ၵူၼ်းမၢတ်ႇၸဵပ်း ၽွင်းပၢင်တိုၵ်း ၸုမ်းဢူၺ်းလီပွတ်းႁွင်ႇ ၵေႃႉၼိုင်ႈ တေလႆႈၵႂႃႇႁူင်းယႃဝဵင်းလိူဝ်ႇသေ ၽႃႇဢဝ်မၢၵ်ႇ ၵွင်ႈဢွၵ်ႇ

ႁူဝ်လိူၼ် September ၼႆႉ သိုၵ်းဢူၺ်းလီပွတ်းႁွင်ႇ တင်း သိုၵ်း RCSS/SSA ပဵၼ်ပၢင်တိုၵ်းၵၼ် ၵူၼ်းဝၢၼ်ႈ မၢတ်ႇၸဵပ်း မၢၵ်ႇၵွင်ႈၶမ်တူဝ်ဝႆႉလႄႈ တေလုၵ်ႉတီႈႁူင်းယႃသီႇပေႃႉသေ လူင်းၵႂႃႇၽႃႇတတ်းတီႈႁူင်းယႃဝဵင်း လိူဝ်ႇ(မၼ်းတလေး)။

မိူဝ်ႈၽုၵ်ႈ ဝၼ်းတီႈ 14/09/2018 ၾၢႆႇမေႃယႃ ၸႄႈဝဵင်းသီႇပေႃႉ ႁၢင်ႈႁႅၼ်း တေသူင်ႇတူဝ် လုင်းၸၢႆးၸၢမ်ႇထုၼ်း ၵႂႃႇယူတ်းယႃ ၽႃႇတတ်းဢဝ်မၢၵ်ႇၵွင်ႈဢၼ်ၶမ်ဝႆႉ တီႈႁူင်းယႃ ဝဵင်းလိူဝ်ႇ ဝႃႈၼႆ။

ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၽုၵ်ႈတႄႉ တေ လႆႈသူင်ႇမိူဝ်းၽႃႇတတ်းတီႈႁူင်းယႃ ဝဵင်းလိူဝ်ႇယဝ်ႉၶႃႈ။ မိူဝ်ႈဝႃး ပႃႇတီႇႁူဝ်သိူဝ်ႁဝ်းၶႃႈ လႆႈၵႂႃႇသူႇၸႂ်းသေ တွၼ်ႈ ငိုၼ်း တႃႇၸႂ်ႉၸၢႆႇပၼ် 1 သႅၼ် 4 မိုၼ်ႇပျႃး။ ထႅင်ႈလွင်ႈၼိုင်ႈၵေႃႈ တွၼ်ႈတႃႇတေၵႂႃႇယူတ်းယႃ တီႈဝဵင်းလိူဝ်ႇၼၼ်ႉ တေ မီးၼၢင်းမွၼ်းသႅင်လၢဝ် ၵူၼ်းၼႂ်းၵေႃလိၵ်ႈလၢႆး ဝဵင်းလိူဝ်ႇ ဢဝ်ပုၼ်ႈၽွၼ်းၸွႆႈထႅမ် ပိၼ်ႇၽႃသႃပၼ်” ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 01/09/2018 ယၢမ်းၵၢင်ၶမ်ႈ မွၵ်ႈ 7:30 မူင်းၼၼ်ႉ ယွၼ်ႉၸုမ်းယိပ်းၵွင်ႈၵၢင်ႇ ၼင်ႇၵၼ် ပိုတ်းယိုဝ်းၵၼ်ၼႂ်းဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းၼမ်ႉတူႈသေ မၢၵ်ႇၵွင်ႈတိူဝ်ႉၺႃး ၵူၼ်းဝၢၼ်ႈ 2 ၵေႃႉ လုင်းၸၢႆးၸၢမ်ႇထုၼ်း တင်း ၸၢႆးမူဝ် ဝႃႈၼႆ။

ၸၢႆးလၢဝ်သႅင် လၢတ်ႈဝႃႈ “ၸၢႆးမူဝ်သမ်ႉ တိူဝ်ႉတီႈပဵမ်ႉယဝ်ႉ မၢၵ်ႇၵွင်ႈၽၢတ်ႈတိူဝ်ႉမိုဝ်းၾၢႆႇၶႂႃ ၼိူဝ်ႉၼင်လူႉ ၵွႆၵႂႃႇၼမ် လႄႈ တေလႆႈၵႂႃႇၽႃႇဢဝ်ၼိူဝ်ႉတၢင်ႇတီႈမႃးၵုပ်းၶိုၼ်းႁႂ်ႈၶႅၼ်မၼ်း မိူၼ်ၵဝ်ႇၶိုၼ်း လႆႈငိၼ်းမေႃယႃၶဝ်လၢတ်ႈ ၸိူင်ႉၼၼ်ဢေႃႈ” ဝႃႈၼႆ။

တႄႇဢဝ်ႁူဝ်လိူၼ်သႅပ်ႊထႅမ်ႊၿိူဝ်ႊၼႆႉမႃး ၵူၼ်းမိူင်း ၼႂ်းၸႄႈဝဵင်းၼမ်ႉတူႈ ၼပ်ႉႁူဝ်ႁဵင် လႆႈဢွၼ်ၵၼ်ပၢႆႈၽေးသိုၵ်း ယွၼ်ႉၸုမ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ်၊ ယၢမ်းလဵဝ် ပွၵ်ႈမိူဝ်းဝၢၼ်ႈၵဝ်ႇၽႂ်မၼ်းယဝ်ႉ။ ၼႂ်းပိုၼ်ႉတီႈၼႆႉ ၵႆႉၵႆႉပဵၼ်ပၢင်တိုၵ်းလႄႈ ၵူၼ်းဝၢၼ်ႈၸိူဝ်းၼႆႉ ၵႆႉၵႆႉလႆႈပၢႆႈ၊ ဢမ်ႇၸၢင်ႈၽုၵ်ႇသွမ်ႈ လုမ်းလႃး သူၼ်ႁႆႈၼႃး ဝႃႈၼႆ။