႅၼ်ႈၽွင်းသိုၵ်းမၢၼ်ႈၵုမ်းမိူင်းဝႆႉ ။ ၵူၺ်းၵႃႈ ပေႃးၵဵဝ်ႇလွင်ႈပၢႆးယူႇလီ ပၢႆးပၺ်ႇၺႃႇ ၸိူဝ်းၼႆႉတႄႉ ၽႂ်ၵုမ်းမိူင်းဝႆႉၵေႃႈယဝ်ႉ ၵိုင်ႇလီထတ်းထွင်ပၼ် ႁႂ်ႈၵူၼ်းမိူင်းမီးသုၼ်ႇလီယူႇ ၼႆ ၵူၼ်းႁဵတ်း CDM ၵေႃႉၼိုင်ႈလၢတ်ႈၼင်ႇၼႆ ။
မေႃယႃၼၢင်းၵဵင်ၼုမ်ႇၽွင် ၼႂ်းၸုမ်းမေႃယႃတႆး လၢတ်ႈၼႄဝႃႈ –

ၵူၼ်းမိူင်းႁဝ်း ၵႆႉထၢင်ႇဝႃႈ ပေႃးဝႃႈ ပဵၼ်ယႃတႆးၼႆႉ မၼ်းဢမ်ႇမေႃလိူဝ် ဢမ်ႇမေႃၽိတ်း ပေႃးပဵၼ်ယႃဢိင်းၵလဵတ်ႈတႄႉမေႃလိူဝ်မေႃၽိတ်းၼႆၸိူဝ်းၼႆႉ တီႈတႄႉမၼ်း ယႃသင်ၵေႃႈယဝ်ႉ တၢင်းၵိၼ်သင်ၵေႃႈ ပေႃးဝႃႈ ၶဝ်ႈၵႂႃႇၼႂ်းလိူတ်ႈၼႂ်းတပ်းႁဝ်းယဝ်ႉ

သင်ဝႃႈ ပဵၼ်ယႃပိုၼ်ႉမိူင်းဢၼ်ၶဝ်ႈၸွမ်းပိူင်တႄႉတႄႉၸိုင် တေလႆႈၼႄ မၢႆၾၢင် လႄႈ ဝႂ်လၢႆႊၸိၼ်ႊဢၼ်ယွၼ်းၶႂၢင်ႉႁဵတ်းဢွၵ်ႇယႃႈယႃ ၵိုၵ်း ထူင်ယႃ ဢႅပ်ႇယႃ ၸိူဝ်းၼႆႉ ။

မၢင်ၸိူဝ်း သိုဝ်ႉၵိၼ်ယႃႈၸွမ်ႇၵွမ်ႇ လေႃးလႄးၵၼ်ၵိၼ်ၸိူဝ်းၼႆႉၵေႃႈမီး ။ ပေႃးပဵၼ်ၽူႈလူင်ႉလႅၼ်ႇၶဝ်တႄႉ တေသႂ်ႇသင် တေလေႃးၵၼ်မွၵ်ႈႁိုဝ်ၼႆ ႁူႉတႅတ်ႈၼႅတ်ႈသေတႃႉ ၵူၼ်းၸိူဝ်းလၢမ်းသေ ႁဵတ်းၵိၼ်ႁင်းၵူၺ်းတႄႉ ဢမ်ႇသၢင်ႇတေႃႇ ၵႆႉၸၢင်ႈဢဝ်ႁႅင်းပူၼ်ႉၵေႃႈမီး ယူႇၼႆ မေႃယႃၼၢင်းၵဵင်ၼုမ်ႇၽွင် ၼႂ်းၸုမ်းမေႃယႃတႆး သိုပ်ႇလၢတ်ႈၼင်ႇၼႆ-

မၢင်ၸိူဝ်းၼႆႉ ပေႃးၸႂ်ႉယႃ ဢၼ်ႁႅင်းမွၵ်ႈ 10 ပုၼ်ႈၼႆလႄႈၼေႃႈ ။ ပေႃးမႃးလေႃးသွင်ဢၼ်ၸွမ်းၵၼ်ၼႆ မၼ်းဢမ်ႇၵႂႃႇပဵၼ်သၢဝ်းၶႃႈၼႃ ။မၼ်းတေႁႅင်းလိူဝ်သေ ယုၵ်ႉၶိုၼ်ႈၵႂႃႇပဵၼ် ပုၼ်ႈႁွမ်းမၼ်း 1 ႁဵင်ႁႃႉ 2 ႁဵင်ႁႃႉၼႆ ၶိုၼ်ႈၵႂႃႇႁႅင်းၼႃႇၵေႃႈ ၸၢင်ႈပဵၼ်လႆႈ

ယႃႈၸွမ်ႇၵွမ်ႇ ဢၼ်ႁဵတ်းဢွၵ်ႇမႃး ပၢၼ်မႂ်ႇၼႆႉ ၸၢင်ႈလေႃးပႃးမႃးၸွမ်း ယႃႈ G6PD deficience ၸိူဝ်းၼႆႉလႄႈ ၶႅၼ်းပဵၼ်ၽေး ။ မၼ်းၸၢင်ႈႁဵတ်းႁႂ်ႈလိူတ်ႈၸၢင် ၊ ၽၢႆႈၼွႆႉၵေႃႈ ၸၢင်ႈပဵၼ်သီလမ်သေ ထိုင်လူႉသဵင်သၢႆၸႂ်လႆႈ ။မၢၵ်ႈၵႅဝ်းလႄႈ တပ်းၵေႃႈ တေလႆႈႁဵတ်းၵၢၼ်လူၼ်ႉလိူဝ်သေ လူႉၵွႆလႆႈ ။ ၸင်ႇၼၼ် ၵိၼ်ၵေႃႈ ႁႂ်ႈမီးလွင်ႈမီးတၢင်းမၼ်း ၼႆ မေႃယႃၼၢင်းၵဵင်ၼုမ်ႇၽွင်သိုပ်ႇလၢတ်ႈ ။

ပေႃးဢဝ်မၢႆမီႈယႃပိုၼ်ႉမိူင်းဝႃႈတႄႉ သင်ၶူင်ႁဵတ်းၶၢႆယႃႈယႃဢမ်ႇၸွမ်းၶွပ်ႇၸွမ်းပိူင် ဢမ်ႇၶိုတ်းလၵ်းၸဵင်ၸိုင် လူၺ်ႈမတ်ႉတႃ 31 ၼၼ်ႉ ၸၢင်ႈၺႃးတူတ်ႈတၢမ်ႇၶွၵ်ႈ 3 ပီ လႄႈ တၢမ်ႇငိုၼ်း ။ သင်ႁဵတ်းဢွၵ်ႇယႃသေ ဢမ်ႇမီးဝႂ်ၶႂၢင်ႉၸိုင် ၸၢင်ႈၺႃးတူတ်ႈတၢမ်ႇ လူၺ်ႈမတ်ႉတႃ 32 ၼႆယူႇ။
ဝႃႈၼၼ်သေတႃႉ ၸူဝ်ႈသိုၵ်းမၢၼ်ႈယိုတ်မိူင်းသေ ၶိၼ်ၽွင်းငမ်းမိူင်းယူႇၼႆႉ ပၵ်းပိူင်သင်ၵေႃႈ ဢမ်ႇႁူမ်ႇငမ်းလႆႈတႄႉတႄႉ ။ ၸင်ႇၼၼ် ဢၼ်ၵဵဝ်ႇလွင်ႈပၢႆးယူႇလီၸိူဝ်းၼႆႉၵေႃႈ တိုၵ်ႉႁႅင်းဢေႇတႄႉတႄႉၼႆ မေႃယႃ CDM ၵေႃႉၼိုင်ႈလၢတ်ႈၼင်ႇၼႆ။